Vishnudharmottara Purana · Chapter 1.160

vajra uvāca //
kevalaṃ kṛṣṇapakṣasya dvādaśīṣu janārdanam //
kadāprabhṛti dharmajña vidhinā kena cārcayet

mārkaṇḍeya uvāca //
mārgyāṃ tu samatītāyāṃ dvādaśī yā bhavennṛpa //
tataḥ prabhṛti kartavyaṃ vratamevamupoṣitaḥ

dvādaśīṣu ca kṛṣṇāsu nāma kṛṣṇasya kīrtayet //
tenaiva nāmnā kartavyau japahomau tathaiva ca

tilairnivedanaṃ kāryaṃ homaḥ kāryastathā tilaiḥ //
pauṣyāṃ tu samatītāyāṃ kṛṣṇā yā dvādaśī bhavet

tasyāṃ vratāvasāne tu tilāndadyāddvijātiṣu //
suvarṇaṃ ca mahīpāla raktavastraṃ tathaiva ca

samvatsaramidaṃ kṛtvā vrataṃ manujapuṅgava //
tiryagyoniṃ na cāpnoti svargalokaṃ ca gacchati

yāvajjīvaṃ vratamidaṃ yaḥ karoti samāhitaḥ //
na sa dukhaṃ samāpnoti narakaṃ na narādhipa

yatra vaitaraṇī durgā kṣuradhārāśca parvatāḥ //
pāpānāṃ yātanā yatra tatrāsau na gamiṣyati

yasyāṃ gaṇāḥ bhīmabalā mahogrā daṃṣṭrākarālā vikaṭograveṣāḥ //
vidrāvaṇāḥ pāpakṛtāṃ narāṇāṃ na yena tasyā nṛpa yanti mārgam

iti śrīviṣṇudharmottare prathamakhaṇḍe mārkaṇḍeyavajrasaṃvāde pratikṛṣṇapakṣadvādaśīvidhirnāma ṣaṣṭyadhikaśatatamo'dhyāyaḥ