Vishnudharmottara Purana · Chapter 1.16

// mārkaṇḍeya uvāca //
bhāratasyāsya varṣasya bhāge'sminnavame nṛpa! //
samudro vālukāpūrṇa ujjānaka iti śrutiḥ

tasya madhye samudrasya dhundhuprasthapateḥ sadā //
saṃvatsarasya sonte tu mahocchvāsaṃ pramuñcati

yadā tadā bhūḥ skhalati saśailavanakānanā/
prāṇino ye'lpasattvāśca te yānti yamasādanam

yadā vibuddho bhavati kiñciccheṣā mahī tadā //
āhārārthaṃ karotyugraḥ pāpātmā jalarākṣasaḥ

etasminneva kāle tu cottaṅkastapyate tapaḥ //
tapasonte mahātmānaṃ dadarśa madhusūdanam

tamuvāca harirdevo varaṃ varaya bhārgava / //
uttaṃkaḥ prāñjalirbhūtvā tuṣṭāva madhusūdanam

uvāca varadaṃ devameṣa eva varo mama //
yadahaṃ devadevasya dṛṣṭavāṃścaraṇāmbujau

śrībhagavānuvāca //
avaśyaṃ te varo deyo mayā bhṛgukulodvaha //
ajaraścāmaraścaiva matprasādādbhaviṣyasi

yatrecchasi jalaṃ tatra bhaviṣyati tathā tava //
devatānāṃ mahatkāryaṃ tathaiva ca kariṣyasi

āśramasyāsya te bādhāṃ yaḥ karoti sadānagha //
kuvalāśvena taṃ gatvā dhuṃdhu ghātaya mā ciram

ahaṃ cāsya pravekṣyāmi kuvalāśvasya vigraham //
tejasā sa madīyena dhuṃdhumājau haniṣyati

na hyalpatejasā hantuṃ dhuṃdhuḥ śakyo bhṛgūttama //
mārkaṇḍeya uvāca //
etāvaduktvā bhagavān gato'ntardhānamīśvaraḥ

jagāma ca tathāyodhyāmuttaṃko'pi mahātapāḥ //
pūjito bṛhadaśvena bṛhadaśvamabhāṣata

utaṅka uvāca //
kathaṃ nidrāsi rājendra sukhaṃ paryaṅkamāsthitaḥ //
dhundhoścaritamālokya baddhakakṣo bhavādhunā

vacanānmama rājendra dhuṃdhuṃ hantuṃ tavāsti bhoḥ //
śaktiḥ kimudyamādrājñāṃ duṣkaraṃ te punaḥ katham

jahi dhuṃdhuṃ mahākāyaṃ nṛpate dvijabādhakam //
śrutvā munivaco rājā kuvalāśvamabhāṣata

ahaṃ vanapravṛttastu tyaktadaṇḍastathaiva ca //
jahi taṃ dānavaśreṣṭhaṃ tvamuttaṅkena pālitaḥ

evamuktaḥ pariṣvaktaḥ pitrā prakṛtivatsalaḥ //
uttaṅkasahito gatvā yuddhāyodakarākṣasam

yuyudhe taṃ ca dharmātmā dhuṃdhuṃ tenaiva keśavaḥ //
utaṅkānumate paścādbrahmāstreṇa jaghāna tam

hatvā taṃ rākṣasaṃ lebhe tridaśebhyastadā varān //
kṛṣṇe bhaktiṃ sthitiṃ dharme vāsaṃ svarge tathākṣayam

madhukaiṭabhayoḥ putraṃ ghātayitvā narādhipa //
dhundhumāratvamagamadaśobhata tathā purīm

tasminhate daityavare prasannā diśo babhūvurmuditāśca devāḥ //
vinaṣṭavighnaṃ ca jagattadāsa rājā ca kīrtiṃ paramāmavāpa

iti śrīviṣṇudharmottare prathamakhaṇḍe mārkaṇḍeyavajrasaṃvāde dhuṃdhumāropākhyānaṃ nāma ṣoḍaśo'dhyāyaḥ