વિષ્ણુધર્મોત્તરપુરાણમ્ · અધ્યાય 1.134

માર્કણ્ડેય ઉવાચ ॥
પ્રાસાદેષુ વિચિત્રેષુ તથા મણિગૃહેષુ ચ ॥
પુષ્પવેશ્મસુ રમ્યેષુ તથા વસ્ત્રગૃહેષુ ચ

રત્નવેશ્મસુ મુખ્યેષુ તથા ચિત્રગૃહેષુ ચ ॥
પર્વતાનાં ચ દુર્ગેષુ નદીનાં પુલિનેષુ ચ

પદ્મિનીષુ ચ ફુલ્લાસુ તથા ચોત્પલિનીષુ ચ ॥
શય્યાસુ ચ પરાર્ધ્યાસુ પુષ્પશય્યાસુ ચાપ્યથ

રમયામાસ તાં દેવીં તથા વિરચિતેષુ ચ ॥
ગૃહેષુ બહુરત્નેષુ ધૂપોદ્ગારિષુ પાર્થિવ

રેમે સ તુ તયા સાર્ધં માનસેષુ પુનઃપુનઃ ॥
રમયઁસ્તાં વરારોહાં ન તૃપ્યતિ સ નિત્યશઃ

નિશાસુ ચ સચન્દ્રાસુ ચન્દ્રકાન્તતરં મુખમ્ ॥
પપૌ તસ્યા યથાકામં નરેન્દ્રઃ સ નરાધિપ

નિશાસુ નષ્ટચન્દ્રાસુ તન્મુખો દ્યોતિતપ્રભે ॥
દેશે તાં રમયામાસ રાજા રાજીવલોચનઃ

વર્ષયન્તી નરેન્દ્રસ્ય સા તુ કામં દિનેદિને ॥
અદૃષ્ટપૂર્વેવ શુભા ભવત્યાયતલોચના

રાજ્ઞો દૃઢં સા દયિતા તસ્યાશ્ચ દ્વિગુણો નૃપઃ ॥
તયાઽસૌ પ્રીયતે રાજા તેન સાપિ વરાઙ્ગના

વરચન્દનદિગ્ધાઙ્ગૌ નાનાભરણભૂષિતૌ ॥
રેમાતે દમ્પતી હૃષ્ટૌ નાનારત્નાવભૂષિતૌ

અલઙ્કરોતિ તાં રાજા સ્વયમેવ કદાચન ॥
તયાઽલંક્રિયમાણશ્ચ પ્રીતિમાપ્નોત્યનુત્તમામ્

વરેષુ તૌ વિચિત્રેષુ રેમાતે મુદિતૌ ભૃશમ્ ॥
કેશાન્સંશોભયન્તૌ તૌ કુસુમૈસ્તુ પરસ્પરમ્

ઉર્વશ્યભ્યુદિતં પુષ્પં તથા ચ ગ્રથિતં પુનઃ ॥
ધારયામાસ શિરસા પ્રેમ્ણા પાર્થિવસત્તમઃ

પત્રચ્છેદેન યાઁશ્ચક્રે તિલકાન્સ નરાધિપઃ ॥
તાઁશ્ચ સા ધારયામાસ લલાટે ચારુહાસિની

એવં સંક્રીડતો રાજ્ઞસ્તયા સહ સુમધ્યયા ॥
બભૂવુસ્તનયાઃ પઞ્ચ નામતસ્તાન્નિબોધ મે

આયુર્જ્યેષ્ઠસ્તતો ધીમાઁસ્તતશ્ચાન્યસ્ત્વનામયઃ ॥
અયુતાયુશ્ચતુર્થોઽભૂચ્છતાયુશ્ચૈવ પઞ્ચમઃ

એવં તસ્યાઃ પ્રસૂતા વૈ યાતિ કાલે મનોહરે

ગન્ધર્વમુખ્યાસ્તુ તદા સમેતા તયા વિહીના ભૃશમુત્સુકાસ્તુ ॥
તદાગમાયાથ સુરેન્દ્રલોકે યત્ર તદા ચક્રુરદીનસત્ત્વાઃ

ઇતિ શ્રીવિષ્ણુધર્મોત્તરે પ્રથમકાણ્ડે માર્કણ્ડેયવજ્રસંવાદે ઉર્વશીસમ્ભોગવર્ણનો નામ ચતુસ્ત્રિંશદુત્તરશતતમોઽધ્યાયઃ