વિષ્ણુધર્મોત્તરપુરાણમ્ · અધ્યાય 1.163

વજ્ર ઉવાચ॥
એકામુપોષ્ય કૃષ્ણાં યાં દ્વાદશીં વિધિના નરઃ ॥
મહત્ફલમવાપ્નોતિ તાં સમાચક્ષ્વ ભાર્ગવ

માર્કણ્ડેય ઉવાચ ॥
પૌષ્યાન્તુ સમતીતાયાં શ્રવણેન તુ સંયુતા ॥
દ્વાદશી યા ભવેત્કૃષ્ણા પ્રોક્તા સા તિલદ્વાદશી

તિલૈઃ સ્નાનં તિલૈર્હોમં નૈવેદ્યં તિલમોદકૈઃ ॥
દીપાશ્ચ તિલતૈલેન તથા દેયં તિલોદકમ્

તિલાશ્ચ દેયા વિપ્રેભ્યસ્તસ્મિન્નહનિ પાર્થિવ ॥
ઉપવાસદિને રાજન્હોતવ્યાશ્ચ તથા તિલાઃ

ઉપોષિતેનાપરેઽહ્નિ હોતવ્યાશ્ચ વિશેષતઃ ॥
ઇન્ધનં ચ પ્રદાતવ્યં બ્રાહ્મણેભ્યસ્તથાઽનઘ

તિલપ્રસ્થં તદા હુત્વા સોપવાસો જિતેન્દ્રિયઃ ॥
ન દુર્ગતિમવાપ્નોતિ નાત્ર કાર્યા વિચારણા

તદ્વિષ્ણોઃ પરમં પદં હોમમન્ત્રઃ પ્રકીર્તિતઃ ॥
પૌરુષં ચ તા સૂક્તં શ્રીસૂક્તેન ચ સંયુતમ

હોમઃ કાર્યોઽથ રાજેન્દ્ર સાવિત્ર્યા ચ યતાત્મના ॥
એતત્પ્રોક્તં દ્વિજાતીનાં સ્ત્રીશૂદ્રેષુ તથા શૃણુ

દ્વાદશાષ્ટાક્ષરો મંત્રસ્તેષાં પ્રોક્તો મહાત્મનામ્ ॥
હિતૌ તૌ ચ દ્વિજાતીનાં મન્ત્રશ્રેષ્ઠૌ નરાધિપ

તાભ્યામભ્યધિકો મન્ત્રો વિદ્યતે નેહ કુત્રચિત્ ॥
વજ્ર ઉવાચ ॥
દ્વાદશાષ્ટાક્ષરૌ મન્ત્રૌ કથયસ્વ મમાનઘ

પુણ્યૌ પવિત્રૌ મઙ્ગલ્યૌ સર્વપાપપ્રણાશનૌ ॥
માર્કણ્ડેય ઉવાચ ॥
ૐ નમો ભગવતે વાસુદેવાય॥
ૐ નમો નારાયણાય

એતૌ મયા તે કથિતૌ પવિત્રૌ મન્ત્રોત્તમૌ પાપહરૌ વરેણ્યૌ ॥
પારાયણૌ સર્વતપસ્વિનાં ચ રહસ્યભૂતૌ ભુવનેષુ નિત્યમ્

યથા તિથિસ્તે શ્રવણેન યુક્તા માઘસ્ય માસસ્ય તથા તવોક્તા ॥
કાર્યા તથેયં નૃપતે વિશેષાદ્યોગે પવિત્રે સરિતોર્દ્વયસ્ય

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે તિલદ્વાદશીપ્રશંસાવર્ણનં નામ ત્રિષષ્ટ્યધિક શતતમોઽધ્યાયઃ