Vishnudharmottara Purana · Chapter 1.159

// vajra uvāca // //
bhagavañchrotumicchāmi dvādaśīṣu pṛthakpṛthak //
upoṣya ki phalaṃ loke śuklapakṣe vidhīyate

anekajanmasāhasrairyeṣāṃ pāpaṃ kṣaya gatam //
akāmāste pravartante devadevārcane narāḥ

mārkaṇḍeya uvāca //
dvādaśyāṃ mārgaśīrṣasya śuklapakṣe upoṣitaḥ //
nāmnā keśavamabhyarcya vahniṣṭomaphalaṃ labhet

nārāyaṇaṃ tathābhyarcya pauṣe māse jagatpatim //
atyagniṣṭomamāpnoti nātra kāryā vicāraṇā

māghe mādhavamabhyarcya dvādaśābdaphalaṃ labhet //
govindaṃ phālgune māsi pūjayitvā mahī dhara

atirātrasya yajñasya phalaṃ prāpnotyasaṃśayam //
caitre viṣṇumathābhyarcya vājapeyaphalaṃ labhet

dvādaśyāṃ māsi vaiśākhe sampūjya madhusūdanam //
gosavasya tu yajñasya phalaṃ prāpnotyanuttamam

jyeṣṭhe māse tathābhyarcya devadevaṃ trivikramam //
puṇḍarīkasya yajñasya phalaṃ vindati mānavaḥ

āṣāḍhe vāmanaṃ devaṃ pūjayitvā jagatpatim //
kṣiprameva samāpnoti yajñaṃ bahusuvarṇakam

śrīdharaṃ śrāvaṇe māsi pūjayitvā maheśvaram //
vaiṣṇavasya tu yajñasya phalaṃ vindatyasaṃśayam

māse bhādrapade devaṃ hṛṣīkeśaṃ samarcayan //
aśvamedhamavāpnoti kulaṃ caiva samuddharet

āśvine māsi saṃprāpte padmanābhaṃ samarcayan //
rājasūyamavāpnoti nātra kāryā vicāraṇā

dāmodaramathābhyarcya kārtike māsi yādava //
sarvamedhamavāpnoti svargalokaṃ ca gacchati

māsoktena sadā nāmnā śuklapakṣe hyupoṣitaḥ //
dvādaśīṣu sadā kuryājjapyahomānsamāhitaḥ

saṃvatsarānte dātavyaṃ ghṛtapūrṇaṃ ca bhājanam //
kāṃsyasya vainateyaṃ ca rukmapatraniveśitam

kramopavāsatastvete proktā yajñaphalā nṛpa //
pūrṇaṃ saṃvatsaraṃ kṛtvā vratametannarādhipa

svargalokamavāpnoti kulaṃ caiva samuddharet //
devarāmāgaṇasthena vīṇāgurujanādinā

haṃsasārasayuktena vimānenārkavarcasā //
kiṅkiṇīśataghoṣeṇa viharatyamaraprabhaḥ

yāvajjīvaṃ naraḥ kuryādvratametatsamāhitaḥ //
śvetadvīpamavāpnoti yatra candraprabhā narāḥ

caturbhujā mahāsattvā nityatṛptāḥ sugandhinaḥ //
aniṣyandā nirāhārāḥ sarvajñāḥ sarvadarśinaḥ

tatroṣya kālaṃ suciraṃ narendra bhittvārkabimbaṃ sahasā prayāti //
sthānaṃ puro devavarasya viṣṇornityasya tasyānagha sarvagamya

iti śrīviṣṇudharmottare prathamakhaṇḍe mārkaṇḍeyavajrasaṃvāde śuklapakṣadvādaśīvidhirnāmaikonaṣaṣṭyadhika śatatamo'dhyāyaḥ