Vishnudharmottara Purana · Chapter 1.156

// purūravā uvāca //
bhagavansarvadharmajña pitāmaha mahādyute //
gurutvaṃ me vrate tasminkartumarhasi mānada

vratāvasāne ca tathā sāmagryaṃ dvijapuṅgava //
evaṃ śakyosmyaraṇyesminkartuṃ brahmanmahadvratam

atriruvāca // tava prasādaṃ bhagavānsarvātmā madhusūdanaḥ //
kurute'haṃ kariṣyāmi gurutvamaparājitaḥ

vratāvasāne ca tathā sāmagryaṃ dvijapuṅgavaiḥ //
kāmāssannihitāścānyairdeśe'sminnṛpa sarvadā

mārkaṇḍeya uvāca //
evamuktvā sa dharmātmā saptame ca dine tadā //
jyeṣṭhāyāṃ saptamīyoge grāhayāmāsa taṃ vratam

pādarkṣāttu prabhṛtyevamṛkṣeṛkṣe narādhipaḥ //
kārayāmāsa devasya kathitāṅgādipūjanam

snānaṃ nakṣatranirdiṣṭaṃ nakṣatrasya ca pūjanam //
nakṣatradaivatasyāpi somasya varuṇasya ca

pūjanaṃ ca tathā viṣṇordevadevasya cakriṇaḥ //
homaṃ tathaiva sarveṣāṃ yathāvanmanujeśvara

māghaśuklamaghāṃ prāpya dvādaśīṃ ca tathā tithim //
atrirvratāvasāne tamāgato brāhmaṇaiḥ saha

vratāvasāne saṃpūjya kethavāṅgārcisomajāna //
rājyaṃ nivedayāmāsa so'treḥ sakalameva hi

pratigṛhya ca tadrājyaṃ tasmādvai mantravinnṛpa //
bhūyaḥ prādātsa tasyaiva vacanañcedamabravīt

na me rājyena kartavyaṃ kiñcidevāsti pārthiva //
na dhanena na kāmena yājitā dhruvayājñiyāḥ

samatvaṃ rājaśārdūla svasti gaccha gṛhānprati //
evamuktvā yayāvatrirantardhānamatheśvaraḥ

sarvairdvijagaṇaiḥ sārdhaṃ tadā gatvā sa pārthivaḥ //
devapuṣkāraṇītoye snātamātro babhūva ha

taptajāmbūnadākāro nīlakuñcitamūrdhajaḥ //
pṛthuvakṣā mahābāhustanukukṣirmahākaṭiḥ

gandharvarājapratimaḥ sarvasattvavaśaṅkaraḥ //
rūpaṃ tu tādṛśaṃ tasya dṛṣṭvā gandharvasattamāḥ

tathaivāpsaraso mukhyā diṣṭyā diṣṭyeti te'buvan //
sabhājya pārthivaṃ tena pūjitāḥ prayayuḥ sukham

nītvā saṃvatsaraṃ tatra pūrṇe saṃvatsaraṃ nṛpaḥ //
devatāṃścāpyathāmantrya pūjayitvā yathāvidhi

tathā puṣkariṇīṃ puṇyāṃ guhāṃ padmasarastathā //
āśramaṃ śailamukhyaṃ ca tathaiva ca vanaspatim

gandharvāpsarasaścaiva prayayau svapuraṃ tataḥ //
uccasaṅgamasamprāptā dṛṣṭo vaiṣayikaistataḥ

stuto devaprasādācca bhaktyā taiścābhinanditaḥ //
sattvaraiśca tathā kaiścidamātyānāṃ niveditaḥ

amātyāścāgataṃ śrutvā labdhakāmaṃ narādhipam //
niryayurnagarāttasmāccaturaṅgabalānvitāḥ

rājñaḥ pratigrahārthaṃ te gaṇamukhyapuraḥsarāḥ //
taiḥ sametya sa rājarṣiryathāvanmanujeśvara

kalpitena gajendreṇa patākādhvajaśobhinā //
praviveśa puraṃ hṛṣṭaḥ śākalaṃ nāma nāmataḥ

