Vishnudharmottara Purana · Chapter 1.133

mārkaṇḍeya uvāca //
ityuktā rambhayā vākyaṃ dṛṣṭvā rājānamāgatam //
hṛṣṭā sasādhvasā devī babhūvātha tathorvaśī

atyāścaryamabhūddṛṣṭe rājñi tasyāḥ śubhānane //
romāñcitatanutvaṃ ca saprasvedaṃ samābabhau

tāmuvāca tato rambhā śṛṇūrvaśi vaco mama /
nehāgame'sya nṛpateḥ kāryamalpaṃ bhaviṣyati

rājā sukhāsahāyo'yaṃ praviṣṭo niśi kānanam //
pracchanne śṛṇuvastāvadasya vākyāni bhūpateḥ

evamastvityuvācātha rambhāṃ nārāyaṇātmajā //
māyācchannaśarīre te tataścāyayaturnṛpam

rājānaṃ cārusarvāṅgaṃ papraccha tu tadā sakhā //
rājño bahumato nityaṃ guṇavām̐ścātidhārmikaḥ

sakhovāca //
yataḥ prabhṛti rājendra tridivāttvamihāgataḥ //
tataḥ prabhṛti cāsvastho mayā dṛṣṭo'si mānada

tadasvāsthyaṃ kāmakṛtaṃ jñātavānasmi te nṛpa //
tanmamācakṣva te guhyaṃ na cennaravarottama

purūravā uvāca //
tava guhyaṃ na me kiñcitkadācidapi vidyate //
asvāsthyakāraṇaṃ saumya tava vakṣyāmyathātmanaḥ

nārāyaṇasutā kāntā rūpeṇāpratimā śubhā //
urvaśīnāmataḥ khyātā mayā dṛṣṭā varāpsarāḥ

yataḥ prabhṛti cārvaṅgī tataḥ prabhṛti me sakhe //
kāmenāloḍyate cittaṃ na ca śāmyati me tathā

na copāyaṃ prapaśyāmi tasyā lābhe dvijottama //
devatānāmapi śubhā durlabhā sā varāṅganā

evaṃ duḥkhaparītasya sakhe kālo gato mama //
upabhuktā mayā svapne sādya cārvasitekṣaṇā

candrakāntagṛhe hyasminkāmamārgaṇatāḍitā //
candrodaye cārumukhī trailokyasyaikasundarī

vinodanārthaṃ hi sakhe manaso'ti manoharam //
candrodaye tataḥ prāptaṃ candrakāntaśilāgṛham

tadehi tvasti saumya praviśya ruciraṃ gṛham //
vinodayāmi hṛdayaṃ manmathena vaśīkṛtam

sakhovāca //
yathā dṛṣṭaṃ tvayā svapne tathādya bhavitā dhuvam //
sāpi kāmaparītāṅgī tvāmupeśyati bhāminī

mārkaṇḍeya uvāca //
evamuktvā viveśātha candrakāntaśilāgṛham //
āsāñcakre tadā tasminmadanena vaśīkṛtaḥ

/
urvaśī rambhayā sārdhaṃ tacchrutvā harṣamāgatā //
ātmānaṃ darśayāmāsa rambhāpi nṛpatestadā

jayetyuktvā mahīnāthaṃ rambhā kāmavaśāttadā ///
babhūva puratastasya śobhayantīva tadgṛham

tāmuvāca tato rājā svāgataṃ te varānane //
alaṅkuruṣva cārvaṅgi ratnāsanamidaṃ śubham

ratnāsanopaviṣṭāyāṃ tadāgamanavismitaḥ //
tadā rājīvaraktākṣastāmuvāca varānanām

śakrasya nagaraṃ rambhe rājate nityaśastvayā //
paurṇamāsyā yathā rātriḥ śaśāṅkeneva bhāmini

tvaṃ sabhāmaṇḍanaṃ tasya sacchiṣyā tvaṃ ca tumburoḥ //
tvayābhibhūtāssakalāḥ striyaḥ suptāḥ suśobhane

tvayābhibhūtāḥ sakalāḥ striyaḥ svarge suśobhane //
tava netrasahasreṇa paśyannapi tu pākahā

sarvatra cārusarvāṃgi na tṛpyati śubhānane //
tanmamācakṣva subhage ihāgamanakāraṇam

rambhovāca //
śṛṇuṣvāvahito rājanmamāgamanakāraṇam //
śrutvā tacca narendrendra kuruṣva vacanaṃ mama

nārāyaṇasutā devī tatra trailokyasundarī //
urvaśī nāma cārvaṅgī bhūmipāla sakhī mama

sā tvāṃ dṛṣṭvā mahendrasya sadane kāmamohitā //
na śarma labhate bālā hāheti vadatī muhuḥ

