Vishnudharmottara Purana · Chapter 1.125

// mārkaṇḍeya uvāca //
dṛṣṭvā sa purato devaṃ dānavānabhyabhāṣata //
ayaṃ sa dṛśyate viṣṇurdānavā yena ghātitāḥ

kutṛṣṇayeva śakrārthe babhūva kila vāmanaḥ //
yadā vañcitavānputraṃ bhrātṛvyasya baliṃ mama

nṛvarāhavapuḥ kṛtvā lokacittaharaṃ puro //
hiraṇyākṣaṃ jaghānaiva pitṛvyaṃ mama vismitam

apūrvaṃ rūpamāsthāya narasiṃhasya dānavāḥ //
pitaraṃ yo jaghānaiva hiraṇyakaśipuṃ raṇe

varāharūpiṇānena pātālatalamāsthitāḥ //
asambhāvyabhayenājau dānavā vinipātitāḥ

narāśva vapuṣā yena madhukaiṭabhayoḥ purā //
pātālādāhṛtā vedāstatastau yudhi ghātitau

asyājñākāriṇo devā na saṃtiṣṭhanti śāsane //
ayaṃ sa rakṣāṃ devānāmasmābhirviprakṛṣyatām

trailokye daityamudbhūtaṃ yuddhenaiva punaḥpunaḥ //
devasādgama ityeva tena vadhyo'tha me ripuḥ

atītasyādya kālasya durnayasya kṛtasya ca //
bhokṣyate'yaṃ phalaṃ daityāḥ sarve paśyantu mā ciram

ityetaddaityanāthasya vākyaṃ śrutvaiva dānavāḥ //
jayaśabdaṃ tataścakruḥ siṃhanādaravaṃ tathā

vācaśca pratikūlāstāstena duṣṭena cetasā //
tacchrutvā ca harirdevaḥ kruddho nāmedamabravīt

kimidaṃ garjase daitya śāradāmbudavadvṛthā//
prajāpatikṛtaṃ setuṃ kathaṃ laṅghitumicchasi

evaṃ kathatordevadaityayoḥ pārthivottama//
prāvartata raṇo ghoro gadāpātavibhīṣaṇaḥ

dānavairdevadevo'pi kālanemipuraḥsaraiḥ//
saṃchādyate mahāstraughairmeghairiva nabhastalam

saṃchādyamāno daityendrairdevadevo na vivyathe //
yodhayāmāsa sa raṇe gadayā dānavānbahūn

tasya daityaprasaktasya kālanemirmahāsuraḥ //
pātayāmāsa vegena gadāṃ garuḍamūrdhani

gadāghātena raudreṇa tena tārkṣyasya mānada //
nāsā bhagnā vyathā jātā raktacchardiśca dāruṇā

vyathitaṃ garuḍaṃ dṛṣṭvā devena harimedhasā //
kṣiptaṃ daityavināśāya tadā cakraṃ sudāruṇam

yattatsudarśanaṃ nāma sūryatejaḥsamudbhavam //
vajranābhaṃ sahasrāraṃ kṣaraparyantamaṇḍalam

cyutaṃ cakrikarāccakraṃ kālanemiṃ mahāsuram //
śīghraṃ viśirasaṃ cakre vibāhuṃ ca tathā nṛpa

vibāhuśirasaṃ kṛtvā devahastamupeyivān //
vibāhuśirasaṃ kāyaṃ kṣaracchoṇitanirjharam

na papātāsya medinyāṃ yadā tārkṣyastato rayāt //
urusā pātayāmāsa devānāṃ paśyatāṃ tadā

patatā daityakāyena saśailavanakānanā //
kampitā vasudhā sarvā patitāśca śiloccayāḥ

dānavendraṃ hataṃ dṛṣṭvā mayatārapurogamāḥ //
tuṣṭuvurdevadevaśaṃ varacakrāsipāṇinam

tuṣṭāva ca tadā devo brahmā śubhacaturmukhaḥ //
stutaśca brahmaṇā devo lokapālānyathā purā

sthāneṣu yojayāmāsa yajñaṃ devamukhe tathā //
jagāma brahmaṇā sārdhaṃ brahmalokaṃ tadā vibhuḥ

tatrātmānaṃ yajñamūrti mijyamānaṃ dvijottamaḥ //
dṛṣṭvā svayaṃ tu jagrāha yajñabhāgaṃ mahātmanām

tatra pūjāmupādāya jagāma sa hiraṇvatīm //
astrairanugatastatra suṣvāpa kila yogavit /

evaṃ sa daityapravaro narendra kṛṣṇena cakreṇa purā nirastaḥ //
ataḥ paraṃ kiṃ kathayāmi tubhyaṃ tanme vadasvāyatalohitākṣa

iti śrīviṣṇudharmottare prathamakhaṇḍe mārkaṇḍeyavajrasaṃvāde kālanemivadho nāma pañcaviṃśatyadhikaśatatamo'dhyāyaḥ