Vishnudharmottara Purana · Chapter 1.127

vajra uvāca //
ditirvinaṣṭaputrā ca yaccakāra dvijottama //
tanmamācakṣva saṃkṣepāttatra me saṃśayo mahān

mārkaṇḍeya uvāca //
ditirvinaṣṭaputrā ca tapasā mahatā nṛpa //
ārādhayāmāsa tadā bhartāraṃ kaśyapaṃ munim

ārādhitaḥ sutapasā cchandayāmāsa bhāminīm //
vareṇa ca vacaḥ kāle putravyasanakarṣitām

kaśyapa uvāca //
varaṃ varaya suśroṇi varado'hamupasthitaḥ //
evamuktā varaṃ vavre devī putravinākṛtā

ditiruvāca //
śakrahantāramicchāmi putraṃ brahmanyaśasvinam //
yadi tuṣṭo'si me brahmaṃstaṃ prayaccha sutaṃ mama

mārkaṇḍeya uvāca //
evamuktastadā bhartā nātiprīto'bravīdvaram //
evaṃ te bhavitā bhadre śuci tvaṃ cedbhaviṣyasi

pūrṇavarṣasahasraṃ ca nānyathā tadbhaviṣyati //
evamuktvā tayā sārdhamuvāsa rajanīṃ dvijaḥ

tato jagāma dharmātmā tapase dṛḍhaniścayaḥ //
ātasthau niyamaṃ devī sagarbhā ca ditistadā //
niyamasthāṃ tu tāṃ dṛṣṭvā śakro vacanamabravīt

śakra uvāca //
ahaṃ devi kariṣyāmi tava śuśrūṣaṇaṃ sadā //
sthitāyā niyame ghore tadanujñātumarhasi

mārkaṇḍeya uvāca //
bāḍhamastvityathoktastu tayā devaḥ purandaraḥ //
tatrovāsa cchalānveṣī śuśrūṣurmātaraṃ sadā

tadābdaśeṣe kāle ca divā suptā'ditirnṛpa //
madhyāhnasamaye rājanpādayoḥ kṛtamūrdhajā

tasyāḥ saṃprāpya tacchidraṃ vajrī parapurañjayaḥ //
viveśa garbhamārgeṇa vivṛtena nareśvara

saṃpraviśyaiva taṃ garbhaṃ vajreṇa śataparvaṇā //
kṛtavānsaptadhā vajrī bhāgaṃbhāgaṃ tataḥ punaḥ

ekaikaṃ saptadhā cakre garbho'pi prārudattadā //
mā rudasveti taṃ vajrī prāha kārye svake sthitaḥ

etasminneva kāle ca daityendrajananī tadā //
vibuddhā vārayāmāsa śakraṃ daśaśatekṣaṇam

vajragarbhāñjaliḥ śakro māturvacanayantritaḥ //
niścakrāmodarāttasyāḥ saha bālairmahātmabhiḥ

taṃ jagāda ditiḥ śakraṃ prāñjaliṃ purataḥ sthitam //
na te śakrāparādho'sti mama garbhanikṛntane

sarvopāyairniyantavyaḥ śatrurnayavidā sadā //
mamāparādhādgarbho'yaṃ tvayādya bahudhā kṛtaḥ

bhavantu maruto nāma sarve devāḥ pṛthakpṛthak//
mā rudadhvamiti proktā yataḥ śakra tvayā sutāḥ

tataśca maruto nāma bhaviṣyanti jagattraye //
tvatsahāyā bhaviṣyanti tvadājñāvaśavartinaḥ

na caitebhyo bhayaṃ kiñcitkadācitte bhaviṣyati //
eṣāṃ nāmavibhāgām̐stu sthānāni ca tathā kuru

ekajyotiśca dvirjyotistricaturjyotireva ca //
ekaśakro dviśakraśca triśakraśca mahābalaḥ

prathame pavana skandhe gaṇo'yaṃ surathaḥ smṛtaḥ //
indraśca gavyo dṛśyaśca itaḥ pratiśirāstathā

mitaśca sammitaścaiva amitaśca mahābalaḥ //
dvitīye pavana skandhe gaṇo nāma praghoṣaṇaḥ

ṛtajitsatyajiccaiva suṣeṇaḥ senajittathā //
atimitro nāmitraśca pṛrumitro'parājitaḥ

tṛtīye pavanaskandhe gaṇaḥ santāpanaḥ smṛtaḥ //
ṛteśca ṛtavāndhātā vidhātā dharaṇo dhruvaḥ

vidhāraṇaḥ caturthastu gṛhamedho gaṇaḥ smṛtaḥ //
idṛkṣaśca sadṛkṣaśca etādṛgamṛtāśanaḥ

krītanaḥ prasadṛkṣaśca sarabhaśca mahāyaśāḥ //
gṛhe ca roṣaṇā nāma vāyuskandhe ca pañcame

dhartā durgadhva nirbhīmo hyabhiyuktiḥ kṛpā sahaḥ //
ṣaṣṭhe tu pavanaskandhe sāsvī nāma gaṇaḥ smṛtaḥ

dyutirvapuranādṛśyo kāmo jayo virāṭ //
prejeṣaṇo gaṇo nāma vāyuskandhe ca saptame

eṣāṃ nāmavibhāgantu dattvā sthānāni cācyutaḥ //
jagāma svagṛhaṃ prītyā ditiśca svagṛhaṃ yayau

etattavoktaṃ marutāṃ nṛvīra janmottamaṃ pāpabhayāpahāri //
yasmiñśrutenaiva janasya loke bhavantu vṛttyā na bhaviṣyatīha

iti śrīviṣṇudharmottare prathamakhaṇḍe mā० saṃ० marudutpattirnāma saptaviṃśatyadhikaśatatamo'dhyāyaḥ