વિષ્ણુધર્મોત્તરપુરાણમ્ · અધ્યાય 1.124

માર્કણ્ડેય ઉવાચ ॥
વાય્વગ્ની સહિતૌ ગત્વા મયતારપુરોગમાન્ ॥।
જિગ્યતુઃ સમરે દૈત્યાન્નાનાપ્રહરણોદ્યતાન

વિજિતાસ્તે રણે દૈત્યા મયતારપુરોગમાઃ॥
ત્યક્તદેવાલયાઃ સર્વે વરુણાલયમાગતાઃ

એતસ્મિન્નેવ કાલે તુ હિરણ્યકશિપોઃ સુતઃ ॥
કાલનેમિરિતિ ખ્યાતઃ શતશીર્ષોનુદૃશ્યતે

શતબાહુર્મહાકાયઃ પર્વતાકારદર્શનઃ॥
બ્રહ્મલબ્ધવરો રૌદ્રો દગ્ધશૈલસમચ્છવિઃ

એકોદરો દ્વિપાદશ્ચ એકગ્રીવઃ સુરાન્તકઃ॥
અઙ્ગદી બદ્ધમુકુટઃ કુણ્ડલામ્બરભૂષણઃ॥
સર્વાયુધધરો રૌદ્રો ગદાપાણિર્વિભીષણઃ ॥
દત્ત્વાઽભયં સ દૈત્યાનાં તસ્મૈ મેરું સુરાલયમ્

ગત્વા વિજિગ્યે ત્રિદશાન્સ્થાનેભ્યશ્ચાવરોપયત્ ॥
ત્રૈલોક્યમાત્મસાત્કૃત્વા સુખમાસ્તે ત્રિવિષ્ટપે

તસ્ય તે હ્યનુગાઃ સર્વે લોકાઃ સ્થાવરજઙ્ગમાઃ ॥
તદાજ્ઞાકારિણઃ સર્વે તદ્ભાવસ્યાનુવર્તકાઃ

પઞ્ચ તત્રાભ્યવર્તન્ત વિપરીતેન કર્મણા ॥
વેદો ધર્મઃ ક્ષમા સત્યં શ્રીશ્ચ નારાયણાશ્રયા

સર્વેષામનુસન્ધાનાત્સરોષો દાનવેશ્વરઃ ॥
વૈષ્ણવં પદમન્વિચ્છન્યયૌ નારાયણાન્તિકમ્

જ્ઞાત્વા દૈત્યમથાયાન્તં દેવોપિ મધુસૂદનઃ॥
તાર્ક્ષ્યમાવાહયાઞ્ચક્રે આરુરોહ ચ તં હરિઃ॥
સ દદર્શ હરિં દેવં તાર્ક્ષ્યસ્થં દૈત્યરાટ્ તદા॥
સજલજલદનીલં પદ્મપત્રાયતાક્ષં ખગપતિમવરૂઢં કલ્પવૃક્ષોપમાનમ્॥
હલમુસલગદાભિઃ શોભિતં દેવદેવં વરપુરુષમજેયં શાર્ઙ્ગચક્રાસિપાણિમ્

ઇતિ શ્રી વિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે કાલનેમ્યુપાખ્યાને શ્રીભગવદ્દર્શનો નામ ચતુર્વિંશત્યધિકશતતમોઽધ્યાયઃ