Vishnudharmottara Purana · Chapter 1.128

// mārkaṇḍeya uvāca //
janayāmāsa rājendra danurdānavapuṅgavān //
vipracittimukhānvīrāndaityapakṣamupāśritān

kālaṃ ca janayāmāsa kālakeyānsudāruṇān //
daityapakṣāśritānkrūrānviruddhāndevatāgaṇe

danāyuṣāyāḥ putrastu vṛtro nāma mahāsuraḥ //
viruddhastu sadā devairdaityapakṣamupāśritaḥ

siṃhikā janayāmāsa saiṃhikeyānmahāsurān //
rāhusālvamukhānvīrānbahūnamitatejasaḥ

gandharvāpsaraso divyā munayastānnivodha me //
citrasenograsenau ca ūrṇāyuranaghastathā

dhṛtarāṣṭraśca gopaśca sūryavarcāstathaiva ca //
yugapastṛṇapaḥ pārṣṇirardhaścitrarathastathā

kaliḥ śāliśirāścaiva parjanyo nāradastathā //
teṣāṃ caiva yavīyasyo divyāścāpsarasaḥ śubhāḥ

anūcānānavadyā ca priyamukhyā gaṇeśvarī //
miśrakeśī tathā cāpi parṇāśā puñjikasthalā

marīciḥ śucikā caiva vidyutparṇī tilottamā //
āṭṭikā lakṣmaṇā kṣemā devī rambhā manoramā

āsitā ca subāhuśca suvratā suvapustathā //
puṇḍarīkā sugandhā ca sudārā surasā tathā

hemā śaradvatī caiva prasūtā kamalā ca yā //
sumukhī haṃsamārgā ca saurīyāpsarasaḥ smṛtāḥ

kadrūśca janayāmāsa nāgāstīvraparākramān //
yeṣāṃ śeṣaḥ pradhānastu viṣṇurnāgavapurdharaḥ

yeneyaṃ dhāryate bhūmiḥ saśailavanakānanā //
āheyī vāsudevasya pūrvaṃ mṛrtirmayeritā

ananta iti vikhyātā mahākalpavināśinī //
mahākalpe mahāsattve svayaṃ bhavati sadā

tasyāṃśena samutpannaḥ śeṣo hi dharaṇīdharaḥ //
tasyānujāṃste nāgendrānprādhānyena vadāmyaham

vāsukistakṣakaścaiva ailāpatro dhanañjayaḥ //
airāvato mahāpadmaḥ kambalāśvatarāvubhau

śaṅkhapadmau mahāpadmo dhṛtarāṣṭrabalāhakau //
nīlāśvaḥ puṣpadantaśca sumukho durmukhastathā

nahuṣaḥ kararomā ca kuruśca kulikastathā //
krodhaśca janayāmāsa daśa kanyā narādhipa

pulahāya ca tā dattāḥ kaśyapena mahātmanā //
mṛgā ca mṛgamandā ca haribhadrā manoharā

bhūtā ca kaśipā daṃṣṭrā sarasā surasā tathā //
irā caiva tṛṇaṃ sarvaṃ janayāmāsa bhāminī

pañcaprakāraṃ dharmajña taṃ me nigadataḥ śṛṇu //
vṛkṣagulmalatā valyastvaksāratṛṇajātayaḥ

antaḥsaṃjñā bhavanyetā ghoreṇa tamasā vṛtāḥ //
eteṣāmabhimāninyo devatā yadunandana

janayāmāsa dharmajña irā dākṣāyaṇī śubhā //
prādhā prasūtāpsarasastāsāṃ nāmāni me śṛṇu

anavadyā anūkā ca sūnūkā karuṇapriyā //
manūnā subhagā caiva sahajanyā ca menakā

ghṛtasthūlā ghṛtācī ca viṣūcī pūrvacityapi //
pramlocītyapsarāścaiva nimlocantī tathaiva ca

anenaiva prasaṃgena tathānyāsāṃ mahīpate //
janma te'psarasāṃ vakṣye tanme nigadataḥ śṛṇu

sundopasundanāśāya nirmitā viśvakarmaṇā //
tilaṃtilaṃ samādāya sarvaratnaistilottamā

yasyāḥ pradakṣiṇājjātaścaturvaktraḥ pinākabhṛt //
sahasranayanaḥ śrīmānvajrī śakraśca pākahā

śeṣairdevagaṇairdṛṣṭvā bhramadvaktraiḥ pradakṣiṇaiḥ //
kṛte karmaṇi sā prāptā sūryalokaṃ varāṅganā

ekasthaṃ rūpasaundaryaṃ draṣṭumicchanpitāmahaḥ //
ahalyāṃ nāma kṛtavāṃstrailokyasyaikasundarīm

gautamāya ca tāṃ prādādbrahmā śubhacaturmukhaḥ //
yasyāḥ kṛte gautamena śakro nirvṛṣaṇaḥ kṛtaḥ

nārāyaṇorusaṃbhūtā tathā caivorvaśī śubhā //
saṃtyaktamānasā vavre bhartāraṃ budhajaṃ nṛpam

/
purūravasanāmānaṃ rūpeṇāpratimaṃ bhuvi //
tenaiva sārdhamadyāpi divaṃ prāptā ca tiṣṭhati

āhūtya iti vikhyātā tathaivāpsarasaḥ śubhā //
brahmaṇā manasā sṛṣṭā devarāmā manoramāḥ

manoḥ sutāḥ śaucavatyo vidyujjālarucaḥ smṛtāḥ //
bhīravaśca sutā mṛtyorbhūmijātā bhuvaḥ smṛtāḥ

amṛtākhyāśca sambhūtāstathaivāmṛtamanthane //
vahnijātā sudā nāma somādbhekurayāstathā

āyurvatyastathā proktāḥ sūryaraśmisamudbhavāḥ //
yajñotpannāstathā nāma ṛksāmabhyastatheṣṭayaḥ

vāyūtpannā sudā nāma devarāmāḥ prakīrtitāḥ //
ityete bahusāhasrā vijñeyāpsarasāṃ gaṇāḥ

devatānāmṛṣīṇāṃ ca patnyastā mātaraśca vai //
sugandhāścāpyaniṣyandā sarvā hyapsarasaḥ śubhāḥ

tāsāmāpyāyate sparśādānandaṃ cāśnute mahat //
vinatā janayāmāsa rudrānvai somapīthinaḥ

aṅgārakaṃ tathā sūryaṃ nirṛtiṃ ca khagaṃ tathā //
ajaikapādāhirbudhnyadhūmaketu dhvajāstathā

havanaṃ nṛśvaraṃ svabhyaṃ kapālamatha kiṅkiṇīm //
ekādaśaite kathitāstava rudrā mahābalāḥ

yeṣāṃ ca janayāmāsa dvau putrau yakṣarākṣasau //
yayoḥ santānasaṃbhūtā rājanvai yakṣarākṣasāḥ

imaṃ ca vaṃśaṃ niyamena yaḥ paṭhenmahātmanāṃ brāhmaṇadevasannidhau //
apatyalābhaṃ sa labhet puṣkalāṃ śriyaṃ tathā pretya ca śobhanāṃ gatim

iti śrīviṣṇudharmottare prathamakhaṇḍe mārkaṇḍeyavajrasaṃvāde kaśyapa sargo nāmāṣṭāviṃśatyadhikaśatatamo'dhyāyaḥ