Vishnudharmottara Purana · Chapter 1.153

mārkaṇḍeya uvāca //
gatvāśramapade rājā tyaktāhāraparicchadaḥ //
krīḍāvihārairgandharvaiḥ paśyatyapsarasassaha

kṛtvā puṣpoccayaṃ bhūri grathayitvā tathā srajaḥ //
agre nivedya devāya gandharvebhyastathā dadau

puṣpoccayaprasaktānāṃ krīḍantīnāṃ yathāsukham //
ceṣṭā nānāvidhākārāḥ paśyannapi na paśyati

kāścitpuṣpoccaye saktā latājālena veṣṭitāḥ //
sakhījanena santyaktāḥ kāntena paramokṣitāḥ

makarandasamākrāntanayanāḥ kāścidaṅganāḥ //
kāntaniḥśvāsavātena nīrajaskīkṛtekṣaṇāḥ

kāciduccitya puṣpāṇi dadau kāntasya bhāminī //
kāntasaḍgrathitaistaiśca rarāja kṛtaśekharā

svayamuccitya saṅgranthya ramaṇakṛtaśekharā //
kṛtakṛtyamivā''tmānaṃ mene manmathavardhinī

anyasmingahane kuñje viśeṣakusumā latā //
kācidevaṃ raho nītā ramaṇena riraṃsunā

kāntasannāmitalatākusumāni vicinvatī //
sarvābhyaḥ kācidātmānaṃ mene sarvaguṇādhikam

kvacitpaśyati bhūpālo nalinīṣu pṛthakpṛthak //
krīḍyamānāstu gandharvaidaivarāmā manoramāḥ

kāciccātāḍayatkāntamudakena śucismitā //
tāḍyamānā tathaivānyā kāntena ratimāyayau

kāntā tu tāḍayāmāsa jātakhedā varāṅganā //
adṛśyata varārohā śvāsanṛtyatpayodharā

kāntāmbutāḍana bhraṣṭakeśapāśanibandhanā //
śvāsākulamukhī bhāti madhupairiva padminī

svavaktrasadṛśaiḥ puṣpaiḥ saṃchannanalinīvane //
channā kāciccirātprāptā kāntenānviṣya yatnataḥ

snātā śītāpadeśena kācitprauḍhāṅganā bhṛśam //
ramaṇāliṅganaṃ cakre manobhi'laṣitaṃ ciram

jalārdraṃ vasanaṃ sūkṣmamaṅgalīnaṃ śucismitā //
dhārayantī janaṃ cakre kācittatra samanmatham

gandhamālyaguṇaiḥ kācitkānttenākṛṣya cāmbhasi //
truṭyatsragdāmapatitaṃ ramaṇaṃ prāhasacciram

kācinmagnasakhīdattajānudeśanakhakṣatā //
sambhramātkāntaramaṇamagnā sāpi nyamajjata

kācitpṛṣṭhīkṛtādityā keśanistoyakāriṇī //
śilātalagatā bhartrā dṛṣṭā kāmārtacakṣuṣā

hṛtamālyaṃ sulalitaṃ saṃkrāntakucakuṅkumam //
ratāntaklāntakāntābhamabhavattatsarodakam

susnātadevagandharvadevarāmāgaṇena ca //
pūjyamānaṃ sa dadṛśe devadevaṃ janārdanam

kvacicca dadṛśe rājā latāgṛhagatāḥ striyaḥ //
maṇḍayantyaḥ svagātrāṇi kāntasanyastamānasāḥ

kācidādarśasuvyagrakarā dūtīmukhodgatam //
śṛṇvatī kāntavacanamatiklāntamukhā babhau

kācitsatvaritā dūtyā bhūṣaṇānāṃ viparyayam //
kurvāṇā naiva bubudhe manmathāviṣṭacetanā

vāyununnāṃtasurabhi kusumotkaramaṇḍite //
kvacitpibantyo dadṛśe pradeśe nīlaśādvale //२९/
pāyayāmāsa ramaṇaṃ svayaṃ kācidvarāṅganā //
kācitpapau varārohā kāntapāṇi samarpitam

kācitsvanetrasaṃkrāntanīlotpalayutaṃ vadhūḥ//
pītvā papraccha ramaṇaṃ kva gate te mahotpale

tvayaiva pīte te nūnamityuktā ramaṇena sā //
satyaṃ viditvā mugdhatvādbabhūva vrīḍitā ciram

kācitkāntārpitaṃ subhrūḥ kāntapītāvaśeṣitam //
saviśeṣarasaṃ pānaṃ papau manmathavardhanam

āpānagoṣṭhīṣu tadā tāsāṃ sa narapuṅgavaḥ //
śuśrāva vividhaṃ gītaṃ tantrīsvaravimiśritam

pradoṣasamaye tāśca devadevaṃ janārdanam //
rājansadopanṛtyanti nānāvādyapuraḥsarāḥ

yāmamātre gate rātrau vinirgatya guhāmukhāt //
āyānti saṃyutāḥ kāntaiḥ svaṛddhiracitāngṛhān

nānāgandhārcitatalānnānāgandhasugandhinaḥ //
nānāvicitraśayanānkusumotkaramaṇḍitān

evamapsarasāṃ paśyankrīḍitāni sa parvate //
tapastepe mahārājaḥ keśavārpitamānasaḥ

tamūcurnṛpatiṃ gatvā gandharvāpsaraṇāṃ gaṇāḥ //
rājansvargopamaṃ deśaṃ prāptastvamarimardana

vayaṃ hi te pradāsyāmo manasaḥ kāṅkṣitānvarān //
tānādāya gṛhaṃ gaccha tiṣṭheha yadi vā punaḥ

purūravā uvāca//
amoghadarśanāḥ sarve bhavantastvamitaujasaḥ //
varaṃ vitarādyaiva prasādaṃ madhusūdanāt

mārkaṇḍeya uvāca //
evamastvityathoktastaiḥ sa tu rājā purūravāḥ //
tatrovāsa sukhī māsaṃ pūjayāno janārdanam

priya eva sadaivāsīdgandharvāpsarasāṃ nṛpa //
tutoṣa sa jano rājñastasyālaulyena karmaṇā

maghasya madhye sa nṛpaḥ praviṣṭastadāśramaṃ ratnasahasracitram//
toyāśanastatra uvāsa māsaṃ yāvatsitāntaṃ nṛpa phālgunasya

iti śrīviṣṇudharmottare prathamakhaṇḍe mārkaṇḍeyavajrasamvāde jalakrīḍāvarṇanaṃ nāma tripañcāśadadhikaśatatamo'dhyāyaḥ