વિષ્ણુધર્મોત્તરપુરાણમ્ · અધ્યાય 1.13

માર્કણ્ડેય ઉવાચ ॥
કોસલાવિષયે સ્ફીતે તસ્મિન્મનુજપુઙ્ગવ ॥
દેવાનામપ્યયોધ્યાસ્તિ ત્વયોધ્યાનામતઃ પુરી

પ્રાકારપરિખોપેતા સરયૂતીરશોભિતા ॥
શોભિતા ભવનૈર્મુખ્યૈઃ સુવિભક્તમહાપથા

નિત્યપ્રસન્નૈર્માતઙ્ગૈરંજનાચલસન્નિભૈઃ ॥
દેવનાગકુલોત્પન્નૈઃ શતસંખ્યૈર્વિરાજિતા

નિર્માંસવક્રૈસ્તુરગૈઃ સુકર્ણૈશ્ચ મનોજવૈઃ ॥
દીર્ઘગ્રીવાક્ષકૂટૈશ્ચ મહોરુજઘનૈર્વૃતા

પદ્મગર્ભસવર્ણાઙ્ગ્યઃ પૂર્ણચન્દ્રનિભાનનાઃ ॥
સંલાપોલ્લાસકુશલા યત્ર વેશ્યાઃ સહસ્રશઃ

ન તત્પુણ્યં ન સા વિદ્યા ન તચ્છિલ્પં ન સા ક્રિયા ॥
અયોધ્યાં પ્રાપ્ય યસ્યાર્થી નિરાશઃ પ્રતિગચ્છતિ ॥

ઉદ્યાનશતસંબાધા સમાજોત્સવશાલિની ॥
અરોગવીરપુરુષા સર્વતર્કવિવર્જિતા

વીણાવેણુમૃદઙ્ગાનાં શબ્દૈઃ સતતનાદિતા ॥
સદા પ્રહૃષ્ટમનુજા બહુરત્નોપશોભિતા

બ્રહ્મઘોષમહાઘોષા દ્વિજવૃન્દોપશોભિતા ॥
સાજ્યધૂમોદ્ગમાઢ્યેન વાયુના નષ્ટકિલ્બિષા

સુગન્ધિધૂપવિક્ષેપ સુરભીકૃતમારુતા ॥
સુગન્ધિમનુજાકીર્ણા નિત્યમાપણવીથિષુ

યત્ર દીનો જનો નાસ્તિ મલિનઃ કૃશિતોઽપિ વા ॥
વેદનિન્દાપરઃ ક્ષુદ્રો ભિન્નસેતુર્ન નાસ્તિકઃ

વિસ્તીર્ણા દશ મધ્યે ચ યોજનાનાં મહાપુરી ॥
સરયૂતીરમાશ્રિત્ય યોજનત્રયમાયતા

મન્વન્તરેઽસ્મિન્પુનરેવ રાજ્ઞા વિનિર્મિતા સા મનુના નૃવીર! ॥
મન્વન્તરં યેન જગત્સમગ્રં પાલ્યં યથાવદ્યદુવૃન્દનાથ!

ઇતિ શ્રીવિષ્ણુધર્મ્મોત્તરે પ્રથમખણ્ડે માર્કણ્ડેયવજ્રસંવાદે અયોધ્યાવર્ણનં નામ ત્રયોદશોઽધ્યાયઃ