વિષ્ણુધર્મોત્તરપુરાણમ્ · અધ્યાય 1.150

માર્કણ્ડેય ઉવાચ ॥
આલોકયન્નદીં પુણ્યાં તત્સમીરહતક્લમઃ ॥
સ ગચ્છન્નેવ દદૃશે હિમવન્તં મહાગિરિમ્

ખમુલ્લિખદ્ભિર્બહુભિર્વૃતં શૃઙ્ગૈઃ સુપાણ્ડુરૈઃ॥
પક્ષિણામથ સંચારૈર્વિના સિદ્ધગતિં શુભામ્

નદીપ્રપાતસંજાતમહાશબ્દૈઃ સમન્તતઃ ॥
અસંશ્રુતાન્યશબ્દન્તં શીતતોયં મનોરમમ્

દેવદારુવનૈર્નીલૈઃ કૃતાધોવસનં શુભમ્ ॥
મેઘોત્તરીયં તં શૈલં દદૃશે સ નરાધિપઃ

શ્વેનમેઘકૃતોષ્ણીષં ચન્દ્રાર્કમુકુટં ક્વચિત્ ॥
હિમાનુલિપ્તસર્વાઙ્ગં ક્વચિદ્ધાતુવિચિત્રિતમ્

ચન્દનેનાનુલિપ્તાઙ્ગદત્તપઞ્ચાઙ્ગુલિં યથા ॥
શીતપ્રદં નિદાઘેઽપિ શિલાવિષમસંકટમ્

સાલક્તકૈરપ્સરસાં મુદ્રિતં ચરણૈઃ ક્વચિત્ ॥
ક્વચિદસ્પૃષ્ટસૂર્યાંશું ક્વચિચ્ચ તમસા વૃતમ્

દરીમુખૈઃ ક્વચિદ્ભીમૈઃ પિબન્તમનિલં બહુ ॥
ક્વચિદ્વિદ્યાધરગણૈઃ ક્રીડદ્ભિરુપશોભિતમ્

ઉપગીતં તથા મુખ્યૈઃ કિન્નરાણાં ગણૈઃ ક્વચિત્ ॥
આપાનભૂમૌ ચ ગણૈર્ગન્ધર્વાપ્સરસાં ક્વચિત્

ગીતાદિભિઃ સમાકીર્ણં ગન્ધર્વીણાં મનોહરમ્ ॥
નિરુદ્ધપવનૈર્દેશૈર્નીલશાદ્વલમણ્ડિતૈઃ

ક્વચિચ્ચ કુસુમૈર્યુક્તં ચાત્યન્તરુચિરૈઃ શુભમ્ ॥
તપસ્વિશરણં શૈલં કામિનામપિ દુર્લભમ્

મૃગયૂથાનુચરિતં દન્તિભિન્નમહાદ્રુમમ્ ॥
યત્ર સિંહનિનાદેન ત્રસ્તાનાં ભૈરવં રવમ્

શ્રુત્વોત્પશ્યતિ વિભ્રાન્તં ગજાનામાકુલં કુલમ્ ॥
તપશ્ચ તાપસૈર્યસ્ય કૂલદેશેષ્વલંકૃતમ્

રત્નૈર્યતઃ સમુત્પન્નૈસ્ત્રૈલોક્યં ચાપ્યલંકૃતમ્ ॥
અહીનશરણં નિત્યમહીનજનસેવિતમ્

અહીનઃ પશ્યતિ ગિરિમહીનં રત્નસમ્પદમ્ ॥
અલ્પેન તપસા યત્ર સિદ્ધિઃ પ્રાપ્યેત તાપસૈઃ

યશ્ચ દર્શનમાત્રેણ સર્વકલ્મષનાશનઃ ॥
મહાપ્રપાતસંપાતપ્રભીતખગબન્ધુભિ. । ૧૬ ॥
વાયુનીત સદાવૃષ્ટિઃ કૃતદેશં ક્વચિત્ક્વચિત્ ॥
અલબ્ધજલદૈઃ શૃઙ્ગૈઃ ક્વચિચ્ચાતિસમુચ્છ્રિતૈઃ

નિત્યાર્કતાપવિષમૈરગમ્યૈર્મનસા યુતમ્ ॥
દેવદારુ મહાવૃક્ષપુઞ્જશાખાનિરન્તરૈઃ

સમસ્તભુવનાકારૈઃ પ્રદેશૈરુપશોભિતમ્ ॥
હિમચ્છન્નમહાશૃંગં પ્રપાતમિતનિર્ઝરમ્ ॥
શબ્દલભ્યામ્બુવિષમં હિમસંરુદ્ધકન્દરમ્

દૃષ્ટ્વૈવ તાં ચારુનિતમ્બભૂમિં મહાનુભાવઃ સ મહીન્દ્રનાથઃ ॥
બભ્રામ તત્રૈવ મુદા સમેતઃ સ્થાનં તતઃ કિઞ્ચિદથા સસાદ

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે હિમવદ્વર્ણનો નામ પઞ્ચાશદુત્તરશતતમોઽધ્યાયઃ