Vishnudharmottara Purana · Chapter 1.139

// vajra uvāca //
vaivasvate'ntare prāpte prathame bhṛgunandana //
śrāddhaṃ pradarśitaṃ kena tanmamācakṣva pṛcchataḥ

mārkaṇḍeya uvāca //
hiraṇyākṣavadhe pūrvaṃ yadā tyaktvā dharādharāḥ //
dharāṃ sapakṣā khagamāḥ khaṃ gatā manujeśvara

dharādharaparityaktā tadā calitabandhanā //
dharā sthānāccyutā vegātpraviveśa rasātalam

hiraṇyākṣaṃ tadā hatvā nṛvarāho janārdanaḥ /
prothena ca karābhyāṃ ca vidhārya vasudhāṃ balāt

saṃpūjyamānastridaśaiḥ praviveśa rasātalam //
rasātalatalaṃ gatvā śeṣamūrtau svake sthitaḥ

daṃṣṭrāgreṇa samuddhṛtya mahīṃ dadhre tadā bhuje //
vāmabāhuniviṣṭāṃtāṃ kṛtvā tridaśapuṅgavaḥ

ujjahāra mahātejā lokānāṃ hitakāmyayā //
ratnajvālāvalīpuñjadurvibhāvyamukhāmbujaḥ

śeṣastuṣṭāva deveśaṃ tasminkāle jagadgurum//
puraṃdhriveśā vasudhā devaṃ tadbāhusaṃsthitā

tadā tuṣṭāva bhūpāla ramaṇīyatamākṛtiḥ //
uddhṛtya vasudhāṃ sthāne sthāpayitvā tathā svake

jagāma bhūmau dharmajña varāhaṃ nāma parvatam //
kalpārambhe varāhasya paramūrteḥ saśailatām

tāṃ samāsādya dharmātmā devaḥ sarvagataḥ prabhuḥ //
daṃṣṭāgralagnaṃ mṛtpiṇḍaṃ gṛhītvā dakṣiṇe kare

prasvedācca tilānkṛtvā darbhānromabhya eva ca //
jalaprasravaṇābhyāśe tasmingirivare tadā

dakṣiṇāgrām̐stu vinyasya darbhāṃstānmadhusūdanaḥ //
mṛtpiṇḍānsatilām̐steṣu dattavām̐strīnnarādhipa

dattvā ca gandhapuṣpādyaiḥ pūjayāmāsa dhārmikaḥ //
pūjayitvā ca maryādāṃ kṛtavānsa narādhipa

adyaprabhṛti lokeṣu pretānuddiśya vai pitṝn //
ye tu śrāddhaṃ kariṣyanti teṣāṃ puṣṭirbhaviṣyati

śrāddhakāle tathā tena piṇḍanirvapaṇaṃ tathā //
pitṝṇāṃ ye kariṣyanti teṣāṃ puṣṭirbhaviṣyati

pitā pitāmahaścaiva tathaiva prapitāmahaḥ //
pūjayā te bhaviṣyanti svayaṃ piṇḍeṣu nityadā

teṣāṃ trayaḥ pūjitāśca bhaviṣyanti tathāgnayaḥ //
trayo lokāstrayo devāstathaiva ca yugatrayam

pūjitāśca trayo devā brahmaviṣṇumaheśvarāḥ //
pūjitaistairbhaviṣyāmi caturātmā tathāpyaham

pituḥ paitāmahaḥ piṇḍo vāsudevaḥ prakīrtitaḥ //
paitāmahaśca nirdiṣṭastathā saṃkarṣaṇaḥ prabhuḥ

pitṛpiṇḍaśca vijñeyaḥ pradyumnaścāparājitaḥ //
ātmā'niruddho vijñeyaḥ piṇḍanirvapaṇaṃ budhaiḥ

śrāddhaṃ kartuṃ kathaṃ śakyaṃ śakyaṃ vinā vaiṣṇavatejasā //
evaṃ saṃpūjitastena caturātmā tvahaṃ sthitaḥ

bhaviṣyāmi pradāsyāmi tasya kāmānyathepsitān//
catvāraḥ pūjitā vedāścatvāraśca tathāgnayaḥ

catvāraśca yugāstena catasraśca diśastathā //
catvāraśca tathā varṇāścatvāraśca tathāśramāḥ

catvāro lokapālāśca bhaviṣyantīha pūjitāḥ //
evaṃ kṛtvā sa maryādāṃ tatraivāntaradhīyata //
tataḥ prabhṛti loke'smiñchrāddhaṃ sadbhiḥ prakīrtitam

svargaṃ ca mokṣaṃ ca yaśaḥ sukhāni rājyaṃ ca putrānatha bhūmipāla //
striyaśca mukhyā vividhāṃśca kāmāndeveśvaraḥ śrāddhakṛto vidhatte

iti śrīviṣṇudharmottare prathamakhaṇḍe mārkaṇḍeyavajrasaṃvāde śrāddhotpattirnāmaikonacatvāriṃśaduttaraśatatamo'dhyāyaḥ