વિષ્ણુધર્મોત્તરપુરાણમ્ · અધ્યાય 1.138

॥ વજ્ર ઉવાચ ॥
વર્તન્તે પિતરઃ સ્વર્ગે કેષાંચિન્નરકે તથા ॥
નરકસ્થાઃ ફલં દાતું કથં શક્તા વદસ્વ મે

માર્કણ્ડેય ઉવાચ ॥
પિતૄણાં તુ ગણાઃ સપ્ત નામતસ્તાન્નિબોધ મે ॥
ત્રયોઽમૂર્તિમતશ્ચૈષાં ચત્વારશ્ચ સમૂર્તયઃ

સુભાસુરા બર્હિષદોઽગ્નિષ્વાત્તાસ્તથૈવ ચ ॥
ત્રયો મૂર્તિમતશ્ચૈષાં ચત્વારશ્ચાપ્યમૂર્તયઃ

ક્રવ્યાદાશ્ચોપહૂતાશ્ચ આજ્યપાશ્ચ સુકાલિનઃ ॥
મૂર્તિમન્તઃ પિતૃગણાશ્ચત્વારશ્ચ પ્રકીર્તિતાઃ

સુભાસ્વરા બ્રહ્મસુતાઃ સોમમાપ્યાયયન્તિ યે ॥
બ્રહ્મલોકચરા રાજન્નિત્યં મૂર્તિવિવર્જિતાઃ

તથા બર્હિષદો નામ રાજપુત્રા મરીચિનઃ ॥
આપ્યાયયન્તિ તે દેવાઁલ્લોકે સોમપદે સ્થિતાઃ

વિભ્રાજલોકે તિષ્ઠન્તિ અગ્નિષ્વાત્તા નરાધિપ ॥
પુલસ્ત્યસ્ય ઋષેઃ પુત્રા ભવિષ્યન્તિ જગન્તિ તે

દાનવાન્યક્ષગન્ધર્વાન્પિશાચોરગરાક્ષસાન્ ॥
દૈત્યાન્ભૂતપિશાચાંશ્ચ વિદ્યાધરગણાંસ્તથા

નાગાન્સર્પાન્સુપર્ણાંશ્ચ પર્વતાન્સરિતસ્તથા ॥
ક્રવ્યાદાઁશ્ચોપહૂતાંશ્ચ અજ્યપાઁશ્ચ સુકાલિનઃ

બ્રાહ્મણાન્ક્ષત્રિયાન્વૈશ્યાન્ભાવયન્ત્યન્ત્યજાઁસ્તથા ॥
કવેરાઙ્ગિરસશ્ચૈવ કર્દમસ્ય પ્રજાપતેઃ

વસિષ્ઠસ્ય તથા પુત્રાઃ ક્રમેણૈતે પ્રકીર્તિતાઃ ॥
જ્યોતિર્ભાસઃ સ્મૃતા લોકે યે ચ લોકા મરીચિનઃ

તેજેસ્વિનો માન સાશ્ચ ક્રમેણૈતે પ્રકીર્તિતાઃ ॥
એતે શ્રાદ્ધસ્ય ભોક્તારો વિશ્વેદેવૈઃ સદા સહ

એતે શ્રાદ્ધં સદા ભુક્ત્વા પિતૄન્સંતર્પયન્ત્યતઃ ॥
યત્ર ક્વચન ધર્મજ્ઞ વર્તમાના હિ યોગતઃ

એતે ચ પુષ્ટ્યા વિનિયોજયન્તિ શ્રાદ્ધસ્ય દાતારમદીનસત્ત્વાઃ ॥
તૃપ્તાસ્તથૈતે વિનિયોજયન્તિ દાતુઃ પિતૄન્સર્વગતાન્મહીપ

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે પિતૃસ્વર્ગનરકનિવાસહેતુનિર્ણયોનામાષ્ટત્રિંશદુત્તરશતતમોઽધ્યાયઃ ।