Vishnudharmottara Purana · Chapter 1.144

vajra uvāca //
kasminbahuphalaṃ śrāddhaṃ deśe brāhmaṇapuṅgava //
etatsarvaṃ samācakṣya bhavānbrahma ivāparaḥ

mārkaṇḍeya uvāca //
gayāśīrṣavaṭe śrāddhamakṣayyaṃ parikīrtitam //
yadarthameṣā carati gāthā loke purātanī

eṣṭavyā bahavaḥ putrā yadyekopi gayāṃ vrajet //
yajeta vāśvamedhena nīlaṃ vā vṛṣamutsṛjet

puṣkareṣvakṣayaṃ śrāddhaṃ prayāge naimiṣe tathā //
vārāṇasyāṃ prabhāse ca kurukṣetre samantataḥ

sannihatyāṃ viśeṣeṇa rāhugraste niśākare //
(rāhugraste dinakare sannītyāṃ pārthivottama)

śrāddhaṃ kṛtvā samāpnoti rājasūyaśataṃ naraḥ //
aśvamedhasahasrasya samyagiṣṭasya yatphalama

snāta eva tadāpnoti kṛtvā śrāddhaṃ sa mānavaḥ//
sarveṣu devalokeṣu kāmacārī virājate

padmavarṇena yānena kiṅkiṇījālamālinā //
devarāmāgaṇāḍhyena vīṇāmurajanādinā

divyaśvetāśvayuktena kāmagena yathāsukham //
ābhūtasaṃplavaṃ yāvatkrīḍatyapsarasāṃ gaṇaiḥ

kṛtakṛtyaśca bhavati pitṝṇāmanṛṇastathā //
śrāddhaṃ tathā pitṝṇāṃ ca nopayujyeta vai punaḥ

yatra kvacana gaṅgāyāṃ śrāddhasyānantyamucyate //
yamasya bhaginī devī yamunā pāpanāśinī

yatra kvacana tasyāṃ hi śrāddhasyānantyamucyate//
pitṝṇāṃ duhitā rājannarmadā saritāṃ varā

tasyāstīre tathānantaṃ śrāddhaṃ sarvatra pārthiva //
akṣayyaṃ ca tathā śrāddhamamarāntikaparvate

varāhaparvate rājañchrāddhasyānantyamucyate //
himavānparvataśreṣṭhaḥ śaṅkaraśvaśuro giriḥ

ākaraḥ sarvaratnānāṃ sarvasattvasamāśrayaḥ //
tāpasānāmadhīvāsaḥ śrāddhaṃ tatrā'kṣayaṃ bhavet

evamādiṣu tīrtheṣu parvateṣu saritsu ca //
sarovareṣu mukhyeṣu ṛṣīṇāmāśrameṣu ca

nirjhareṣu tathāraṇye nadīnāṃ prabhaveṣu ca //
saṅgameṣu ca mukhyeṣu pulineṣu viśeṣataḥ

udyāneṣu vicitreṣu saikateṣu sameṣu ca//
śādvaleṣu ca ramyeṣu girīṇāṃ kandarāsu ca

gahvareṣu nitambeṣu cchāyāyāṃ kuñjarasya ca //
mahīgatāntaranyastagajacchāyāsu pārthiva

yaḥ kuryādaparāhṇe tu sakṛcchrāddhaṃ prayatnataḥ //
akṣayyamannapānaṃ tu pitṝṇāṃ copatiṣṭhate

gomayenopalipteṣu śrāddhaṃ kāryaṃ gṛheṣu ca//
manojñeṣu vicitreṣu rucireṣūttameṣu ca

devāyatanagoṣṭheṣu śrāddhaṃ bahuphalaṃ bhavet

tīrthāni yānīha narendracandra loke purāṇaiḥ parikīrtitāni //
tīreṣu teṣāṃ vidhivatpradāya śrāddhaṃ na śocenmaraṇaṃ jitātmā

iti śrīviṣṇudharmottare mārkaṇḍevajrasaṃvāde śrāddhadeśānukīrtano nāma catuścatvāriṃśaduttaraśatatamo'dhyāyaḥ