Vishnudharmottara Purana · Chapter 1.126

vajra uvāca //
yaduktaṃ daityanāthena daityānāṃ kālaneminā //
pātāladaityaśamanaṃ vapurdevasya cakriṇaḥ

tadahaṃ śrotumicchāmi tatra me saṃśayo mahān //
caritaṃ tasya devasya bhāvānvetti yathātatham//
mārkaṇḍeya uvāca //
viṣṇunā tu balau baddhe pātālatalamāśritāḥ//
jaghnudaityagaṇā lokānbrāhmaṇāṃśca viśeṣataḥ

/
bhūtale hanyamāne tu yajñe nāśamupāgate //
kṣutkṣāmastridaśairbrahmā daityahetoḥ pracoditaḥ

brahmāpi codayāmāsa devadevaṃ janārdanam//
brahmaṇā codito devaḥ pātālagamanecchayā

cakāra rūpaṃ vārāhaṃ bhinnāñjanacayaprabham //
śaśāṅkalekhādaṃṣṭrāgraṃ vajraprothakhuraṃ tathā

vajrasaṃhananaṃ bhīmaṃ trailokyakṣobhakārakam //
pīnavṛttāyataskandhaṃ mahāpīnaśirodharam

vivṛttāsyaṃ mahākāyaṃ bhīmākṣaṃ bhīmanisvanam //
āvarttiromasaṃghātaṃ tena vigrahamūrjitam //

sa samudreṇa pātālaṃ praviśya madhusūdanaḥ //
daityānāṃ darśane tasthau mahābalaparākramaḥ

pātāle sūkaraṃ dṛṣṭvā prothadāritabhūtalam //
sumustagarbhakavalaṃ śuṃśukārakṛtānanam

paṅkānuliptasarvāṅgaṃ niryayurdānavāstadā //
satataṃ mṛgayāśīlā jaghnustañca varāyudhaiḥ

sa hanyamāno daityāstraiḥ pṛṣatairiva parvataḥ //
skandhakaṇḍūcchalenājau daityādhipaniveśanam

pātayāmāsa vegena mahādriśikharopamam //
veśmanaśca nipātena devadevasya māyayā

hanyante dānavā ghorāḥ śataśo'tha sahasraśaḥ //
te kṣayāddaityamukhyānāṃ daityamukhyakṣayaṅkarāḥ

yathārthakṣayatāṃ jagmuḥ kṣaye raudra upasthite //
kṣīyamāṇāḥ kṣayairdṛṣṭvā kṣatajotkṣiptamūrdhajān

kṣmātalasthānkṣatairgotraiḥ kṣaṇena kṣaṇadācarān //
pradhānā daityamukhyā ye auraserana balena te

jagmurvarāyudhairdevaṃ śataśo'tha sahasraśaḥ //
sa hanyamāno daityendraiḥ prothena ditijottamān

vidārayāmāsa raṇe daṃṣṭrāgreṇa tathāparān //
evaṃ varāheṇa raṇe hatāndṛṣṭvā dite sutān

hariṃ vijñātavāndevaṃ prahrādo daityasattamaḥ //
sa praṇamya hariṃ devaṃ tuṣṭāva paravīrahā

taṃ jagāda mahātejā devadevo janārdanaḥ //
anugrāhyo'si me daitya bhakto'si satataṃ yataḥ

tavājñālaṅghakā ghorā prāyeṇa nihatā mayā //
tavājñākāriṇo daityā na me vadhyā diteḥ sutāḥ

śāsanaṃ pālaya mahyaṃ pātāle tvaṃ sukhī bhava //
mārge sthāpaya daityām̐stvaṃ tvadājñāparibṛṃhitān

ābhūtasaṃplavaṃ daitya jīvaṃ tvaṃ na vimokṣyase //
dharmiṣṭhānāṃ ca daityānāṃ sadā rājā bhaviṣyasi

madbhaktyā parayā vatsa putrastava virocanaḥ //
mārgacyuto'pi na hataḥ kalpāyuśca tathā kṛtaḥ

balirvairocanaścaiva mayā baddhaḥ kṛte tava //
kariṣyati sa śakratvaṃ prāpte sāvarṇikentare

bāṇaṃ ca tanayaṃ tasya mama vipriyakārakam //
tvatkṛte na haniṣyāmi tasya cchetsyāmi dordrumān

chinnabāhurmayā yuddhe harasyānucaro balī //
mahākāla iti khyāto kalpasthāyī bhaviṣyati

ekamekaṃ tu daityendra santāne satataṃ tava //
nāhaṃ vadhiṣye dharmajña tvatkṛte vyetu te bhayam

bhavānbhaktastathā mahyaṃ bhakteṣvapi tathā mama //
nāstyadeyaṃ mahābhāga tasmāttvaṃ gaccha nirvṛttaḥ

hataśeṣānupādāya daityānsatpathamāśritān //
etāvaduktā prahrādaṃ tatraivāntaradhīyata

etadvārāhacaritaṃ tava rājasiṃha proktaṃ mayā sakalakalmaṣanāśakāri //
udavṛttadaityaśamanasya ṛṣistutasya kaṇḍūvinodanahatāsurapuṅgavasya

iti śrīviṣṇudharmottare prathamakhaṇḍe mārkaṇḍeyavajrasaṃvāde pātāle varāhaprādurbhāvo nāma ṣaḍviṃśatyadhikaśatatamo'dhyāyaḥ