Vishnudharmottara Purana · Chapter 1.12

//vajra uvāca //
bhāratasyāsya varṣasya bhede'sminnavame prabho //
kimarthaṃ sāgaraḥ khātaḥ sa kṛtaḥ sagaraistathā

mārkaṇḍeya uvāca //
bhāratasyāsya varṣasya bhede'sminnavame nṛpa! //
navame ca diśāṃ bhāge pūrvasyāṃ diśi yādava

kośalo nāma viṣayaḥ prabhūtadhanadhānyavān //
sphītagrāmaguṇāḍhyo'sti nityaṃ mudita mānavaḥ

payasvinyaḥ payasvinyo yatra sasyadharā dharā //
mano'bhirāmā rāmāśca puruṣāḥ pauruṣāgragāḥ

vidagdhajanabhūyiṣṭhā sarvapuṇya samākulā //
nagarairna viśiṣyante yatra grāmā manoharāḥ

gavāṃ praveśe sāyāhne yatra grāmeṣu bhāskaraḥ //
dhūlipuñjaparikṣiptaḥ vanasānuvirājitaḥ

paścime prathame caiva yatra yāme virājitaḥ //
rātrau brahmadhvanistatra tiṣṭhatīva nabhastalam

phalāvanataśākhāḍhyāśchāyādrumasamā kulāḥ //
prapākūpataḍāgāḍhyā panthāno yatra yādava

vyādhitaskaradurbhikṣapararāṣṭrabhayāni ca //
janā yatra na jānanti nākālamaraṇaṃ tathā

yūpacihnā mahī yatra devaveśmāvataṃsikā //
yatrotpalasamākīrṇavaravāpīvibhūṣitā

udyāneṣu sadā yatra veṇugāndharvaniḥsvanam //
śilīmukharavairmiśraṃ yātyasaṃbādhatāṃ guṇaiḥ

yasminna kaściccyavate svadharmāddīno jano yatra na cāsti kaścit //
na netrahīno vikalendriyo vā vasundharā yatra yathārthanāmā

iti śrīviṣṇudharmottare prathamakhaṇḍe mārkaṇḍeyavajrasaṃvāde kosalavarṇano nāma dvādaśo'dhyāyaḥ