Vishnudharmottara Purana · Chapter 1.15

// mārkaṇḍeya uvāca //
ikṣvākorabhavatputro vikukṣirnnāma dhārmikaḥ //
kakutsthastanayastasya cānenāstasya cātmajaḥ

tasya putraḥ pṛthuḥ śrīmān viśvadāsastadātmajaḥ //
tasya śrāvastako nāma śrāvastī yena nirmitā

bṛhadaśvaḥ sutastasya kuvalāśvastadātmajaḥ //
kuvalāśvo mahātejā dhundhumāratvamāgataḥ //
dhuṃdhuṃ hatvā mahākāyamudake jalarākṣasam

vajra uvāca //
kathaṃ dhuṃdhurmahātejāḥ kuvalāśvena ghātitaḥ //
kaścāyaṃ dhuṃdhurityeṣa viśruto jalarākṣasaḥ

mārkaṇḍeya uvāca //
ekārṇave purā loke naṣṭasthāvarajaṅgame

naṣṭacandrārkapavane vinaṣṭagrahatārake //
śeṣaparyaṅkamāsādya supto devo janārdanaḥ

nābhau tasya samutpannaṃ devasya kamalaṃ śubham //
tatra jajñe svayaṃ brahmā devaḥ śubhacaturmukhaḥ

tatrāste so'bhyasanvedānsupte deve janārdane //
upāsāṃcakrire tasya vedā dehabhṛtastathā

vedābhyāsarate tatra svedabindurajāyata //
sapadmapatramāsādya dvidhābhūtobhavannṛpa

rajastamomayau tasmājjātau daityau balotkaṭau //
madhukaiṭabhanāmānau mahābalaparākramau

tatastau jahraturvedānbrahmaṇaḥ pāpaniścayau //
saśarīreṣu vedeṣu hateṣvatha pitāmahaḥ

bodhayāmāsa deveśaṃ padmanābhaṃ sa cānaghaḥ //
sa vibuddhastadā devaḥ kṛtvā hayaśirodharam

śaśāṅkaśatasaṃkāśaṃ nānābharaṇaśobhitam //
dvitīyena śarīreṇa rasātalatalaṃ gataḥ

tenāśvaśirasā gatvā vedānādāya śāśvatān //
pitāmahāya pradadau bhūya eva jagadguruḥ

tato hayaśirodhārī gatontardhānamīśvaraḥ //
ājagmatustato deśaṃ dānavau madhukaiṭabhau

viṣṇuścakāra dehau dvau viṣṇurjiṣṇu riti smṛtau //
madhunā yuyudhe jiṣṇurviṣṇurvai kaiṭabhena ca

tatastayoḥ suyuddhena tuṣṭo devo janārdanaḥ //
uvāca tau mahākāyau dānavau madhu kaiṭabhau

varaṃ varayatāṃ śreṣṭhaṃ bhavantāvaparājitau //
tāvabrūtāṃ tato devaṃ viṣṇuṃ kamalalocanam

putro'smākaṃ bhaveddeva mahābalaparākramaḥ //
putre jāte tu yau tau dvau viṣṇunā jiṣṇunā purā

nihatau ca tadā vīrau hyudakaṃ ca samāśritau //
medo mumucatustatra vyāptā yenābhavanmahī //

medinīti tataḥ khyātā loke'smiṃstattvacintakaiḥ //
varāharūpeṇa tadā coddhṛtā vasudhā tataḥ

tenaiva devadevena pūrvasthāne nive śitā //
sargaṃ cakre tato brahmā devadevasya śāsanāt

evaṃ tadā devavarasya yuddhe nipātitau tau madhukaiṭabhākhyau //
devasya viṣṇoḥ sadanaṃ prayātau kṣīrārṇave tasya samīpagau ca

iti śrīviṣṇudharmottare prathamakhaṇḍe mārkaṇḍeyavajrasaṃvāde madhukaiṭabhavadhopākhyānaṃ nāma pañcadaśo'dhyāyaḥ