Vishnudharmottara Purana · Chapter 1.157

// vajra uvāca //
dvādaśīṣu kathaṃ viṣṇuḥ sopavāsena pūjitaḥ //
rājyapradaḥ syāddharmajña tanme tvaṃ brūhi tattvataḥ

paśya rājyasya māhātmyaṃ yatra dharmasakhāvubhau //
śṛṇu tasya ca dharmasya phalabhāgdhārmiko nṛpaḥ

brahmacārī gṛhasthaśca vānaprastho'tha bhikṣukaḥ //
rājñā saṃrakṣitāḥ sarve śakyā dharmaṃ niṣevitum

mānuṣeṇa śarīreṇa rājā devavapurdharaḥ //
kṣattriyo'pi sadā pūjyo brāhmaṇānāṃ mahātmanām

vinā rājyaṃ hi yā lakṣmīḥ paratantrā hi sā matā //
tasmādrājyaṃ praśaṃsanti tatrājñā na vihanyate

tulyadhātuśarīrāṇāṃ tulyāvayavajīvinām //
narendrāṇāṃ narairbrahmandevavadbhuvi manyate

rājyadāṃ dvādaśīṃ tasmādvaktumarhati me bhavān //
yāmupoṣya mahadrājyaṃ prāpnuyātsa tu vai dvijaḥ

mārkaṇḍeya uvāca //
śṛṇuṣvāvahito rājanrājyadāṃ dvādaśīṃ śubhām //
yāmupoṣya naro loke rājyamāpnotyakaṇṭakam

mārgaśīrṣasya māsasya śuklapakṣe narādhipa //
daśamyāṃ prayataḥ kṛtvā snānamabhyaṅgapūrvakam

upavāsasya saṃkalpaṃ śvobhūtasya tu kārayet //
devāgāre kuśāstīrṇāmekavastrottaracchadām //1.157.१ ०//
adhyāsīta mahīṃ tatra tāṃ rātriṃ prayato nayet //
dvitīye'hni tataḥ kuryādbahiḥ snānamatandritaḥ

pūjanaṃ devadevasya sarvaṃ śuklena kārayet //
karpūraṃ candanaṃ deyaṃ mallikā śvetayūthikā

jātyā ca śuklā rājendra dhūpe karpūrameva ca //
ghṛtena dīpā dātavyā śuklavartisamanvitā /

ghṛtaudanaṃ dadhi kṣīraṃ paramānnaṃ tathaiva ca //
ikṣumikṣuvikārāṃśca devadeve nivedayet

kālodbhavaṃ mūlaphalaṃ varṇaṃ tatra na cintayeta //
yathālābhena taddeyaṃ śuklaṃ cetsyādviśeṣataḥ

havanaṃ ca tataḥ kāryaṃ paramānnena pārthiva //
tadviṣṇoḥ paraṃ ityevaṃ homamantro vidhīyate

dvādaśākṣarakaṃ mantraṃ strīśūdrasya vidhīyate //
tato'gnihavanaṃ kṛtvā śaktyā sampūjya ca dvijān

sitaraṃgena kartavyā bhūmiśobhā surālaye //
rātrau jāgaraṇaṃ kāryaṃ gīta nṛtyaṃ ca pārthiva

karmaṇā caiva devasya kartavyaṃ śravaṇaṃ tathā //
dvādaśyāṃ vidhinā'nena bhūyaḥ pūjyo janārdanaḥ ///

rājaliṅgaṃ pradātavyamekaṃ viprāya dakṣiṇā //
tatastu paścādbhoktavyaṃ haviṣyaṃ pārthivottama

ekādaśī yathā madhye snānayorantare nṛpa //
kaṣṭaṃ maunaṃ tu kartavyaṃ japyaṃ kāryaṃ tu mānasam

dvādaśīṣveva śuklāsu sarvāsvevāviśeṣataḥ //
vidhistavāyaṃ nirdiṣṭaḥ kṛṣṇāsveva ca kārayet

viśeṣaṃ te pravakṣyāmi tanme nigadataḥ śṛṇu //
raktavarṇena kartavyā devapūjā yathāvidhi

raktaṃ ca deyaṃ naivedyaṃ puṣpagandhānulepanam //
tilatailena dīpāśca mahārañjanarañjitāḥ

dīpeṣu vartayo deyā homaḥ kāryastathā tilaiḥ //
bhūmiśobhā ca kartavyā raktairbhūpālavarṇakaiḥ

anena vidhinā kṛtvā rājansaṃvatsaraṃ tataḥ //
kārtikyāṃ samatītāyāṃ kṛṣṇā yā dvādaśī bhavet

vratāvasāne tasyāṃ tu mahāvartiṃ tu dāpayet //
vāsasā ca samagreṇa tulayā ca ghṛtasya vai

brāhmaṇāya pradātavyā dhenuḥ kāṃsyopadohanā //
hemaśṛṅgrī raupyakhurā muktālāṃgūlabhūṣitā

vastrottarīyā dātavyā śaktyā draviṇasaṃyutā //
saṃvatsareṇa rājā syānnaraḥ parvatagahvare

tribhiḥ saṃvatsaraiḥ pūrṇairjāyate saphalaṃ tataḥ //
tathā dvādaśabhiḥ pūrṇe rājā bhavati pārthivaḥ

rājyapradā te'bhihitā mayaiṣā sudvādaśī pāpaharā variṣṭhā //
upoṣya yāṃ bhūmitale narendro bhavatyajeyaśca raṇe'risaṃghaiḥ

iti śrīviṣṇudharmottare prathamakhaṇḍe mārkaṇḍeyavajrasaṃvāde rājyapradadvādaśīvidhirnāma saptapañcāśadadhikaśatatamo'dhyāyaḥ