Vishnudharmottara Purana · Chapter 1.131

mārkaṇḍeya uvāca
urvaśī rambhayā sārddhaṃ jagāma tvaritaṃ tadā //
kāmārttā siddhamārgeṇa sā dadarśātha nāradam

vrajantaṃ siddhamārgeṇa devalokādupāgatama //
sampūjya nāradaṃ subhrūḥ prayayāveva satvarā//
vrajantaṃ siddhamārgeṇa devalokādupāgatam //
sampūjya nāradaṃ subhrūḥ prayayāveva satvarā

tāmāha nārado rambhe keyaṃ te prasthitā sakhī //
rambhā śāpabhayāttasyāḥ sarvameva nyavedayat

tāmāha nārado bhūyaḥ śṛṇuṣva vacanaṃ mama //
urvaśī gatabhāveyaṃ mānuṣaṃ taṃ nareśvaram

śāpena tumbarormohāducitaṃ tatra vatsyati //
yathā śubhaṃ tathā kāryaṃ tvayā me vacanaṃ śubhe

samayenorvaśī tasya vasatvasitalocanā //
samayaścānayā kāryo yo rājñastaṃ nibodha me

meṣadvayaṃ tu putratve purā kṛtavatī śubhā //
tannityaṃ śayanābhyāśe sthāpanīyaṃ sulocane

āhāraṃ ghṛtamātraṃ ca kartavyamanayā tathā //
na draṣṭavyastathā nagno rājā rambhe purūravāḥ

na kartavyamakāmāyāstathā tena ca maithunam //
ekasminnapyatho bhagne samaye cārulocanā

yadi vatsyati rājānaṃ śilābhūtā bhaviṣyati //
urvaśī rambhayā sārdhamevamastviti nāradam

uktvā saṃpūjya ca muniṃ pratasthe punareva ca //
nārado vyagamadvipraḥ puraṃ vaiśravaṇasya ca

//
dadarśa ca pratiṣṭhānaṃ corvaśī rambhayā saha //
prākāreṇārkavarṇena kāñcanena virājitam

caturbhirgopuraiśśubhrai rājataiśca virājitam //
śobhanaṃ ca tathā ramyaṃ vidrumasya ca toraṇaiḥ

suvibhaktamahāraṇyaṃ mahārājapathaṃ śubham //
parikhābhirvicitrābhiḥ padminībhiralaṃkṛtam

khamullikhadbhiḥ prāsādaiḥ pāṇḍurairupaśobhitam //
śūrāḍhyajanabhūyiṣṭhaṃ divyaṃ puruṣasaṃyutam

vaṇigbhirupasaṃkīrṇa nānāpaṇyavibhūṣitam //
airāvatakulotpannaiścalatparvatasannibhaiḥ

kuñjarairbahusāhasraissaṃyutaṃ sumanoharaiḥ //
turagairvahnijātaiśca pavanasya samairjave

pānamattairnarairyuktamudyāneṣu tatastataḥ //
śaṅkhabherīmṛdaṅgānāṃ paṭahānāṃ ca niḥsvanaiḥ

vividhānāṃ ca vādyānāṃ vāditraṃ sarvaveśmagam //
brahmaghoṣaṃ mahāghoṣaṃ vīṇāveṇunināditam

hṛṣṭapuṣṭajanākīrṇaṃ sarvabādhāvivarjitam //
padmakiñjalkavarṇābhiryutaṃ strībhiḥ sahasraśaḥ

śyāmābhiśca mahārāja kāṇḍagaurībhireva ca // //
nānāveṣadharairyuktaṃ nānādeśodbhavaistathā

narairanekarūpaiśca śilpajñaiśca hyanekaśaḥ //
purasya tasya madhye sā dadarśa nṛpatergṛham /२२ //
madhye himācalasyeva kailāsaṃ parvatottamam //
śrīmadbhiḥ saṃyutaṃ ramyairgṛhamedhaiḥ sahasraśaḥ

sudhāvadātairvipulaiścandraraśmisamaprabhaiḥ //
kvacidrātnaiḥ kvacidraukmaiḥ kvacidbhūpāla rājataiḥ

maṇividrumasopānairmuktājālavibhūṣitaiḥ //
kvacicca puṣpadāmāḍhyairvaijayantīyutaiḥ kvacit

tasyāvidūre vipulaṃ vanaṃ caitrarathopamam //
rājñaḥ krīḍāvanaṃ ramyaṃ dadarśa vipulekṣaṇā

drumairbahuvidhairyuktaṃ puṣpapūgaphalopagaiḥ ///
padminībhirvicitrābhiḥ krīḍāśailairmanoharaiḥ

prāsādaiśca tathā ramyai ramyairmaṇigaṇaistathā //
tattu rambhāvanaṃ dṛṣṭvā sakhī vacanamabravīt

rājñaḥ krīḍāvane ramye gahane'sminsulocane //
māyācchannā nivatsyāvo yāvadastamayaṃ raveḥ

tato gatvā narendraṃ taṃ coktvā tava cikīrṣitam//
ahaṃ tvāṃ tu nayiṣyāmi savidhe tasya bhūpateḥ //
evamuktvā sakhī vākyaṃ nodayāmāsa corvaśī

krīḍāvanaṃ te ca tato'vatīrṇe taddevarāme sumanobhirāmam //
krīḍāvane tatra tathorvaśī sā sūryāstakālaṃ manasā samaicchat

iti śrīviṣṇudharmottare prathamakhaṇḍe mārkaṇḍeyavajrasaṃvāde krīḍāvanāvataraṇo nāmaikatriṃśaduttaraśatatamo'dhyāyaḥ