Vishnudharmottara Purana · Chapter 1.154

mārkaṇḍeya uvāca //
phālgunāmalapakṣānte rājā svapne purūravāḥ //
tasyaiva devadevasya śuśrāva gaditaṃ śubham

rātryāmasyāṃ vyatītāyāṃ mantriṇā tvaṃ sameṣyasi//
tena rājansamāgamya kṛtakṛtyo bhaviṣyasi

svapnamevaṃ sa rājarṣirdṛṣṭvā vipulavikramaḥ //
pratyūṣakāle vidhivatsnātaḥ prāgvadatandritaḥ

kṛtakṛtyo yathākāmaṃ pūjayitvā janārdanam //
svapnaṃ taddevadevasya nyavedayata dhārmikaḥ

tataḥ śuśrāva vacanaṃ devatārcāsamīritam //
evametanmahīpāla nātra kāryā vicāraṇā //

evaṃ prasādaṃ saṃprāpya devadevājjanārdanāt //
kṛtakṛtyamivātmānaṃ mene sa narapuṅgavaḥ

kṛtadevārcano rājā tadā hutahutāśanaḥ //
jagāda suhṛdāṃ teṣāṃ prasādaṃ madhusūdanāt

tamūcuśca tadā sarve rājānamaparājitam //
vidadhātu prasannaste devadevo janārdanaḥ

aprasanne jagannāthe deśe'sminnṛpa kasyacit //
na gatirvidyate rājaṃstvaṃ ca deśamihāgataḥ

sukhaṃ prāpnuhi bhadrante bhūya eva hitepsitān //
sa sādayitvā te kāmāndevaḥ sarvagataḥ prabhuḥ

evamuktvā narendraṃ taṃ gandharvāpsarasāṃ gaṇāḥ //
jagmuḥ krīḍāvihārārthaṃ yathāpūrvamarindama

athājagāma taṃ deśaṃ brahmaṇo mānasaḥ sutaḥ //
trijagadyaśasāṃ sthānamatriḥ suragaṇārcitaḥ

tamāgataṃ munivaraṃ dṛṣṭvā rājā purūravāḥ //
pādyārghyācamanīyādyairāsanenābhyapūjayat

sampūjya ca mahābhāgamidaṃ vacanamabravīt //
adya me saphalaṃ janma adya me saphalaṃ tapaḥ

yatte devagaṇairvandyau vanditau caraṇau mayā //
śreyaḥ prasūtivṛkṣasya prarohastava darśanama

sarvapāpāntakaraṇaṃ sarvakalyāṇakāraṇam //
kiṃ vā na labhyamastīha teṣāṃ dvijavarottama

amoghadarśane dṛṣṭe bhavatyamitatejasi //
evamuktastadā rājñā saṃprasanno jagāda tam

śṛṇu rājanvaco mahyaṃ yatte vakṣyāmi suvrata //
devadevasamādeśāddattaṃ te darśanaṃ mayā

suprasanno hi bhagavāndevaste madhusūdanaḥ //
dvādaśīṣu sadā rājansopavāsena nityaśa

pūjito bhagavānviṣṇusttvayātīte tu janmani //
rājasena tu bhāvena tvayā devaḥ samarcitaḥ

avaraṃ kāmamāśritya rājannihatakaṇṭakam //
sāttvikena tu bhāvena pūjayitvā janārdanama

rājyaṃ madreṣu saṃprāptaṃ nipkaṇṭakamarindama //
dvādaśyarcāprasannena devadevena cakriṇā

pradarśitamidaṃ sthānaṃ madīyaṃ svargasannibham //
iha rājam̐stapastaptvā devadevaṃ janārdanam

ārādhya dṛṣṭavānasmi purā vararṣagaṇānbahūn //
prāpyānujñāṃ hṛṣīkeṣāttatkṛte vivare śubhe

nityaṃ sannihitā rājaṃstasyaivārcā vinirmitā //
niyogāddevadevasya pūjyate siddhamattamaiḥ

neyaṃ dṛṣṭā manuṣyendra manuṣyairna ca rākṣasaiḥ //
piśitāśaistathaivānyairdṛṣṭapūrvā kathañcana

asminsvargopame deśe tvayā laulyena karmaṇā/
ārādhito jagannātho devaścakragadādharaḥ

āsannaphalamūle'pi bahugorasasaṃyute//
kṣaudrayuktaśilāprāye samākṣikaphalairyute

kevalāmbhośinā taptaṃ yattvayā paramaṃ tapaḥ//
tena te'haṃ varaṃ dadmi yadabhīṣṭaṃ tavānagha

acireṇaiva kālena tvayā rājankṛtaṃ tapaḥ//
rūpārthaṃ rūpalābhāya prāptaṃ me gadataḥ śṛṇu

tadvrataṃ ye kariṣyanti manujeśvara mānavāḥ//
striyo vāpi naraśreṣṭha prāpsyante rūpamuttamam

saubhāgyamatulaṃ loke lāvaṇyamapi cottamam//
dharmiṣṭatāṃ tathārogyaṃ kule janma tathottame

janmāntaramathāsādya svargalokaṃ tathāvidham//
svargalokātparibhraṣṭā mānuṣye guṇasaṃyutāḥ

brāhmaṇā dhanasampannā bhaviṣyantyathavā nṛpāḥ//
janmāntaramathāsādya sarvesyaiva phalapradāḥ

rūpavaṃto mahārāja ihāmutra ca te'naghāḥ//
yasmāttvayā tapastaptaṃ keśavaścātha pūjitaḥ

mayā samāgataścāpi gaṃdharvaiśca sahasraśaḥ//
ihaiva kṛtvā dharmajña rūpasatraṃ mahāphalam//
divyarūpadharo bhūtvā svarāṣṭraṃ gantumarhasi

etāvaduktaḥ sa tu madranātho mahātmanā tena narendrasiṃha//
papraccha taṃ dharmabhṛtāmvariṣṭhaḥ satrasya tasyānuśayaṃ vidhānam

iti śrīviṣṇudharmottare prathamakhaṇḍe mārkaṇḍeyavajrasaṃvāde purūravaso'tridarśanaṃ nāma catuḥpañcāśadadhikaśatatamo'dhyāyaḥ