Vishnudharmottara Purana · Chapter 1.148

// vajra uvāca //
caritaṃ budhaputrasya mārkaṇḍeya mayā śrutam //
śrutaḥ śrāddhavidhiḥ puṇyaḥ sarvapāpapraṇāśanaḥ

dhenvāḥ prasūyamānāyāḥ phalaṃ dāne tathā śrutam //
kṛṣṇājinapradānaṃ ca vṛṣotsargastathaiva ca

śrutvā rūpaṃ narendrasya budhaputrasya bhārgava //
kautūhalaṃ samutpannaṃ tanmamācakṣva pṛcchataḥ

kena karmavipākena sa tu rājā purūravāḥ //
avāpa tādṛśaṃ rūpaṃ saubhāgyamapi cottamam

devāṃstribhuvana śreṣṭhāngandharvāṃśca manoramān //
urvaśī saṃgatā tyaktvā sarvabhāvena taṃ nṛpam

mārkaṇḍeya uvāca //
śṛṇu karmavipākena yena rājā purūravāḥ //
purūravā iti khyāto madreṣvāsīnmahīpatiḥ

cāśuṣasyānvaye jātaścākṣuṣasyāntare manoḥ //
sarvairnṛpaguṇairyuktaḥ kevalaṃ rūpa varjitaḥ

vajra uvāca //
purūravā madrapatiḥ karmaṇā kena bhārgava //
babhūva karmaṇā kena kurūpaśca tathā dvija

mārkaṇḍeya uvāca //
dvijagrāme dvijaśreṣṭho nāmnaivā''sītpurūravāḥ //
nadyāḥ kūle mahārāja pūrvajanmani pārthivaḥ

sa tu madrapatirnāmnā yo'bhūdrājā purūravāḥ //
asmiñjanmanyasau vipro dvādaśīṣu sadānagha

upoṣya pūjayāmāsa rājyakāmo janārdanam //
cakāra sopavāsaṃ ca snānamabhyaṅgapūrvakam

upavāsaphalaṃ prāpya rājyaṃ madreṣvakaṇṭakam //
upoṣitastadābhyaṅgādrūpahīno'bhyajāyata

upoṣito narastasmātsnānamabhyaṅgapūrvakam //
varjayettatprayatnena rūpaghnaṃ tatparaṃ nṛṇām

etatte kathitaṃ tasya yadvṛttaṃ pūrvajanmani //
madreśvaratve caritaṃ śṛṇu tasya mahīpateḥ

tasya rājaguṇaiḥ sarvaiḥ samupetasya pārthiva //
janānurāgo naivāsīdrūpahīnasya yādava

rūpakāmaḥ sa madreśastapase kṛtaniścayaḥ //
rājyaṃ mantrigataṃ kṛtvā jagāma himaparvatam

vyavasāyadvitīyastu padbhyāmeva mahāyaśāḥ //
ūrdhvaṃ saṃtīrya sa nadaṃ viṣayānte svakīṃ nadīm //
irāvatīmiti khyātāṃ dadarśātimanoharām

tuhinagiribhavāṃ mahoghavegāṃ tuhinasagarbhasamānaśītalodām //
tuhinasadṛśavarṇaphenayuktāṃ tuhinayaśāḥ saritaṃ dadarśa rājā

iti śrīviṣṇudharmottare prathamakhaṇḍe mārkaṇḍeyavajrasaṃvāde madreśvarasya tapovana gamanaṃ nāmāṣṭacattvāriṃśaduttaraśatatamo'dhyāyaḥ