Vishnudharmottara Purana · Chapter 1.150

mārkaṇḍeya uvāca //
ālokayannadīṃ puṇyāṃ tatsamīrahataklamaḥ //
sa gacchanneva dadṛśe himavantaṃ mahāgirim

khamullikhadbhirbahubhirvṛtaṃ śṛṅgaiḥ supāṇḍuraiḥ//
pakṣiṇāmatha saṃcārairvinā siddhagatiṃ śubhām

nadīprapātasaṃjātamahāśabdaiḥ samantataḥ //
asaṃśrutānyaśabdantaṃ śītatoyaṃ manoramam

devadāruvanairnīlaiḥ kṛtādhovasanaṃ śubham //
meghottarīyaṃ taṃ śailaṃ dadṛśe sa narādhipaḥ

śvenameghakṛtoṣṇīṣaṃ candrārkamukuṭaṃ kvacit //
himānuliptasarvāṅgaṃ kvaciddhātuvicitritam

candanenānuliptāṅgadattapañcāṅguliṃ yathā //
śītapradaṃ nidāghe'pi śilāviṣamasaṃkaṭam

sālaktakairapsarasāṃ mudritaṃ caraṇaiḥ kvacit //
kvacidaspṛṣṭasūryāṃśuṃ kvacicca tamasā vṛtam

darīmukhaiḥ kvacidbhīmaiḥ pibantamanilaṃ bahu //
kvacidvidyādharagaṇaiḥ krīḍadbhirupaśobhitam

upagītaṃ tathā mukhyaiḥ kinnarāṇāṃ gaṇaiḥ kvacit //
āpānabhūmau ca gaṇairgandharvāpsarasāṃ kvacit

gītādibhiḥ samākīrṇaṃ gandharvīṇāṃ manoharam //
niruddhapavanairdeśairnīlaśādvalamaṇḍitaiḥ

kvacicca kusumairyuktaṃ cātyantaruciraiḥ śubham //
tapasviśaraṇaṃ śailaṃ kāmināmapi durlabham

mṛgayūthānucaritaṃ dantibhinnamahādrumam //
yatra siṃhaninādena trastānāṃ bhairavaṃ ravam

śrutvotpaśyati vibhrāntaṃ gajānāmākulaṃ kulam //
tapaśca tāpasairyasya kūladeśeṣvalaṃkṛtam

ratnairyataḥ samutpannaistrailokyaṃ cāpyalaṃkṛtam //
ahīnaśaraṇaṃ nityamahīnajanasevitam

ahīnaḥ paśyati girimahīnaṃ ratnasampadam //
alpena tapasā yatra siddhiḥ prāpyeta tāpasaiḥ

yaśca darśanamātreṇa sarvakalmaṣanāśanaḥ //
mahāprapātasaṃpātaprabhītakhagabandhubhi. / १६ //
vāyunīta sadāvṛṣṭiḥ kṛtadeśaṃ kvacitkvacit //
alabdhajaladaiḥ śṛṅgaiḥ kvaciccātisamucchritaiḥ

nityārkatāpaviṣamairagamyairmanasā yutam //
devadāru mahāvṛkṣapuñjaśākhānirantaraiḥ

samastabhuvanākāraiḥ pradeśairupaśobhitam //
himacchannamahāśṛṃgaṃ prapātamitanirjharam //
śabdalabhyāmbuviṣamaṃ himasaṃruddhakandaram

dṛṣṭvaiva tāṃ cārunitambabhūmiṃ mahānubhāvaḥ sa mahīndranāthaḥ //
babhrāma tatraiva mudā sametaḥ sthānaṃ tataḥ kiñcidathā sasāda

iti śrīviṣṇudharmottare prathamakhaṇḍe mārkaṇḍeyavajrasaṃvāde himavadvarṇano nāma pañcāśaduttaraśatatamo'dhyāyaḥ