Vishnudharmottara Purana · Chapter 1.145

mārkaṇḍeya uvāca //
ataḥ paraṃ pravakṣyāmi pitṛbhiryāḥ prakīrtitāḥ //
gāthāḥ pārthivaśārdūla kāmayadbhiḥ pure svake

api syātsa kule'smākaṃ yo no dadyājjalāñjalim //
nadīṣu bahutoyāsu śītalāsu viśeṣataḥ

api syātsa kule'smākaṃ himamiśraṃ jalāñjalim //
tilamākṣika saṃyuktaṃ yo no dadyātsamāhitaḥ

api syātsa kule'smākaṃ yo no dadyācca bhaktitaḥ //
pāyasaṃ madhusaṃmiśraṃ varṣāsu ca maghāsu ca

dālbhya uvāca //
patnyo nṛṇāṃ muniśreṣṭha yoṣitāṃ ca tathā narāḥ //
tacchrotumicchāmi viprarṣe vidhavā strī na jāyate

upoṣitena yenāgrya patnyā na rahito naraḥ //
pulasttya uvāca //
aśūnyaśayanāṃ nāma dvitīyāṃ śṛṇu bho dvija

yāmupoṣya na vaidhavyaṃ prayāti strī dvijottama //
patnīvimuktaśca naro na kadācitprajāyate

śete jalanidhau kṛṣṇaḥ śriyā sārdhaṃ yadā dvija //
aśūnyaśayanā nāma tadā śrāddhe hi sā tithiḥ

kṛṣṇapakṣadvitīyāyāṃ śrāvaṇe munisattama //
imamuccārayenmantraṃ praṇamya jagataḥ patim

śrīvatsadhāriṇaṃ śrīśaṃ bhaktyābhyarcya śriyā saha //
śrīvatsadhāriñchrīkānta śrīdhāma śrīpate'cyuta

gārhasthyaṃ mā praṇāśaṃ me yātu dharmārthakāmada//
agnayo mā praṇaśyantu mā praṇaśyantu devatāḥ

pitaro mā praṇaśyantu matto dāmpatyabhedataḥ //
lakṣmyā viyujyate deva na kadācidyathā bhavān

tathā kalatrasaṃbandho deva me naiva bhidyatu //
lakṣmyā hyaśūnyaṃ varada yathā te śayanaṃ sadā

śayyā mamāpyaśūnyāstu tathaiva madhusūdana //
evaṃ prasādya pūjāṃ ca kṛtvā lakṣmyāstathā hareḥ

phalāni dadyācchāyāyāmabhīṣṭāni jagatpateḥ //
naktaṃ praṇamyāyatane havirbhuñjīta vāgyataḥ

brāhmaṇāya dvitīye'hni śayyāṃ dayātsadakṣiṇām//
evaṃ karoti yaḥ samyaṅnaro māsacatuṣṭayam

tasya janmatraye dālbhya gṛhabhaṅgo na jāyate//
aśūnyaśayanaścāsau dharmakarmārthasādhakaḥ

bhavatyavyākṛtaiśvaryaḥ puruṣo nātra saṃśayaḥ //
nārī ca dālbhya dharmajña vratametadyathāvidhi

yā karoti na sā śocyā bandhuvargasya jāyate //
vaidhavyaṃ durbhagatvaṃ vā bhartṛvyaṅgyaṃ ca sattama

nāpnoti janmatritayametaccīrtvā pativratā

iti śrīviṣṇudharmottare prathamakhaṇḍe mārkaṇḍeyavajrasaṃvāde aśūnyaśayanadvitīyāvarṇano nāma pañcacatvāriṃśaduttaraśatatamo'dhyāyaḥ