વિષ્ણુધર્મોત્તરપુરાણમ્ · અધ્યાય 1.160

વજ્ર ઉવાચ ॥
કેવલં કૃષ્ણપક્ષસ્ય દ્વાદશીષુ જનાર્દનમ્ ॥
કદાપ્રભૃતિ ધર્મજ્ઞ વિધિના કેન ચાર્ચયેત્

માર્કણ્ડેય ઉવાચ ॥
માર્ગ્યાં તુ સમતીતાયાં દ્વાદશી યા ભવેન્નૃપ ॥
તતઃ પ્રભૃતિ કર્તવ્યં વ્રતમેવમુપોષિતઃ

દ્વાદશીષુ ચ કૃષ્ણાસુ નામ કૃષ્ણસ્ય કીર્તયેત્ ॥
તેનૈવ નામ્ના કર્તવ્યૌ જપહોમૌ તથૈવ ચ

તિલૈર્નિવેદનં કાર્યં હોમઃ કાર્યસ્તથા તિલૈઃ ॥
પૌષ્યાં તુ સમતીતાયાં કૃષ્ણા યા દ્વાદશી ભવેત્

તસ્યાં વ્રતાવસાને તુ તિલાન્દદ્યાદ્દ્વિજાતિષુ ॥
સુવર્ણં ચ મહીપાલ રક્તવસ્ત્રં તથૈવ ચ

સમ્વત્સરમિદં કૃત્વા વ્રતં મનુજપુઙ્ગવ ॥
તિર્યગ્યોનિં ન ચાપ્નોતિ સ્વર્ગલોકં ચ ગચ્છતિ

યાવજ્જીવં વ્રતમિદં યઃ કરોતિ સમાહિતઃ ॥
ન સ દુખં સમાપ્નોતિ નરકં ન નરાધિપ

યત્ર વૈતરણી દુર્ગા ક્ષુરધારાશ્ચ પર્વતાઃ ॥
પાપાનાં યાતના યત્ર તત્રાસૌ ન ગમિષ્યતિ

યસ્યાં ગણાઃ ભીમબલા મહોગ્રા દંષ્ટ્રાકરાલા વિકટોગ્રવેષાઃ ॥
વિદ્રાવણાઃ પાપકૃતાં નરાણાં ન યેન તસ્યા નૃપ યન્તિ માર્ગમ્

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે પ્રતિકૃષ્ણપક્ષદ્વાદશીવિધિર્નામ ષષ્ટ્યધિકશતતમોઽધ્યાયઃ