Vishnudharmottara Purana · Chapter 1.163

vajra uvāca//
ekāmupoṣya kṛṣṇāṃ yāṃ dvādaśīṃ vidhinā naraḥ //
mahatphalamavāpnoti tāṃ samācakṣva bhārgava

mārkaṇḍeya uvāca //
pauṣyāntu samatītāyāṃ śravaṇena tu saṃyutā //
dvādaśī yā bhavetkṛṣṇā proktā sā tiladvādaśī

tilaiḥ snānaṃ tilairhomaṃ naivedyaṃ tilamodakaiḥ //
dīpāśca tilatailena tathā deyaṃ tilodakam

tilāśca deyā viprebhyastasminnahani pārthiva //
upavāsadine rājanhotavyāśca tathā tilāḥ

upoṣitenāpare'hni hotavyāśca viśeṣataḥ //
indhanaṃ ca pradātavyaṃ brāhmaṇebhyastathā'nagha

tilaprasthaṃ tadā hutvā sopavāso jitendriyaḥ //
na durgatimavāpnoti nātra kāryā vicāraṇā

tadviṣṇoḥ paramaṃ padaṃ homamantraḥ prakīrtitaḥ //
pauruṣaṃ ca tā sūktaṃ śrīsūktena ca saṃyutama

homaḥ kāryo'tha rājendra sāvitryā ca yatātmanā //
etatproktaṃ dvijātīnāṃ strīśūdreṣu tathā śṛṇu

dvādaśāṣṭākṣaro maṃtrasteṣāṃ prokto mahātmanām //
hitau tau ca dvijātīnāṃ mantraśreṣṭhau narādhipa

tābhyāmabhyadhiko mantro vidyate neha kutracit //
vajra uvāca //
dvādaśāṣṭākṣarau mantrau kathayasva mamānagha

puṇyau pavitrau maṅgalyau sarvapāpapraṇāśanau //
mārkaṇḍeya uvāca //
ॐ namo bhagavate vāsudevāya//
ॐ namo nārāyaṇāya

etau mayā te kathitau pavitrau mantrottamau pāpaharau vareṇyau //
pārāyaṇau sarvatapasvināṃ ca rahasyabhūtau bhuvaneṣu nityam

yathā tithiste śravaṇena yuktā māghasya māsasya tathā tavoktā //
kāryā tatheyaṃ nṛpate viśeṣādyoge pavitre saritordvayasya

iti śrīviṣṇudharmottare prathamakhaṇḍe mārkaṇḍeyavajrasaṃvāde tiladvādaśīpraśaṃsāvarṇanaṃ nāma triṣaṣṭyadhika śatatamo'dhyāyaḥ