Vishnudharmottara Purana · Chapter 1.149

mārkaṇḍeya uvāca //
sa dadarśa nadīṃ puṇyāṃ ramyāṃ haimavatīṃ śubhām //
gandharvagaṇasaṃkīrṇāṃ nityaṃ śakreṇa sevitām

surebhamadasiṃdūrairyasyāṃ rājirvirājate //
madhyena śakracāpābhā tasyāṃ majjati sarvadā

tapasviśaraṇāyātāṃ mukhyabrāhmaṇasevitām //
dadarśa śītapānīyāṃ mahārājaḥ purūravāḥ

plutahaṃsāvalīchannāṃ kāśacāmaravījitām //
sābhiṣekāmiva sa tāṃ paśyanprītiṃ parāṃ yayau

puṇyāṃ suśītalāṃ hṛdyāṃ manasaḥ prītivardhinīm //
kṣayavṛddhiyutāṃ saumyāṃ somamūrtimivāparām

suśītaśīghrapānīyāṃ dvijapuñjaniṣevitām //
sutāṃ himavataḥ śreṣṭhāṃ cañcadvīcivirājitām

amṛtasvādusalilāṃ tāpasairupaśobhitām //
svargārohaṇaniḥśreṇīṃ sarvakalmaṣanāśinīm

agryāṃ samudramahiṣīṃ mahiṣīgaṇagāhitām //
hitāṃ sarvasya lokasya kasya nautsukyakāriṇīm

gokulākulatīrāṃ tāṃ ramyāṃ śaivālavarjitām //
haṃsasārasasaṃghuṣṭairjalajaiḥ sevitāṃ śubhaiḥ

āvartanābhigambhīrāṃ dvīporujaghanasthalām //
nīlanīrajanetrāṃ tāmutphullakamalānanām

himābhaphenavasanāṃ cakravākādharāṃ śubhām //
balākāpaṅktidaśanāṃ calanmatsyāvalibhruvam

svajaloddhatamātaṅgaramyakumbhapayodharām //
haṃsanūpurasaṃghuṣṭāṃ mṛṇālavalayāvalīm

yasyāṃ rūpamadonmattagandharvānugataḥ sadā //
madhyāhnasamaye rājankrīḍatyapsarasāṃ gaṇaḥ

tāmapsarovinirmuktānvahantī kusumāñśubhān //
svatīradrumasaṃbhūtānnānāvarṇānsugandhinaḥ

taraṅgaśatasaṃkrāntasūryamaṇḍaladurdaśam //
surebhajanitāghātavapradvayavibhūṣitām

śakrebhagaṇḍasalilairdevastrīkuca candanaiḥ //
saṃyutaṃ salilaṃ yasyāḥ ṣaṭpadairupasevyate

yasyāstīrabhavā vṛkṣāḥ sugandhikusumānvitāḥ //
tathā prakṛṣṭabhramarā bhramaraiste nirākulāḥ

yasyāstīre ratiṃ yānti sadā kāmavaśānugāḥ //
tapodhanāśca ṛṣayastathā devāḥ savāsavāḥ

labhante yatplutāṅgāstu devebhyaḥ pratimānanāḥ //
striyaśca nāke bahulāḥ padmendupratimānanāḥ

yā bibharti sadā toyaṃ devasaṃghairapīḍitam //
pulindamṛgavṛndaiśca vyādhasaṃghairapīḍitam

satāmarasapānīyāṃ satārāgaganāmalām //
sa tāṃ paśyanyayau rājā satāmīpsitakāmadām

yasyāstīraruhaiḥ kāśaiḥ phullaiścandrāṃśusannibhaiḥ //
rājadbhirvivṛtākāśai ramyaistatkṣīrasaṃsthitaiḥ

yā ca sadā divi sevyati devairyā ca sadā bhuvi sevyati vipraiḥ //
yā ca sadā sakalāghavināśaṃ bhaktajanasya karotyacireṇa

yā ca gatā saritāṃ hi kadambairyā ca nutā satataṃ hi mahīnaiḥ //
yā ca yutā śatatoyakadamvairyā ca gatā satataṃ himahīnaiḥ

yuktāpi kesarigaṇaiḥ karivṛndayātā sannāgayuktasalilāpi suvarṇayuktā //
sūryāṃśutāpaparivṛddhivivṛddhiśīlā śītāṃśutulyayaśasā dadṛśe nṛpeṇa

iti śrīviṣṇudharmottare prathamakhaṇḍe mārkaṇḍeyavajrasaṃvāde irāvatīvarṇano nāmaiko napañcāśaduttaraśatatamo'dhyāya