Vishnudharmottara Purana · Chapter 1.152

mārkaṇḍeya uvāca//
tatra yau tau mahāśṛṅgau mahāvarṣamahāhimau//
tṛtīyaṃ tu tayormadhye śṛṅgamatyantamucchritam

nityātapaṃ taptaśilaṃ sadā bhagativarjitam //
tasyādhastādda(?)kṣagaṇe deśe bhāge ca paścime

jātīlatāparikṣiptaṃ vivaraṃ cārudarśanam//
dṛṣṭvaiva kautukāviṣṭastaṃ viveśa mahīpatiḥ

tamasā cātinibiḍaṃ nalvamātraṃ mahīpatiḥ//
nalvamātramatikramya svaprabhābharaṇojvalam //

samucchritamathātyantaṃ gambhīraṃ parivartulam //
na tatra sūryastapati na virājati candramāḥ

tathāpi divasākāraṃ prākāśyaṃ tadaharniśam //
krośādhikaparīmāṇaṃ sarasā ca virājitam

samantātsarasastasya śailalagnā tu vedikā//
sauvarṇai rājatairvṛkṣairvidrumairapi śobhitā

nānā māṇikyakusumaiḥ svaprabhābharaṇojjvalaiḥ //
tasminsarasi padmāni padmarāgacchadāni ca

vajrakesarajālāni sugandhīni tathāpyati //
patrairmarakatairnīlavaidūryaiśca mahīpate

karṇikāśca tathāśeṣā jātarūpasya pārthiva //
tasminsarasi yā bhūmirna sā kardamasaṅkulā

nānāratnairupacitā jalajānāṃ samāśrayā //
kapardakānāṃ śuktīnāṃ śaṅkhānāṃ ca mahīpate

makarāṇāṃ ca matsyānāṃ paiṇḍānāṃ kacchapaiḥ saha //
tatra maratakakhaṇḍāni vajrāṇi ca sahasraśaḥ

padmarāgendranīlāni mahānīlāni pārthiva //
puṣparāgāṇi ramyāṇi tathā karketakāni ca

turūkasya ca khaṇḍāni tathā śepa(?)sya bhāgaśaḥ //
gajāvarttasya mukhyasya rudhirākhyasya cāpyatha

sūryendukāntayoścaiva pīlorbhallātakasya ca //
jyotīrasasya ramyasya śaṅkhakasya ca bhāgaśaḥ

masāragavalaṅkānāṃ sphaṭikasya tathaiva ca//
gomedapittakānāṃ ca dhūlī marakatasya ca

vaidūryasaugandhikayostathā rājamaṇernṛpa //
khañjasya caiva mukhyasya tathā brahmamaṇerapi

muktāphalānāṃ mukhyānāṃ tārāvigrahadhāriṇām //
sukhoṣṇaṃ caiva tattoyaṃ snānācchītavināśanam

vaidūryasya śilāmadhye sarasastasya śobhanā//
pramāṇena tathā sā ca dve ca rājandhanuḥśate

caturasrā tathā ramyā tapasā nirmitātriṇā //
biladvārasame deśe ketustatra hiraṇmayaḥ

pradeśaḥ sa tu rājendra dvīpe tasminmanohare //
tathā puṣkariṇī ramyā tasminrājañchilātale

suśītāmalapānīyā jalajaiśca virājitā //
ākāśavimalā rājaṃścaturasrā manoharā

tasyāstadudakaṃ svādu laghu śītaṃ sugandhi ca //
na kṣiṇoti tathā kāyaṃ kukṣimāpūrayatyapi

tṛptiṃ vidhatte paramāṃ śarīre ca mahatsukham //
madhye ca tasyāḥ sukṛtaṃ prāsādaṃ tapasātriṇā

rukmasetupraveśaṃ tatsarvaratnamayaṃ śubham //
śaśāṅkaraśmisaṅkāśaṃ prāsādaṃ rājataṃ hitam

ramyaṃ vaidūryasopānaṃ vidrumāmalatārakam //
indranīlamahācakrañjātarūpavibhūṣitam

padmarāgamahāstaṃbhaṃ tathā marakatavedikam //
vajrāṃśujālaiśchuritaṃ ramyaṃ dṛṣṭimanoharam

prāsāde tatra bhagavāndevadevo janārdanaḥ //
bhogibhogāvalīsuptaḥ sarvālaṅkārabhūṣitaḥ

jānumākuñcitastvekaṃ devadevasya cakriṇaḥ //
phaṇīndrasanniviṣṭāṃghri dvitīyaśca tathā nṛpa

lakṣmyutsaṅgagatāṃghristu śeṣabhogaprasāritaḥ //
phaṇīndrabhogavinyastabāhukūrparaśobhitaḥ

svāṅgulīpṛṣṭhavinyasta devaśīrṣadharaṃ vibhum//
ekaṃ tu devadevasya dvitīyaṃ saṃprasāritam

samākuñcitajānusthamaṇibandhasuśobhitam //
kiñcidākuñcitaṃ caiva nābhideśe karasthitam

tṛtīyaṃ ca bhujaṃ tasya caturthaṃ tu tathā śṛṇu //
āttasantānakusumaṃ prāṇadeśānusarpiṇam

lakṣmyā saṃvāhyamānāṃghriḥ phullapadmanibhaiḥ karaiḥ //
santānamālāmukuṭahārakeyūrabhūṣitam

bhūṣitaṃ ca tathā devamaṅgulīyakaiḥ //
phaṇīndraphaṇavinyastacāruratnaśikhojjvalam

ajñātavastucaritaṃ pratiṣṭhitamathātriṇā //
siddhāntapūjyaṃ satataṃ samantātkusumārcitam

divyagandhāvaliptāṅgaṃ divyadhūpena dhūpitam //
gorasaiḥ saphalairhṛdyaiḥ siddhairupahṛtaiḥ sadā

saṃśobhitaṃ puraḥpārśvaṃ devamuttamaśīrṣakam//
tathā paścānmukhaṃ dṛṣṭvā vavande sa narādhipaḥ

jānubhyāṃ śirasā caiva gatvā bhūmiṃ yathāvidhi //
nāmnāṃ sahasreṇa tathā tuṣṭāva madhusūdanam

pradakṣiṇamatho cakre sa tūtthāya punaḥ punaḥ //
ramyamāyatanaṃ dṛṣṭvā tatrovāsāśrame nṛpaḥ

viśālāṃ hi guhāṃ kāñcidāśritya sumanoharām //
tapaścacāra tatraiva pūjayāno janārdanam

nānāvidhaiḥ sadā puṣpaiḥ phalairmūlaiḥ sagorasaiḥ //
nityaṃ triṣavaṇasnāyī vahnipūjāparāyaṇaḥ

devavāpījalaiḥ kurvansatataṃ prāṇadhāraṇam //
sarvāhāraparityāgaṃ sa kṛtvā manujeśvaraḥ

anāśritaguhāśāyī kālaṃ nayati pārthivaḥ //
tyaktāhārakriyasyāsya kevalāmbho'śinastathā //
glānistasya samāyāti na śarīre tadadbhutam

evaṃ sa rājā tapasi prasaktaḥ sampūjayandevavaraṃ sadaiva //
tatrāśrame kālamuvāsa kaścitsvargopame duḥkhamavindamānaḥ

iti śrīviṣṇudharmottare prathamakhaṇḍe mārkaṇḍeyavajrasaṃvāde āśramavarṇano nāma dvipañcāśadadhikaśatatamo'dhyāyaḥ