Vishnudharmottara Purana · Chapter 1.161

vajra uvāca //
upavāsāsamarthānāṃ śuklapakṣe dvijottama //
ekā yā dvādaśī puṇyā tāṃ vadasva mamānagha

mārkaṇḍeya uvāca //
māsi bhādrapade śuklā dvādaśī śravaṇānvitā//
mahatī dvādaśī jñeyā upavāse mahāphalā

saṅgame saritoḥ puṇye dvādaśīṃ tāmupoṣitaḥ //
ayatnādevamāpnoti dvādaśadvādaśīphalam

budhaśravaṇasaṃyuktā saiva ceddvādaśī bhavet //
atyantamahatī yasyāṃ sarvaṃ kṛtamathākṣayam

dvādaśī śravaṇopetā yadā bhavati pārthiva ///
saṅgame tu tadā snātvā sattīrthasnānajaṃ phalam

sopavāsaḥ samāpnoti nātra kāryā vicāraṇā //
vāridhānīṃ tadā dattvā jalapūrṇāṃ dvijātaye

channāṃ vastrayutāṃ rājañchatropānahasaṃyutām //
svargalokamavāpnoti kulamuddharati svakam

svargaṃ samāsādya ciraṃ ca bhogānbhuktvā mahendropama devatulyān //
mānuṣyamāsādya bhavatyarogo dhanānvito dharmaparo manasvī

iti śrīviṣṇudharmottare prathamakhaṇḍe mārkaṇḍeyavajrasaṃvāde śrāvaṇādvādaśīpraśaṃsāvarṇanaṃ nāmaikaṣaṣṭyadhikaśatatamo'dhyāyaḥ