sā tvadarthamanaṃgena mārgaṇairbhṛśapīḍitā //
lāvaṇya śeṣā saṃvṛttā dinaiḥ katipayaiḥ śubhā

kṣāmakṣāmakapolā sā tvatsamarpitamānasā //
madanenābhitaptāṃgī mānamutsṛjya bhāminī

prasthitā sā mayā sārddhaṃ tava darśanalālasā //
antarā nāradenoktā yatra tvaṃ prasthitā śubhe

tatra tvayā tu vastavyaṃ samayena varānane //
meṣadvayaṃ tu putratve yattvayā parikalpitam

tattu te śayanābhyāśe sthāpayetsatataṃ yadi //
sa rājā cārusarvāṅgi nagno nekṣeta bhāmini

maithunaṃ cāpyakāmāyā nāsau te kartumarhati //
ghṛtāhārā tathā tatra vasa tvaṃ subhage sadā

ekasminnapyatikrānte samaye yadi pārthivam //
na tyakṣyasi tadā saumye śilābhūtā bhaviṣyasi

etāni samayānyuktā nāradena sakhī mama//
tāni tvaṃ pratipadyasva bhajasva ca śubhānanām

/
purūravā uvāca //
rambhe tavādya vākyena amṛteneva bhāmini //
mṛtyorvaśamanuprāpto jīvito'smi śubhānane

mamāpi tatkṛte rambhe madanaḥ śaravṛṣṭibhiḥ //
dunoti hadayaṃ subhrūrdivārātramatandritaḥ

sā tvaṃ jīvaya māṃ śīghraṃ darśayasva varāṅganām //
sthāsyāmi samaye tasminyasminmāṃ vakṣyase śubhe

kṛtaṃ taṃ samayaṃ viddhi nāradena yadīritam//
anākrande nimagnasya mama kāmamahodadhau

plavo bhava viśālākṣi prāṇadā bhava sundari //
mārkaṇḍeya uvāca // evamuktā narendreṇa rambhā cāntardadhe tadā

urvaśīsahitā cātha darśayāmāsa sā nṛpam //
jayetyuktvā narendraṃ tu tadā nārāyaṇātmajā

vrīḍitā puratastasthau tasya rājño mahātmanaḥ //
tāṃ dṛṣṭvā prītimāpātha sa narendro mahādyutiḥ

pulakāṃcita sarvāṅgo varṇituṃ sā na śakyate //
pāṇāvādāya trapitāmutsaṅge copaveśayat

ratnāsanaṃ tathā bheje rambhāpi sumanoharam //
tataścovāca vacanaṃ rājā muditamānasaḥ

purūravā uvāca //
kāmadevaḥ prasanno'dya mamorvaśi varāvane //
adya vedūmyadhikaṃ subhrūḥ śakrādātmānamātmanā

trailokyarājyalābhe'pi kutaḥ sā me śubhe ratiḥ //
ājñākāritvamāsādya yā tavādya sulocane

mārkaṇḍeya uvāca //
evaṃ vadati bhūpāle yayau rambhā varānanā //
kṣaṇena meṣasahitā punaḥ prāptā nṛpāntikam

meṣau dattvā narendrasya rājānaṃ vākyamabravīt //
rambhovāca //
yāsyāmi laṅkāṃ rājendra tatra prāṇeśvaro mama

matpratīkṣaḥ sthitaḥ śrīmāndhanadasyātmasaṃbhavaḥ //
nalakūbaranāmāsau trailokyaviditaḥ prabho

yathā ceyaṃ sakhī mahyaṃ notkaṇṭhāṃ kurute śubhā //
sakhījanasya svargyasya tathā kāryaṃ tvayānagha

purūravā uvāca //
yatiṣye'haṃ tathā kartuṃ nirvṛtā bhava mānade //
ratnānyetānyupādāya nirgacchasva yathāsukham

mārkaṇḍeya uvāca //
evamuktā tato rambhā nṛpateḥ prītikāraṇāt //
ratnānyupādāya yayau khena laṅkāṃ mahāpurīm

labdhvorvaśīṃ narendro'pi reme sa sahitastayā //
yathā śacyā surārighno balavānpākaśāsanaḥ

saṃnyastabhāraḥ sa tu mantrimukhye reme tayā yādavasiṃhamukhya//
lakṣmyā sameto bhagavānananto yathā sa devo bhuvanasya goptā

iti śrīviṣṇudharmottare prathamakhaṇḍe mārkaṇḍeyavajrasaṃvāde urvaśīpurūravaḥsamāgamo nāma trayastriṃśaduttaraśatatamo'dhyāyaḥ