Vishnudharmottara Purana · Chapter 1.134

mārkaṇḍeya uvāca //
prāsādeṣu vicitreṣu tathā maṇigṛheṣu ca //
puṣpaveśmasu ramyeṣu tathā vastragṛheṣu ca

ratnaveśmasu mukhyeṣu tathā citragṛheṣu ca //
parvatānāṃ ca durgeṣu nadīnāṃ pulineṣu ca

padminīṣu ca phullāsu tathā cotpalinīṣu ca //
śayyāsu ca parārdhyāsu puṣpaśayyāsu cāpyatha

ramayāmāsa tāṃ devīṃ tathā viraciteṣu ca //
gṛheṣu bahuratneṣu dhūpodgāriṣu pārthiva

reme sa tu tayā sārdhaṃ mānaseṣu punaḥpunaḥ //
ramayam̐stāṃ varārohāṃ na tṛpyati sa nityaśaḥ

niśāsu ca sacandrāsu candrakāntataraṃ mukham //
papau tasyā yathākāmaṃ narendraḥ sa narādhipa

niśāsu naṣṭacandrāsu tanmukho dyotitaprabhe //
deśe tāṃ ramayāmāsa rājā rājīvalocanaḥ

varṣayantī narendrasya sā tu kāmaṃ dinedine //
adṛṣṭapūrveva śubhā bhavatyāyatalocanā

rājño dṛḍhaṃ sā dayitā tasyāśca dviguṇo nṛpaḥ //
tayā'sau prīyate rājā tena sāpi varāṅganā

varacandanadigdhāṅgau nānābharaṇabhūṣitau //
remāte dampatī hṛṣṭau nānāratnāvabhūṣitau

alaṅkaroti tāṃ rājā svayameva kadācana //
tayā'laṃkriyamāṇaśca prītimāpnotyanuttamām

vareṣu tau vicitreṣu remāte muditau bhṛśam //
keśānsaṃśobhayantau tau kusumaistu parasparam

urvaśyabhyuditaṃ puṣpaṃ tathā ca grathitaṃ punaḥ //
dhārayāmāsa śirasā premṇā pārthivasattamaḥ

patracchedena yām̐ścakre tilakānsa narādhipaḥ //
tām̐śca sā dhārayāmāsa lalāṭe cāruhāsinī

evaṃ saṃkrīḍato rājñastayā saha sumadhyayā //
babhūvustanayāḥ pañca nāmatastānnibodha me

āyurjyeṣṭhastato dhīmām̐stataścānyastvanāmayaḥ //
ayutāyuścaturtho'bhūcchatāyuścaiva pañcamaḥ

evaṃ tasyāḥ prasūtā vai yāti kāle manohare

gandharvamukhyāstu tadā sametā tayā vihīnā bhṛśamutsukāstu //
tadāgamāyātha surendraloke yatra tadā cakruradīnasattvāḥ

iti śrīviṣṇudharmottare prathamakāṇḍe mārkaṇḍeyavajrasaṃvāde urvaśīsambhogavarṇano nāma catustriṃśaduttaraśatatamo'dhyāyaḥ