Vishnudharmottara Purana · Chapter 1.123

bṛhaspatiruvāca//
jagadāyurbhavānvāyo śarīrasthaḥ śarīriṇām/
anantamūrtirdharmātmā devo nārāyaṇaḥ prabhuḥ

acintyavīryaḥ puruṣaḥ sadādhāraḥ sanātanaḥ //
sākṣibhūtaśca sarveṣāṃ karmaṇāṃ śubhapāpayoḥ

ghrāṇastvaṃ dehināṃ dehe ceṣṭitañca tathā bhavān //
bhavānrudro bhavānbrahmā bhavānviṣṇuḥ sanātana

tavāyattaṃ hi jagatāṃ varṣāvarṣaṃ śubhāśubhama //
bhavānvisṛjate meghānbhavānsaṃharate punaḥ

bhavāndhārayate meghānvarṣamāṇām̐stathā divi //
ādityaraśmipītasya meghodaragatasya ca

rasasya bhaṅktā satataