Vishnudharmottara Purana · Chapter 1.155

purūravā uvāca//
śrotumicchāmi bhagavanrūpasatraṃ mahāphalam//
yatsamāptau bhaviṣyāmi divyarūpadharo mune

atriruvāca // tatsatraṃ kartukāmena cānveṣyo brāhmaṇo guruḥ //
jyotiṣaṃ yo vijānāti itihāsāṃśca kṛtsnaśaḥ

tatpradiṣṭena vidhinā pādarkṣātprabhṛti kramāt //
upoṣitavyaṃ nakṣatraṃ pratyekaṃ tannibodha me

phālgunyāṃ samatītāyāṃ kṛṣṇapakṣāṣṭamī tu yā //
samūlāṃ tāṃ tu samprāpya vrataṃ gṛhṇīta mānavaḥ

upoṣitavyaṃ nakṣatraṃ nakṣatrasya ca daivatam /
varuṇaṃ ca tathā candraṃ pūjayedvidhinā naraḥ

pūjayeddevadeveśaṃ bhagavantaṃ janārdanam //
upoṣya saṅgaṃ devasya prayatnena ca pūjayet

tato'gnihavanaṃ kṛtvā pūjayitvā tathā gurum //
upavāsastu kartavyo dvitīye'hani pārthiva

upoṣya ṛkṣe vigate snātvā sampūjya keśavam //
kṛtvāgnihavanaṃ śaktyā pūjayitvā dvijottamān

haviṣyamannaṃ bhoktavyaṃ śṛṇu cāṅgakramaṃ mama //
pādayoḥ kathitaṃ mūlaṃ prājāpatyaṃ tu jaṅghayoḥ

āśvinaṃ jānuyugalaṃ coruyugmaṃ ca pārthiva //
sahite dve tathāṣāḍhe guhye ca sahite smṛte

pūrvottare ca phālgunyau kṛttikāsu kaṭirbhavet //
pārśvayoḥ kukṣiyutayornakṣatratritayaṃ matam

ubhe proṣṭhapade rājanrevatī ca tathā bhaveta //
uro'nurādhāsu tathā pṛṣṭhaṃ niṣṭyāsu kīrtitam

bhujau jñeyau viśākhāsu haste proktau tathā karau //
aṅgulyaśca tathā proktā rājasiṃha punarvasau

āśleṣāyāṃ tathā proktā jyeṣṭhāyāṃ nṛpa kandharā //
śravaṇau śravaṇau jñeye mukhaṃ puṣye prakīrtitam

dantāḥ svātau śatabhiṣā hanū proktau tathā nṛpa //
maghāyāṃ nāsikā proktā mṛgaśīrṣe ca locane

citrā lalāṭe vijñeyā bharaṇyaśca tathā śiraḥ //
śiroruhāstathārdrāsu batasyānte narādhipa

māghaśuklāvasāne tu satraṃ parisamāpyate //
yadyantarāyaṃ na bhavetkiñcicchaucanimittajam

antarāyaṃ mahārāja yadi śaucanimittajam //
upoṣyamevopavasennakṣatramaparaṃ punaḥ

kramaprāptaṃ hi nakṣatraṃ cāśuddhyāmapavarjitam //
ullaṅghayanmahīpāla pratyavāyaṃ samaśnute /

/
aṅgakrameṇa sakalamṛkṣavargamupoṣitaḥ//
vratānte prayataḥ snātvā pūjayenmadhusūdanam

candanāgurukarpūramṛgadarpaiḥ sakuṅkumaiḥ //
jātīphalaiḥ sakaṃkolairlavaṅgakusumaistathā

bolaguggulaniryāsaiḥ puṣpaiḥ kālodbhavaiḥ śubhaiḥ //
dhūpo narendrāguruṇā candanena sugandhinā

dīpāśca deyā rājendra tilatailaprapūritāḥ //
dīpeṣu vartayaḥ kāryyā mahārañjanarañjitāḥ

naivedyaṃ ca tathā kāryaṃ paramānnena bhūriṇā //
dadhnā kṣīrāmṛtābhyāṃ ca madhunā ca guḍena ca

sitayā ca tathā bhakṣyaiḥ phalamūlairyathāvidhi//
apūpaiḥ pānakairhṛdyaiḥ śītalaiśca sugandhibhiḥ

lavaṇasya ca pātrāṇi kṛsaraṃ ca nivedayet //
sarvabījāni rājendra bhūṣaṇāni ca śaktitaḥ

mahārhāṇi ca vastrāṇi bhaktyā prayatamānasaḥ //
tadviṣṇoḥ pagmamiti homaḥ kāryo hyanantaram

dvādaśākṣarakaṃ mantraṃ strīśūdreṣu vidhīyate //
ghṛtaṃ mākṣikasaṃyuktaṃ juhuyātttilataṇḍusam

tatastu dakṣiṇā deyā gurave nṛpasattama //
nāgāśca madamattā vai grāmāśca vividhāstathā

turagāśca tathā mukhyā ratnāni vividhāni ca //
brāhmaṇaśca pitā jñeyo rūpasatrapradarśakaḥ

rūpasaubhāgyalāvaṇyajanmabhogapradāyakaḥ //
rājyasya vā dvijatvasya bahuvittasya dāyakaḥ //

na tasya niṣkṛtiḥ śakyā gantuṃ dānena bhūriṇā //
guruprasāda evātra dakṣiṇānāṃ tu kāraṇam

tasmātprasādamākāṅkṣedrūpasatra pradarśakāta //
avaśyaṃ tasya dātavyaṃ ghṛtapūrṇaṃ tu bhājanam

catuṣpalaṃ tu kāṃsyasya suvarṇaṃ kāñcanasya ca //
tataḥ paraṃ bhojanīyāḥ svaśaktyā dvijapuṅgavāḥ

lavaṇakṣīramadhvājyaguḍabhakṣyasitotkaṭam //
bhojanaṃ pānakopetaṃ paścāddeyā ca dakṣiṇā

vastrayugmaṃ pradātavyaṃ brāhmaṇāya navaṃ śubham //
brāhmaṇāya ca dātavyaṃ mahārājatarañjitam

saptabījāni deyāni lavaṇaṃ rūpyameva ca //
yaccānyadapyabhīṣṭaṃ syācchatropānatkameva ca

vittaśāṭhyaṃ na kartavyaṃ satradāne mahīpate //
avaśyadeyaṃ satre'sminghṛtapūrṇaṃ ca bhājanam

catuṣpalaṃ tu kāṃsyasya suvarṇaṃ kāñcanasya ca //
vratenānena cīrṇena dehatyāge dinaṃ gataḥ

tatroṣya suciraṃ kālaṃ mānuṣye yadi jāyate //
rājā bhavati dharmātmā brāhmaṇo vā dhanānvitaḥ

kule mahati sambhūto rūpeṇā'pratimo bhuvi //
ārogyaṃ mahadāpnoti saubhāgyamapi cottamam

lāvaṇyaṃ buddhi medhe ca matiṃ dharme ca śāśvatīm //
sampūrṇacandrapratimaḥ sarvasattvavaśaṅkaraḥ

naro bhavati rājendra nārī cāpsarasopamā //
subhagā darśanīyā ca lāvaṇyaguṇasaṃyutā

bahudhānyā bahudhanā bahubhūpaṇasaṃyutā //
bhartuścātyantadayitā loke khyātā ca sadguṇaiḥ //
nityārogyavatī śāntā sarvadoṣavivarjitā

candrānanā nīlasarojanetrā trailokyakāntā pativallabhā ca

bhavatyavaśyaṃ subhagā sunīlā lāvaṇyayuktā yaśasā śriyā ca

iti śrīviṣṇudharmottare prathamakhaṇḍe mārkaṇḍeyavajrasaṃvāde rūpasatravarṇanaṃ nāma pañcapañcāśadadhikaśatatamo'dhyāyaḥ