Vishnudharmottara Purana · Chapter 1.13

mārkaṇḍeya uvāca //
kosalāviṣaye sphīte tasminmanujapuṅgava //
devānāmapyayodhyāsti tvayodhyānāmataḥ purī

prākāraparikhopetā sarayūtīraśobhitā //
śobhitā bhavanairmukhyaiḥ suvibhaktamahāpathā

nityaprasannairmātaṅgairaṃjanācalasannibhaiḥ //
devanāgakulotpannaiḥ śatasaṃkhyairvirājitā

nirmāṃsavakraisturagaiḥ sukarṇaiśca manojavaiḥ //
dīrghagrīvākṣakūṭaiśca mahorujaghanairvṛtā

padmagarbhasavarṇāṅgyaḥ pūrṇacandranibhānanāḥ //
saṃlāpollāsakuśalā yatra veśyāḥ sahasraśaḥ

na tatpuṇyaṃ na sā vidyā na tacchilpaṃ na sā kriyā //
ayodhyāṃ prāpya yasyārthī nirāśaḥ pratigacchati //

udyānaśatasaṃbādhā samājotsavaśālinī //
arogavīrapuruṣā sarvatarkavivarjitā

vīṇāveṇumṛdaṅgānāṃ śabdaiḥ satatanāditā //
sadā prahṛṣṭamanujā bahuratnopaśobhitā

brahmaghoṣamahāghoṣā dvijavṛndopaśobhitā //
sājyadhūmodgamāḍhyena vāyunā naṣṭakilbiṣā

sugandhidhūpavikṣepa surabhīkṛtamārutā //
sugandhimanujākīrṇā nityamāpaṇavīthiṣu

yatra dīno jano nāsti malinaḥ kṛśito'pi vā //
vedanindāparaḥ kṣudro bhinnaseturna nāstikaḥ

vistīrṇā daśa madhye ca yojanānāṃ mahāpurī //
sarayūtīramāśritya yojanatrayamāyatā

manvantare'sminpunareva rājñā vinirmitā sā manunā nṛvīra! //
manvantaraṃ yena jagatsamagraṃ pālyaṃ yathāvadyaduvṛndanātha!

iti śrīviṣṇudharmmottare prathamakhaṇḍe mārkaṇḍeyavajrasaṃvāde ayodhyāvarṇanaṃ nāma trayodaśo'dhyāyaḥ