વિષ્ણુધર્મોત્તરપુરાણમ્ · અધ્યાય 1.145

માર્કણ્ડેય ઉવાચ ॥
અતઃ પરં પ્રવક્ષ્યામિ પિતૃભિર્યાઃ પ્રકીર્તિતાઃ ॥
ગાથાઃ પાર્થિવશાર્દૂલ કામયદ્ભિઃ પુરે સ્વકે

અપિ સ્યાત્સ કુલેઽસ્માકં યો નો દદ્યાજ્જલાઞ્જલિમ્ ॥
નદીષુ બહુતોયાસુ શીતલાસુ વિશેષતઃ

અપિ સ્યાત્સ કુલેઽસ્માકં હિમમિશ્રં જલાઞ્જલિમ્ ॥
તિલમાક્ષિક સંયુક્તં યો નો દદ્યાત્સમાહિતઃ

અપિ સ્યાત્સ કુલેઽસ્માકં યો નો દદ્યાચ્ચ ભક્તિતઃ ॥
પાયસં મધુસંમિશ્રં વર્ષાસુ ચ મઘાસુ ચ

દાલ્ભ્ય ઉવાચ ॥
પત્ન્યો નૃણાં મુનિશ્રેષ્ઠ યોષિતાં ચ તથા નરાઃ ॥
તચ્છ્રોતુમિચ્છામિ વિપ્રર્ષે વિધવા સ્ત્રી ન જાયતે

ઉપોષિતેન યેનાગ્ર્ય પત્ન્યા ન રહિતો નરઃ ॥
પુલસ્ત્ત્ય ઉવાચ ॥
અશૂન્યશયનાં નામ દ્વિતીયાં શૃણુ ભો દ્વિજ

યામુપોષ્ય ન વૈધવ્યં પ્રયાતિ સ્ત્રી દ્વિજોત્તમ ॥
પત્નીવિમુક્તશ્ચ નરો ન કદાચિત્પ્રજાયતે

શેતે જલનિધૌ કૃષ્ણઃ શ્રિયા સાર્ધં યદા દ્વિજ ॥
અશૂન્યશયના નામ તદા શ્રાદ્ધે હિ સા તિથિઃ

કૃષ્ણપક્ષદ્વિતીયાયાં શ્રાવણે મુનિસત્તમ ॥
ઇમમુચ્ચારયેન્મન્ત્રં પ્રણમ્ય જગતઃ પતિમ્

શ્રીવત્સધારિણં શ્રીશં ભક્ત્યાભ્યર્ચ્ય શ્રિયા સહ ॥
શ્રીવત્સધારિઞ્છ્રીકાન્ત શ્રીધામ શ્રીપતેઽચ્યુત

ગાર્હસ્થ્યં મા પ્રણાશં મે યાતુ ધર્માર્થકામદ॥
અગ્નયો મા પ્રણશ્યન્તુ મા પ્રણશ્યન્તુ દેવતાઃ

પિતરો મા પ્રણશ્યન્તુ મત્તો દામ્પત્યભેદતઃ ॥
લક્ષ્મ્યા વિયુજ્યતે દેવ ન કદાચિદ્યથા ભવાન્

તથા કલત્રસંબન્ધો દેવ મે નૈવ ભિદ્યતુ ॥
લક્ષ્મ્યા હ્યશૂન્યં વરદ યથા તે શયનં સદા

શય્યા મમાપ્યશૂન્યાસ્તુ તથૈવ મધુસૂદન ॥
એવં પ્રસાદ્ય પૂજાં ચ કૃત્વા લક્ષ્મ્યાસ્તથા હરેઃ

ફલાનિ દદ્યાચ્છાયાયામભીષ્ટાનિ જગત્પતેઃ ॥
નક્તં પ્રણમ્યાયતને હવિર્ભુઞ્જીત વાગ્યતઃ

બ્રાહ્મણાય દ્વિતીયેઽહ્નિ શય્યાં દયાત્સદક્ષિણામ્॥
એવં કરોતિ યઃ સમ્યઙ્નરો માસચતુષ્ટયમ્

તસ્ય જન્મત્રયે દાલ્ભ્ય ગૃહભઙ્ગો ન જાયતે॥
અશૂન્યશયનશ્ચાસૌ ધર્મકર્માર્થસાધકઃ

ભવત્યવ્યાકૃતૈશ્વર્યઃ પુરુષો નાત્ર સંશયઃ ॥
નારી ચ દાલ્ભ્ય ધર્મજ્ઞ વ્રતમેતદ્યથાવિધિ

યા કરોતિ ન સા શોચ્યા બન્ધુવર્ગસ્ય જાયતે ॥
વૈધવ્યં દુર્ભગત્વં વા ભર્તૃવ્યઙ્ગ્યં ચ સત્તમ

નાપ્નોતિ જન્મત્રિતયમેતચ્ચીર્ત્વા પતિવ્રતા

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે અશૂન્યશયનદ્વિતીયાવર્ણનો નામ પઞ્ચચત્વારિંશદુત્તરશતતમોઽધ્યાયઃ