Vishnudharmottara Purana · Chapter 1.17

// mārkaṇḍeya uvāca //
dhuṃdhumārāddṛḍhāśvastu haryaśvastasya cātmajaḥ //
nikuṃbhastasya tanayaḥ suhitaśca tadātmajaḥ//////
bhṛśāśvastanayastasya māndhātā tasya cātmajaḥ//
daivena vidhinā rājā jātastasyaiva codarāt

purukutsaḥ sutastasya trasaddasyustadātmajaḥ //
śambhustasyātmajaḥ śrīmānanaraṇyeti viśrutaḥ

rāvaṇena hato yo'sau trilokavijayī purā //
dṛśadaśvaḥ sutastasya tasmādvasumanā nṛpaḥ

tasya putrastridhanvākhyaḥ tasmāttryyāraṇiḥ smṛtaḥ //
tasya satyavrataḥ putraḥ triśaṅkuṃ yaṃ pracakṣate

hariścandraḥ sutastasya rohitāśvastadātmajaḥ //
haritastatsuto rājā cañcurhārita ucyate

vijayastasya tanayaścālarkastasya cātmajaḥ //
alarkasya vṛkaḥ putrastasmādbāhustu jajñivān

pānastrīmṛgayākṣeṣu sa bahuvyasanānvitaḥ //
vyasane tasya saktasya narendrasyāribhistadā

haihayaistālajaṅghaiśca sarvamlecchagaṇāvṛtaiḥ //
chalenāpahṛtaṃ rājyaṃ hṛtarājyo vanaṃ gataḥ

padbhyāmanuyayau tasya vanaṃ bhāryā guṇānvitā //
gurviṇī prāgdadau yasyāḥ sapatnī tu garaṃ kila //1.17.१ ०//
tatassā sagaraṃ putraṃ suṣāva vanagā śubhā //
jātaputro narapatiḥ saṃyuktaḥ kālakarmaṇā

anvāruroha taṃ rājñī yādavī dharmavatsalā//
saṃskṛtaḥ sarvasaṃskāraiḥ sagaraścyavanena ca

śāstragrāme dhanurvede nītaḥ pāraṃ tathā param//
sa yauvanamanuprāpya eka eva narādhipaḥ

padātirbaddhanistriṃśaścyavanasya prasādataḥ //
haihayāṃstālajaṅghāṃśca nijaghāna parantapaḥ

tatastvayodhyāṃ saṃprāpya lebhe rājyamakaṃṭakam//
sagaro rājyamāsādya balena caturaṅgiṇā

vijitya sakalānmlecchānvaśaṃ cakre ca pārthivān //
vijitya pṛthivīṃ kṛtsnāṃ prāpya rājyamakaṇṭakam

cyavanaṃ pūjayāmāsa satkāreṇa punaḥpunaḥ //
cyavanenābhyanujñātaḥ sa cakre dārasaṃgraham

āsīdbhāryādvayaṃ tasya sagarasya mahātmanaḥ //
sa tābhyāṃ sahito rājā putrārthaṃ taptavāṃstapaḥ

tapasonte haraḥ prāha rājānaṃ tapasā kṛśam //
ekaṃ vaṃśakaraṃ putramekā te janayiṣyati

ṣaṣṭiḥ putrasahasrāṇi dvitīyā janayiṣyati //
evaṃ labdhavaro rājā sabhāryaḥ svapuraṃ gataḥ

putraṃ putrāṃśca dharmāpmā janayāmāsa vīryavān //
karmaṇā caiva nāmnā ca rājaputro'samañjasaḥ

pitrā vivāsito rājyātpaurāṇāmahite rataḥ//
tasya putroṃśumānnāma sarvaiḥ samudito guṇaiḥ //
toṣayāmāsa pitaraṃ pituḥ pṛthvīpatiṃ ca saḥ

pautreṇa tenānaghaḥ sevyamānaḥ putrairmahāvīryaparākramaiśca //
sa rañjayanrājavaro jitāriḥ śaśāsa pṛthvīṃ sakalāṃ mahātmā

iti śrīviṣṇudharmottare prathamakhaṇḍe mārkaṇḍeyavajrasaṃvāde sagaropākhyānaṃ nāma saptadaśo'dhyāyaḥ