Vishnudharmottara Purana · Chapter 1.129

// vajra uvāca // //
urvaśī ca kathaṃ jātā budhajaṃ pārthivaṃ katham //
patiṃ kṛtavatī devī mānuṣaṃ tatprakīrtaya

mārkaṇḍeya uvāca //
sādhyau dharmasutau proktau naranārāyaṇāvṛṣī //
yau tau pūrvaṃ mahīpālau tāvubhau yadunandana

viṣṇoraṃśau mahāvīryau tapasyabhiratau sadā //
tayostadāśramaṃ ramyaṃ sugandhiviṭapadrumam

badaryāśramamityuktaṃ mṛdusparśahimaṃ śubham //
uṣṇatoyavahā gaṅgā śītatoyavahā parā

suvarṇasikatā ramyā kāñcanotpalamālinī //
tatra sā badarī ramyā nityapuṣpaphalopagā

tatra tau muniśārdūlau ghoraṃ tapa upāśritau //
bhavāya sarvalokasya sarvalokeśvarāvubhau

tayostapasyatorevaṃ mauneyāpsaraso daśa //
tayostu tapasā vighnaṃ saṃbhūya kṛtaniścayāḥ

taṃ pradeśamanuprāptā nānābharaṇabhūṣaṇāḥ //
pitāmahānna saumyo'sti kaścidrājañjagattraye

tāsāṃ darśanamāsādya naraḥ kāmavaśo bhavet //
kusumāni vicinvatyo lalantyaśca yathāsukham

dṛṣṭā nārāyaṇenātha sarvā bālamṛgekṣaṇāḥ //
tāsāmantargataṃ bhāvaṃ jñātvā vedavidāṃ varaḥ

jitakrodho mahātejā jitakāmo'rthadharmavit //
ādāya sahakārasya rasaṃ madanadīpanam

ūrvościtreṇa cārvaṅgīṃ nirmame'psarasaṃ śubhām //
ūrvoḥ kṛtā sā citreṇa citrākaraṇaśālinī

tasminneva kṣaṇe nārī babhūvāyatalocanā //
na devī na ca gandharvī nāsurī na ca pannagī

tādṛgvidhā triloke'sminyādṛśī sā varāṅganā //
tāṃ dṛṣṭvā vrīḍitāssarvā mauneyāpsaraso daśa

jagmuryathāgataṃ rājam̐stacchuśrāva purandaraḥ//
draṣṭuṃ kautūhalāttāṃ ca badaryāśramamāgataḥ

pādayornyapatadvajrī sādhyayordharmanityoḥ //
dadarśa ca śubhāṅgīṃ tāṃ śriyaṃ devīmivāparām

tamuvāca hasansādhyastadā nārāyaṇaḥ prabhuḥ //
mamorujātā dharmajña urvaśīyaṃ bhavediti

nayasva tridivaṃ caināṃ bhavatvapsarasāṃ śubhā //
evamukte mudaṃ prāpya abhivādya ca tāvṛṣī

anayattāṃ tataḥ svargaṃ devīṃ bālamṛgekṣaṇām //
śiṣyatve pradadau tvenāṃ gandharvasya ca tumburoḥ

tataḥ kadācicchakrasya nanarta puratastu sā //
upadeśamatikramya tumbaroścāruhāsinī

tāṃ śaśāpa sa gandharvo mānuṣye vatsyase śubhe //
devalokamimaṃ tyaktvā mānuṣeṇa sahānaghe

kañcitkālamupāsyaivaṃ mānuṣaṃ taṃ śucismite //
āgamya tridive tāvattasmādabhyasyase tataḥ

tenaiva sārdhaṃ tridive raṃsyase tvaṃ śubhānanā //
vaivasvatākhyasya manoryāvadantaramucyate

evaṃ hi śaptā nṛpavarya tena papāta rājanguruṇā nṛloke //
uvāsa rājñā sahitā tu tasmātsvargaṃ samāsādya tathaiva tena

//
iti śrīviṣṇudharmottare prathamakhaṇḍe mārkaṇḍeyavajrasaṃvāde urvaśīsaṃbhavo nāmaikonatriṃśadadhikaśatatamo'dhyāyaḥ