Vishnudharmottara Purana · Chapter 1.167

mārkaṇḍeya uvāca //
atrāpyudāharantīmamitihāsaṃ purātanam //
dīpadānāllalitikā yadavāpa purā nṛpa

āsīccitraratho nāma vidarbheṣu mahīpatiḥ //
tasya putraśataṃ rājño jajñe pañcadaśottaram

ekaiva kanyā tasyāsīllalitā nāma nāmataḥ //
sarvalakṣaṇasampūrṇā rūpeṇāpratimā bhuvi

tāṃ dadau kāśirājāya sa pitā cārudharmiṇe //
śatāni tasya bhāryāṇāṃ trīṇyāsaṃścātra dharmiṇaḥ

tāsāṃ madhye'gramahiṣī lalitāsya tadā'bhavat //
viṣṇorāyatane tasyāḥ sahasaṃ rājasattama

pradīpānāṃ prajvalati divārātramarindama //
tāmisramāśvayukpakṣaṃ śuklapakṣaṃ ca kārtikāt

tasyāḥ prajvalitaṃ dīpamuccasthānakṛtaṃ tathā //
tasminkāle tathā nityaṃ brāhmaṇāvasatheṣu sā

nityaṃ bhavati sāyāhne dīpapreṣaṇatatparā //
catuṣpatheṣu rathyāsu devatāyataneṣu ca

caityavṛkṣeṣu goṣṭheṣu parvatānāṃ ca mūrdhasu //
pulineṣu nadīnāṃ ca kūpamūleṣu yādava

tasminbhavati sākāle dīpadānaparāyaṇā //
tāṃ sapatnyo'tha saṅgamya papracchuridamādṛtāḥ

sapatnya ūcuḥ //
sarvāndharmānparityajya lalite tvaṃ sadaiva tu //
viṣṇorāyatane subhrūrdīpadānaparāyaṇā

tadetatkathayāsmākaṃ lalite kautukaṃ param //
manyāmahe tvayāvaśyaṃ dīpadānaphalaṃ śrutam

lalitikovāca //
nāhaṃ matsariṇī bhadrā na ca rāgādidūṣitā //
ekapatyāśrayā yātā bhavatyo mama mānadāḥ

apṛthagdharmacaraṇāḥ śṛṇvantu gaditaṃ mama //
mayaitaddīpadānasya yathā vai bhujyate phalam

harasya dayitā bhāryā śailarājasutā varā //
umādevīti madreṣu devikā yā saridvarā //

narāṇāmanukampārthaṃ brāhmaṇairavatāritā //
tīrayorubhayostasyāḥ kṣetraṃ krośacatuṣṭayam

tasmim̐stīrthe tu pānīyaṃ sarvatīrthaprakalpitam //
tasmiṃstīrthe mṛtā martyāḥ prāpnuvanti śubhāṃ gatim

śrutābhilāṣitā dṛṣṭā devikā pāpanāśinī //
tasyāṃ snātvā sakṛnmartyo gāṇapatyamavāpnuyāt

tasyāstīrthaṃ nṛsiṃhākhyaṃ sarvakalmaṣanāśanam//
nṛsiṃhavapuṣā snānaṃ kṛtaṃ yatra purā śubhā

sauvīrarājasya purā maitreyo'bhūtpurohitaḥ//
tasmim̐stīrthe tadā tena viṣṇorāyatanaṃ kṛtam

ahanyahani śuśrūṣāṃ puṣpadhūpādilepanaiḥ //
dīpadānādibhiścaiva cakre tatra sa vai dvijaḥ

kārtike dīpakāstatra pradattāstena caikadā //
āsīnnirvāṇabhūyiṣṭho devārcāpurato niśi

devatāyatane cāsaṃ tathāhamapi mūṣikā//
pradīpa vartiharaṇe kṛtabuddhirvarānanā

gṛhītā ca mayā vartirvṛṣadaṃśo rurāva ca //
naṣṭā cāhaṃ tadā tasya mārjārasya bhayāttadā

vartiprāntena naśyantyā dīpakaḥ prerito mayā //
jajvāla pūrvavaddīptyā tasminnāyatane punaḥ

mṛtā cāhaṃ tadā jātā vidarbharājakanyakā //
jātismarā mahīpasya mahiṣī cārudharmiṇaḥ

eṣa prabhāvo dīpasya kārtike māsi śobhanāḥ //
dattasyāyatane viṣṇoryasyeyaṃ vyuṣṭiruttamā

yadi vo nāsti mātsaryaṃ dīpo deyaḥ sadā śubhāḥ //
asaṅkalpitamapyetatpreraṇaṃ yatkṛtaṃ mayā

keśavālayadīpasya tasyedaṃ bhujyate phalam //
etasmātkāraṇāddīpānahametānaharniśam

prayacchāmi harerdhāmni jñātasya ca hi yatphalam //
mārkaṇḍeya uvāca //
evamuktāḥ sapatnyastā dīpadānaparāyaṇāḥ

babhūvurdevadevasya keśavasya sadā gṛhe //
tataḥ kālena mahatā tena rājñā mahātmanā //
viṣṇulokamanuprāptāḥ pañcatvaṃ prāpya mānada

taṃ lokamāsādya nṛpeṇa sārdhaṃ sā rājaputrī kamalābharūpā //
reme mahīpāla mudā sametā dīpapradānāccyavanādvimuktā

iti śrīviṣṇudharmottare prathamakhaṇḍe mārkaṇḍeyavajrasamvāde dīpamāhātmye lalitikopākhyānaṃ nāma saptaṣaṣṭyadhikaśatatamo'dhyāyaḥ