વિષ્ણુધર્મોત્તરપુરાણમ્ · અધ્યાય 1.159

॥ વજ્ર ઉવાચ ॥ ॥
ભગવઞ્છ્રોતુમિચ્છામિ દ્વાદશીષુ પૃથક્પૃથક્ ॥
ઉપોષ્ય કિ ફલં લોકે શુક્લપક્ષે વિધીયતે

અનેકજન્મસાહસ્રૈર્યેષાં પાપં ક્ષય ગતમ્ ॥
અકામાસ્તે પ્રવર્તન્તે દેવદેવાર્ચને નરાઃ

માર્કણ્ડેય ઉવાચ ॥
દ્વાદશ્યાં માર્ગશીર્ષસ્ય શુક્લપક્ષે ઉપોષિતઃ ॥
નામ્ના કેશવમભ્યર્ચ્ય વહ્નિષ્ટોમફલં લભેત્

નારાયણં તથાભ્યર્ચ્ય પૌષે માસે જગત્પતિમ્ ॥
અત્યગ્નિષ્ટોમમાપ્નોતિ નાત્ર કાર્યા વિચારણા

માઘે માધવમભ્યર્ચ્ય દ્વાદશાબ્દફલં લભેત્ ॥
ગોવિન્દં ફાલ્ગુને માસિ પૂજયિત્વા મહી ધર

અતિરાત્રસ્ય યજ્ઞસ્ય ફલં પ્રાપ્નોત્યસંશયમ્ ॥
ચૈત્રે વિષ્ણુમથાભ્યર્ચ્ય વાજપેયફલં લભેત્

દ્વાદશ્યાં માસિ વૈશાખે સમ્પૂજ્ય મધુસૂદનમ્ ॥
ગોસવસ્ય તુ યજ્ઞસ્ય ફલં પ્રાપ્નોત્યનુત્તમમ્

જ્યેષ્ઠે માસે તથાભ્યર્ચ્ય દેવદેવં ત્રિવિક્રમમ્ ॥
પુણ્ડરીકસ્ય યજ્ઞસ્ય ફલં વિન્દતિ માનવઃ

આષાઢે વામનં દેવં પૂજયિત્વા જગત્પતિમ્ ॥
ક્ષિપ્રમેવ સમાપ્નોતિ યજ્ઞં બહુસુવર્ણકમ્

શ્રીધરં શ્રાવણે માસિ પૂજયિત્વા મહેશ્વરમ્ ॥
વૈષ્ણવસ્ય તુ યજ્ઞસ્ય ફલં વિન્દત્યસંશયમ્

માસે ભાદ્રપદે દેવં હૃષીકેશં સમર્ચયન્ ॥
અશ્વમેધમવાપ્નોતિ કુલં ચૈવ સમુદ્ધરેત્

આશ્વિને માસિ સંપ્રાપ્તે પદ્મનાભં સમર્ચયન્ ॥
રાજસૂયમવાપ્નોતિ નાત્ર કાર્યા વિચારણા

દામોદરમથાભ્યર્ચ્ય કાર્તિકે માસિ યાદવ ॥
સર્વમેધમવાપ્નોતિ સ્વર્ગલોકં ચ ગચ્છતિ

માસોક્તેન સદા નામ્ના શુક્લપક્ષે હ્યુપોષિતઃ ॥
દ્વાદશીષુ સદા કુર્યાજ્જપ્યહોમાન્સમાહિતઃ

સંવત્સરાન્તે દાતવ્યં ઘૃતપૂર્ણં ચ ભાજનમ્ ॥
કાંસ્યસ્ય વૈનતેયં ચ રુક્મપત્રનિવેશિતમ્

ક્રમોપવાસતસ્ત્વેતે પ્રોક્તા યજ્ઞફલા નૃપ ॥
પૂર્ણં સંવત્સરં કૃત્વા વ્રતમેતન્નરાધિપ

સ્વર્ગલોકમવાપ્નોતિ કુલં ચૈવ સમુદ્ધરેત્ ॥
દેવરામાગણસ્થેન વીણાગુરુજનાદિના

હંસસારસયુક્તેન વિમાનેનાર્કવર્ચસા ॥
કિઙ્કિણીશતઘોષેણ વિહરત્યમરપ્રભઃ

યાવજ્જીવં નરઃ કુર્યાદ્વ્રતમેતત્સમાહિતઃ ॥
શ્વેતદ્વીપમવાપ્નોતિ યત્ર ચન્દ્રપ્રભા નરાઃ

ચતુર્ભુજા મહાસત્ત્વા નિત્યતૃપ્તાઃ સુગન્ધિનઃ ॥
અનિષ્યન્દા નિરાહારાઃ સર્વજ્ઞાઃ સર્વદર્શિનઃ

તત્રોષ્ય કાલં સુચિરં નરેન્દ્ર ભિત્ત્વાર્કબિમ્બં સહસા પ્રયાતિ ॥
સ્થાનં પુરો દેવવરસ્ય વિષ્ણોર્નિત્યસ્ય તસ્યાનઘ સર્વગમ્ય

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે શુક્લપક્ષદ્વાદશીવિધિર્નામૈકોનષષ્ટ્યધિક શતતમોઽધ્યાયઃ