વિષ્ણુધર્મોત્તરપુરાણમ્ · અધ્યાય 1.148

॥ વજ્ર ઉવાચ ॥
ચરિતં બુધપુત્રસ્ય માર્કણ્ડેય મયા શ્રુતમ્ ॥
શ્રુતઃ શ્રાદ્ધવિધિઃ પુણ્યઃ સર્વપાપપ્રણાશનઃ

ધેન્વાઃ પ્રસૂયમાનાયાઃ ફલં દાને તથા શ્રુતમ્ ॥
કૃષ્ણાજિનપ્રદાનં ચ વૃષોત્સર્ગસ્તથૈવ ચ

શ્રુત્વા રૂપં નરેન્દ્રસ્ય બુધપુત્રસ્ય ભાર્ગવ ॥
કૌતૂહલં સમુત્પન્નં તન્મમાચક્ષ્વ પૃચ્છતઃ

કેન કર્મવિપાકેન સ તુ રાજા પુરૂરવાઃ ॥
અવાપ તાદૃશં રૂપં સૌભાગ્યમપિ ચોત્તમમ્

દેવાંસ્ત્રિભુવન શ્રેષ્ઠાન્ગન્ધર્વાંશ્ચ મનોરમાન્ ॥
ઉર્વશી સંગતા ત્યક્ત્વા સર્વભાવેન તં નૃપમ્

માર્કણ્ડેય ઉવાચ ॥
શૃણુ કર્મવિપાકેન યેન રાજા પુરૂરવાઃ ॥
પુરૂરવા ઇતિ ખ્યાતો મદ્રેષ્વાસીન્મહીપતિઃ

ચાશુષસ્યાન્વયે જાતશ્ચાક્ષુષસ્યાન્તરે મનોઃ ॥
સર્વૈર્નૃપગુણૈર્યુક્તઃ કેવલં રૂપ વર્જિતઃ

વજ્ર ઉવાચ ॥
પુરૂરવા મદ્રપતિઃ કર્મણા કેન ભાર્ગવ ॥
બભૂવ કર્મણા કેન કુરૂપશ્ચ તથા દ્વિજ

માર્કણ્ડેય ઉવાચ ॥
દ્વિજગ્રામે દ્વિજશ્રેષ્ઠો નામ્નૈવાઽઽસીત્પુરૂરવાઃ ॥
નદ્યાઃ કૂલે મહારાજ પૂર્વજન્મનિ પાર્થિવઃ

સ તુ મદ્રપતિર્નામ્ના યોઽભૂદ્રાજા પુરૂરવાઃ ॥
અસ્મિઞ્જન્મન્યસૌ વિપ્રો દ્વાદશીષુ સદાનઘ

ઉપોષ્ય પૂજયામાસ રાજ્યકામો જનાર્દનમ્ ॥
ચકાર સોપવાસં ચ સ્નાનમભ્યઙ્ગપૂર્વકમ્

ઉપવાસફલં પ્રાપ્ય રાજ્યં મદ્રેષ્વકણ્ટકમ્ ॥
ઉપોષિતસ્તદાભ્યઙ્ગાદ્રૂપહીનોઽભ્યજાયત

ઉપોષિતો નરસ્તસ્માત્સ્નાનમભ્યઙ્ગપૂર્વકમ્ ॥
વર્જયેત્તત્પ્રયત્નેન રૂપઘ્નં તત્પરં નૃણામ્

એતત્તે કથિતં તસ્ય યદ્વૃત્તં પૂર્વજન્મનિ ॥
મદ્રેશ્વરત્વે ચરિતં શૃણુ તસ્ય મહીપતેઃ

તસ્ય રાજગુણૈઃ સર્વૈઃ સમુપેતસ્ય પાર્થિવ ॥
જનાનુરાગો નૈવાસીદ્રૂપહીનસ્ય યાદવ

રૂપકામઃ સ મદ્રેશસ્તપસે કૃતનિશ્ચયઃ ॥
રાજ્યં મન્ત્રિગતં કૃત્વા જગામ હિમપર્વતમ્

વ્યવસાયદ્વિતીયસ્તુ પદ્ભ્યામેવ મહાયશાઃ ॥
ઊર્ધ્વં સંતીર્ય સ નદં વિષયાન્તે સ્વકીં નદીમ્ ॥
ઇરાવતીમિતિ ખ્યાતાં દદર્શાતિમનોહરામ્

તુહિનગિરિભવાં મહોઘવેગાં તુહિનસગર્ભસમાનશીતલોદામ્ ॥
તુહિનસદૃશવર્ણફેનયુક્તાં તુહિનયશાઃ સરિતં દદર્શ રાજા

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે મદ્રેશ્વરસ્ય તપોવન ગમનં નામાષ્ટચત્ત્વારિંશદુત્તરશતતમોઽધ્યાયઃ