rājñaḥ praveśe tatpauraiḥ sitacandanavāriṇā //
bahuvarṇaistathā puṣpaiyathāsthāne vibhūṣitam

candanāgurusārāṇāṃ dhūpanaiḥ surabhīkṛtam //
mahocchritapatākāḍhyaṃ mālyadāmapariṣkṛtam

mālyamodakahastaiśca paurajānapadairyutam //
atīva janasaṃbādhamatīva sumanoharam

prāsādavarasaṃsthāśca gavākṣakagatāstathā //
vedikāsthāśca paśyanti striyastaṃ manmathārditāḥ

sa muṣṇanyoṣitāṃ cittaṃ dṛśaśca manujādhipaḥ //
lājācandanacūrṇaiśca kīryamāṇaḥ samantataḥ

puṣpaiśca strīkaronmuktaiḥ pūryamāṇo narādhipaḥ //
abhigamya ca tatrāsau devatāyatanāṃstataḥ

praviveśa gṛhaṃ śrīmacchāradābhracayopamam //
tatrābhigamanaṃ kṛtvā devatānāṃ yathāvidhi

saṃpūjya brāhmaṇānbhaktyā vividhairdhanasañcayaiḥ //
sabhāsthaṃ sāntvayāmāsa paurajānapadaṃ janam

āśvāsya preṣayāmāsa gṛhānyodhajanaṃ tathā //
janānurāgasaṃyuktastataḥ prabhṛti pārthivaḥ

rājaśāstropadeśena pālayāmāsa medinīm //
reme ca saha rāmābhirgandharvapratimo yuvā

sa tu kālena mahatā rājā pañcatvamāgataḥ //
uvāsa suciraṃ kālaṃ pūjyamānaḥ surottamaiḥ

manvantare hyatīte tu cākṣuṣasya mahātmanaḥ //
vaivasvate'tha samprāpte budhaputratvamāgataḥ

tatra tasya tu yadrūpaṃ saubhāgyādeva viśrutam //
saśarīrasya ca tathā svarloke gamanaṃ nṛpa

svargato'pi sa rājarṣiḥ kṣīṇe vaivasvate'ntare //
praviśyātipuraṃ viṣṇoścandramaṇḍalamadhyagam

etatte sarvamākhyātaṃ karmaṇā yena pārthivaḥ //
avāpa tādṛśaṃ rūpaṃ saubhāgyamapi cottamam

pūjayanti hariṃ devaṃ sāttvikāstu nirāśiṣaḥ //
rājasāḥ kāmakāmāśca krūrakāmāśca tāmasāḥ

hariṃ sampūjya manasā rājasena purūravāḥ //
saptadvīpasamudrāyāṃ pṛthivyāmekarāḍ babhau

svargaṃ sudurlabhaṃ prāpya sthānaṃ prāpsyati śāśvatam //
nāsti viṣṇusamo nātho nāsti viṣṇusamā gatiḥ

nāsti viṣṇusamaṃ trāṇaṃ narasyārtasya bheṣajam //
satkṛtaṃ pūjanaṃ yena kṛtaṃ devasya cakriṇaḥ

ārātrikaṃ kṛtaṃ tena saṃprāptaṃ paramaṃ padam //
yena saṃkīrtitaṃ rājanharirityakṣaradvayam

baddhaḥ parikarastena mokṣāya gaganaṃ prati //
etatte budhaputrasya triṣu janmasu pārthiva //
caritaṃ sakalaṃ proktaṃ yena sampūjito hariḥ

dhanyaṃ yaśasyaṃ ripunāśanaṃ ca saubhāgyadaṃ puṣṭivivardhanaṃ ca //
śrotavyametanniyataṃ ca sadbhirākhyānamūrjaskaramṛddhikāmaiḥ

iti śrīviṣṇudharmottare prathamakhaṇḍe mārkaṇḍeyavajrasamvāde purūravasassvapuragamanaṃ nāma ṣaṭpañcāśadadhikaśatatamo'dhyāyaḥ