Vishnudharmottara Purana · Chapter 1.164

mārkaṇḍeya uvāca //
atrāpyudāharantīmamitihāsaṃ purātanam //
māgadheṣu tu yadvṛttaṃ tacchṛṇuṣva narādhipa

babhūva māgadho rājā caṇḍavega iti śrutaḥ //
tasyāsīdrūpasaṃpannā bhāryā nayanasundarī

sarvadharmānparityajya pratasaṃvatsaraṃ tu sā //
tilānhomayate viprairjuhoti ca tathā svayam

śravaṇadvādaśīyoge māghe māsi hutāśane //
devasya caiva naivedyaṃ karoti tilamodakaiḥ

arcanena ca vāsobhiḥ pūjayatyapi mādhavam //
mahārañjitaraktāni vāsāṃsi vividhāni ca

brāhmaṇīnāṃ ca geheṣu visarjayati tatparā //
mahāvartipradānaṃ ca vidhatte keśavālaye

tāṃ kadācitsukhāsīnāṃ brāhmaṇīṃ tu vasantikā //
papraccha sakhibhāvena rahasyaṃ nirjane sthitā

vasantikovāca //
sarvadharmānparityajya māghe māsi śubhānane //
dvādaśyāṃ kṛṣṇapakṣasya kasmādarcayase harim

kasmāttathā bahutilaṃ hāvayasyanale tathā //
etanme saṃśayaṃ chindhi rahasyaṃ cenna te śubhe

nayanasundaryuvāca //
rahasyametatparamaṃ na rahasyaṃ tathā tvayi //
tvaṃ me sakhīśvarī prāṇastvaṃ me prāṇadhaneśvarī

asti vaitastiko nāma deśaḥ paramadhāmikaḥ //
tatra grāmavaraṃ cāsīdvasatirme suśobhanā

caṇḍavegaśca vipro'bhūdbhartā me pūrvajanmani //
nāstiko niranukrośastarkaśāstrarataḥ sadā

tatraiva viṣaye rājā babhūva dadhivāhanaḥ //
tasya bhāryāṃ vayasyā me babhūva kamalā śubhā

sā kadācinmāmuvāca rahasyaṃ varavarṇinī //
nārī bhartṛkṛtādardhaṃ puṇyaṃ prāpnoti sundarī

nāsti strīṇāṃ pṛthagyajño na vrataṃ nāpyupoṣitam //
patiṃ śuśrūṣate yā tu tena svarge mahīyate

kartavyaṃ yoṣitā puṇyaṃ pṛthagvāpi tadicchayā //
patiste nāstiko bhadre kiñcinnācarate śubham

na cācarasi dharmaṃ tvaṃ tathā ca tadanujñayā //
kā gatiḥ paraloke te bhaviṣyati śubhānane

iha yatkriyate karma pretya tatropabhujyate //
yenoptaṃ phalakāle tu sa evāśnāti bhāmini

mānuṣyaṃ durlabhaṃ prāpya vidyutsampātacañcalam //
nācaranti śubhaṃ ye tu teṣāṃ janma nirarthakam

kadācidapi vāmoru yoniṣvatha paribhraman //
mānuṣyaṃ nāma jāyeta yatrāyattaṃ śubhāśubham // // 1.164.२० /
caṇḍālatve'pi mānuṣyaṃ sarvathā sakhi durlabham //
ātmā śakyastayā trātuṃ mānuṣyānnānyataḥ śubhe

tavopari tathā jātā sakhī bhāvena me kṛpā //
kadaryyasyāsya bhāryā tvaṃ susvabhāvā pativratā

tatra te'nugrahaṃ kiñcitkariṣyāmi nibodha tat //
harasya dayitā bhāryā śailendratanayā umā

vistāritamahākūlā sā vitastā mahānadī //
avṛttikarṣitaḥ pāpaṃ kṛtvaiva ṛtupañcakam

snānenaikena sakalaṃ śaiśireṇa vyapohati //
yasyāṃ yasyāṃ tithau snātaḥ svargamāpnotyasaṃśayam

tasyāṃ samvatsaraṃ snātvā mokṣopāyaṃ tu vindati //
yā ca susvādusalilā yā ca pāpakṣayaṅkarī

tasyāstīre mayā nityaṃ prati samvatsaraṃ śubhe //
upoṣya māghakṛṣṇasya dvādaśyāṃ śravaṇe tathā

pūjito bhagavānviṣṇurbrāhmaṇāśca hutāśanaḥ //
tilaistasmāttu te khyātaṃ brāhmametadvrataṃ mama

tasmātskannaṃ tilaṃ yacca yadagnau patitaṃ na ca //
tataḥ puṇyaphalaṃ sarvaṃ tvamāpnuhi varānane

ityevamuktayā gatvā bhartā pṛṣṭastadā mayā //
hasatā tena cāsmyuktā gaccha gṛhṇīṣva tatphalam

svayaṃ kṛtvā śubhaṃ karma kamalā sā sakhī mama //
saha bhartrā viśālākṣi viṣṇulokamito gatā

tallokamakṣayaṃ tasyāḥ śrutaṃ vaivasvatānmayā //
tasmāddṛṣṭaphalaṃ bhadre karomi tiladvādaśīm

etatte sarvamākhyātaṃ yanmāṃ pṛcchasi sundari //
mārkaṇḍeya uvāca //
etacchrutvā śubhaṃ vākyaṃ brāhmaṇyapi vasantikā

śravaṇadvādaśīyoge pūjayāmāsa keśavam //
māghakṛṣṇe mahābhāga tilairnityamatandritā

pūjayitvāpi sā devaṃ śvetadvīpamito gatā //
sāpi rājño mahābhāgā tathā nayanasundarī

amalaṃ sthānamāsādya virarāja śaśiprabhā //
tasmātsarvaprayatnena tadā pūjyo janārdanaḥ

tilairnityaṃ mahābhāga hotavyāśca tathā tilāḥ //
tilāśca deyā viprebhyastasminnahani pārthiva // ३७ /
ekaikasmāttilādrājaṃstilabījodbhave yathā //
sukṛṣṭakṣetrajāddṛṣṭaṃ deve kālapravarṣiṇi

ekaikasmāttilāttadvatphalamakṣayyamaśnute //
svarloke viṣṇuloke vā mānuṣye yadi vā nṛpa //
akṣayyaṃ phalamāpnoti ekaikasmāttilāttilāt

tasmātprayatnena narendracandra tasyā samabhyarcaya vāsudevam //
upoṣitaḥ prītamanā yathāvattrāṇaṃ sa devaḥ prathito narāṇām

iti śrīviṣṇudharmottare prathamakhaṇḍe mārkaṇḍeyavajrasaṃvāde caṇḍavegopākhyāne tiladvāda śīmāhātmyavarṇanaṃ nāma catuḥṣaṣṭyadhikaśatatamo'dhyāyaḥ