Vishnudharmottara Purana · Chapter 1.138

// vajra uvāca //
vartante pitaraḥ svarge keṣāṃcinnarake tathā //
narakasthāḥ phalaṃ dātuṃ kathaṃ śaktā vadasva me

mārkaṇḍeya uvāca //
pitṝṇāṃ tu gaṇāḥ sapta nāmatastānnibodha me //
trayo'mūrtimataścaiṣāṃ catvāraśca samūrtayaḥ

subhāsurā barhiṣado'gniṣvāttāstathaiva ca //
trayo mūrtimataścaiṣāṃ catvāraścāpyamūrtayaḥ

kravyādāścopahūtāśca ājyapāśca sukālinaḥ //
mūrtimantaḥ pitṛgaṇāścatvāraśca prakīrtitāḥ

subhāsvarā brahmasutāḥ somamāpyāyayanti ye //
brahmalokacarā rājannityaṃ mūrtivivarjitāḥ

tathā barhiṣado nāma rājaputrā marīcinaḥ //
āpyāyayanti te devām̐lloke somapade sthitāḥ

vibhrājaloke tiṣṭhanti agniṣvāttā narādhipa //
pulastyasya ṛṣeḥ putrā bhaviṣyanti jaganti te

dānavānyakṣagandharvānpiśācoragarākṣasān //
daityānbhūtapiśācāṃśca vidyādharagaṇāṃstathā

nāgānsarpānsuparṇāṃśca parvatānsaritastathā //
kravyādām̐ścopahūtāṃśca ajyapām̐śca sukālinaḥ

brāhmaṇānkṣatriyānvaiśyānbhāvayantyantyajām̐stathā //
kaverāṅgirasaścaiva kardamasya prajāpateḥ

vasiṣṭhasya tathā putrāḥ krameṇaite prakīrtitāḥ //
jyotirbhāsaḥ smṛtā loke ye ca lokā marīcinaḥ

tejesvino māna sāśca krameṇaite prakīrtitāḥ //
ete śrāddhasya bhoktāro viśvedevaiḥ sadā saha

ete śrāddhaṃ sadā bhuktvā pitṝnsaṃtarpayantyataḥ //
yatra kvacana dharmajña vartamānā hi yogataḥ

ete ca puṣṭyā viniyojayanti śrāddhasya dātāramadīnasattvāḥ //
tṛptāstathaite viniyojayanti dātuḥ pitṝnsarvagatānmahīpa

iti śrīviṣṇudharmottare prathamakhaṇḍe mārkaṇḍeyavajrasaṃvāde pitṛsvarganarakanivāsahetunirṇayonāmāṣṭatriṃśaduttaraśatatamo'dhyāyaḥ /