Vishnudharmottara Purana · Chapter 1.143

// vajra uvāca // //
kasmai śrāddhaṃ na dātavyaṃ kena bhuktaṃ mahāphalam //
bhavatīha dvijaśreṣṭha tanmamācakṣva pṛcchataḥ

mārkaṇḍeya uvāca // //
anūḍhātanayo rājanyaśca paunarbhavaḥ sutaḥ //
śūdrāpatirdurācāro vāṇijyāyudhajīvakaḥ

tathā vārdhuṣiko yaśca śūdrasya ca purohitaḥ //
parvakārastathā sūcī yasya copapatirgṛhe

kṛtvā nakṣatranirdeśaṃ yaśca jīvati pārthiva //
cikitsitena ca tathā yasya vṛttirnareśvara

vedavikrayako yaśca vedanindaka eva ca //
tarkaśāstreṇa dagdhaśca nāstiko dharmavarjitaḥ

pitrā vivadamānaśca yaścaivopanayedbahūn //
ayājyayājī stenaśca yakṣmī kitava eva ca

śvitrī ca yastathā kāṇo badhiro'ndhaḥ kuṇistathā //
parapūrvāpatiścaiva grāmapreṣyo nirākṛtiḥ

avakīrṇī kuṇḍagolau kunakhī śyāvadantakaḥ //
kanyādūṣyabhiśaptaśca mitradhukpiśunastathā

parivittiḥ parivettā tasya kanyāpradaśca yaḥ //
yājakaśca tathā tasya somavikrayakastathā

kūṭasākṣī ca vāgduṣṭaḥ paradāro vikarmakaḥ //
tathā daivāpaviddhāgniḥ viruddhajanakastathā

yaśca hīnātiriktāṅgo duścarmā damakastathā //
yaśca yuktastathā rājanpātakaiścopapātakaiḥ

dviṣanmitre ubhe caiva prayatnena vivarjayet //
ataḥ paraṃ pravakṣyāmi brāhmaṇānpaṅktipāvanān

brahmadeyānusantānaḥ tapasvī vijitendriyaḥ //
pārago yajuṣāṃ yaśca sāmavedasya pāragaḥ

ṛgvedapārago yaśca bhṛgvaṅgirasapāragaḥ //
atharvaśiraso'dhyetā trisuparṇasya pāragaḥ

triṇāciketaḥ pañcāgnidharmaśāstraviśāradaḥ //
purāṇapārago yaśca itihāsaviśāradaḥ

adhīte sottaraṃ yaśca viṣṇudharmamidaṃ śubham //
vijānāti yathāvacca yaśca vyākaraṇaṃ nṛpa

jyotiṣaśca tathā vettā āyurvedasya ca dvijaḥ //
tābhyāṃ vṛttiṃ na cetkuryādvṛttistābhyāṃ vigarhitā

āhitāgniśca yo vidvānsomapaśca dvijottamaḥ //
guruśuśrūṣaṇaparastīrthapūtaśca yādava //
gāyatrījāpanirato yogī dhyānaparāyaṇaḥ

yasyāpyanante jagatāmadhīśe bhaktiḥ parā yādava devadeve //
tasmātparaṃ nāparamasti kiñcitpātraṃ triloke puruṣapravīra

iti śrīviṣṇudharmottare prathamakhaṇḍe mārkaṇḍeyavajrasaṃvāde pātrāpātraparīkṣāvidhirnāma tricatvāriṃśaduttaraśatatamo'dhyāyaḥ