Vishnudharmottara Purana · Chapter 1.124

mārkaṇḍeya uvāca //
vāyvagnī sahitau gatvā mayatārapurogamān ///
jigyatuḥ samare daityānnānāpraharaṇodyatāna

vijitāste raṇe daityā mayatārapurogamāḥ//
tyaktadevālayāḥ sarve varuṇālayamāgatāḥ

etasminneva kāle tu hiraṇyakaśipoḥ sutaḥ //
kālanemiriti khyātaḥ śataśīrṣonudṛśyate

śatabāhurmahākāyaḥ parvatākāradarśanaḥ//
brahmalabdhavaro raudro dagdhaśailasamacchaviḥ

ekodaro dvipādaśca ekagrīvaḥ surāntakaḥ//
aṅgadī baddhamukuṭaḥ kuṇḍalāmbarabhūṣaṇaḥ//
sarvāyudhadharo raudro gadāpāṇirvibhīṣaṇaḥ //
dattvā'bhayaṃ sa daityānāṃ tasmai meruṃ surālayam

gatvā vijigye tridaśānsthānebhyaścāvaropayat //
trailokyamātmasātkṛtvā sukhamāste triviṣṭape

tasya te hyanugāḥ sarve lokāḥ sthāvarajaṅgamāḥ //
tadājñākāriṇaḥ sarve tadbhāvasyānuvartakāḥ

pañca tatrābhyavartanta viparītena karmaṇā //
vedo dharmaḥ kṣamā satyaṃ śrīśca nārāyaṇāśrayā

sarveṣāmanusandhānātsaroṣo dānaveśvaraḥ //
vaiṣṇavaṃ padamanvicchanyayau nārāyaṇāntikam

jñātvā daityamathāyāntaṃ devopi madhusūdanaḥ//
tārkṣyamāvāhayāñcakre āruroha ca taṃ hariḥ//
sa dadarśa hariṃ devaṃ tārkṣyasthaṃ daityarāṭ tadā//
sajalajaladanīlaṃ padmapatrāyatākṣaṃ khagapatimavarūḍhaṃ kalpavṛkṣopamānam//
halamusalagadābhiḥ śobhitaṃ devadevaṃ varapuruṣamajeyaṃ śārṅgacakrāsipāṇim

iti śrī viṣṇudharmottare prathamakhaṇḍe mārkaṇḍeyavajrasaṃvāde kālanemyupākhyāne śrībhagavaddarśano nāma caturviṃśatyadhikaśatatamo'dhyāyaḥ