Vishnudharmottara Purana · Chapter 1.166

// vajra uvāca //
mahāvartipradānasya yatphalaṃ bhṛgunandana //
tanmamācakṣva tattvena vidhiṃ kālaṃ tathaiva ca

mārkaṇḍeya uvāca //
mahāvartiḥ sadā deyā bhūmipāla mahāphalā //
kṛṣṇapakṣe viśeṣeṇa tatrāpi ca viśeṣataḥ

amāvāsyā ca nirdiṣṭā dvādaśī ca mahāphalā //
āśvayujyāmatītāyāṃ kṛṣṇapakṣasya yā bhavet

amāvasyā tadā puṇyā dvādaśī vā viśeṣataḥ //
devasya dakṣiṇe pārśve deyā tailatulā nṛpa

palāṣṭakayutāṃ rājanvartiṃ tatra tu dāpayet //
mahārajanaraktena samagreṇa tu vāsasā

vāmapārśve ca devasya deyā ghṛtatulā nṛpa //
palāṣṭakayutāṃ śuklāṃ vartiṃ tatra tu dāpayet

vāsasā tu samagreṇa sopavāso jitendriyaḥ //
mahāvartidvayamidaṃ sakṛddattvā mahīpate

svarlokaṃ suciraṃ bhuktvā jāyate bhūtale yadā //
tadā bhavati lakṣmīvānrūpasaubhāgyamāśritaḥ

rāṣṭre ca jāyate yasmindeśe ca nagare'thavā //
kule ca rājaśārdūla tatra syāddīpavatprabhā

atyujjvalaśca bhavati yuddheṣu kalaheṣu ca //
khyātiṃ yāti tathā loke sajjanānāṃ ca sadguṇaiḥ

ekāmapyatha yo dadyādabhīṣṭamanayordvayoḥ //
mānuṣye sarvamāpnoti taduktaṃ te mayā'nagha

svarge tathārdhamāpnoti bhāgaṃ kālaṃ ca yādava //
sāmānyasya tu dīpasya rājandāne mahatphalam

kiṃ punarmahato yasya phalasyānto na vidyate //
dīpadānaṃ paraṃ puṇyamanyadeveṣvapi dhruvam

kiṃ punardeva devasya tvanantasya mahātmanaḥ //
giriśṛṅgeṣu dātavyā nadīnāṃ pulineṣu ca

catuṣpatheṣu rathyāsu brāhmaṇānāṃ gṛheṣu ca //
vṛkṣamūleṣu goṣṭheṣu kāntāragahaneṣu ca

dīpadānena sarvatra mahatphalamupāśnute //
yāvantyakṣinimeṣāṇi dīpaḥ prajvālito nṛpa

tāvantyeva sa rājendra varṣāṇi divi modate //
dīpadānena rājendra cakṣuṣmāniha jāyate

rūpasaubhāgyayuktāśca dhanadhānyasamanvitāḥ //
dīpamālāṃ prayacchanti ye narāḥ śārṅgiṇo gṛhe

bhavanti te candrasamāḥ svargamāsādya mānavāḥ //
dīpāgāraṃ naraḥ kṛtvā kūṭāgāranibhaṃ śubham

keśavālayamāsādya nāke bhāti sa śakravat //
yathojjvalaḥ sadā dīpo dīpadātāpi yādava

tathā nityojjvalo loke nākabhraṣṭo'bhi jāyate //
samīpe tu yathā loke cakṣūṃṣi phalavanti hi

tathā dīpasya dātāro bhavanti saphalekṣaṇāḥ //
yathaivordhvagatirnityaṃ rājandīpaśikhā śubhā

dīpadātustathaivordhvagatirbhavati śobhanā //
tasmātsarvaprayatnena dīpā deyā nareśvara

āśvayujyāmatītāyāṃ yāvadrājendra kārtikī //
tāvaddīpapradasyoktaṃ phalaṃ rājanviśeṣataḥ

tāvatkālaṃ prayacchanti ye tu dīpaṃ sadā niśi //
tuṃge deśe mahatteṣāṃ bahiḥ puṇyaphalaṃ bhavet //

yasyāndhakāre gahane prākāśyaṃ tena jāyate/
prākāśye yaduśārdūla tena yānti hi tatsukham

śravaṇe dīpakaṃ dattvā nadīdvitayasaṃgame //
tejasvī ca yaśasvī ca rūpavānabhijāyate

dīpā nadīṣu dātavyāḥ kārtikyāṃ ca viśeṣataḥ //
āśvayukkṛṣṇapakṣasya yā tu pañcadaśī bhavet

bilvadvāreṣu dātavyāstathā dīpā yathāvidhi //
anyatrāpi tadā dīpairmahatpuṇyaphalaṃ labhet

śravaṇadvādaśīyoge kṛṣṇapakṣe tathaiva ca //
ghṛtena dīpā dātavyāstilairvā yadunandana

vasāmajjādibhirdeyā na tu dīpāḥ kathañcana //
dattvā dīpaṃ na kartavyaṃ tena karma vijānatā

nirvāpaṇaṃ ca dīpasya hiṃsanaṃ ca vigarhitam //
yaḥ kuryāttena karmāṇi syādasau puṣpitekṣaṇaḥ

dīpahartā bhavedandhaḥ kāṇo nirvāpako bhavet //
dīpadānātparaṃ dānaṃ na bhūtaṃ na bhaviṣyati

dīpadānaṃ tu kartavyaṃ vipraveśmasu paṇḍitaiḥ//
dvijaveśmani yo dadyātkārtike māsi dīpakam

agniṣṭomaphalaṃ tasya pravadanti manīṣiṇaḥ //
prāṇijāṃ nīlaraktāṃ ca dīpe vartiṃ vivarjayet

viśeṣeṇa pradātavyā padmasūtrabhavā nṛpa //
padmasūtrodbhavāṃ vartiṃ gandhatailena dīpake

virogaḥ subhagaścaiva dattvā bhavati mānavaḥ //
dātavyaṃ devadevasya karpūreṇa ca dīpakam//
aśvamedhamavāpnoti kulaṃ caiva samuddharet

etanmayoktaṃ tava dīpadāne phalaṃ samagraṃ yaduvaṃśacandra //
śrutvā yathāvatsatataṃ tu deyā dīpāstvayā viprasurālayeṣu

iti śrīviṣṇudharmottare prathamakhaṇḍe mārkaṇḍeyavajrasaṃvāde dīpadānapraśaṃsānāma ṣaṭṣaṣṭyadhikaśatatamo'dhyāyaḥ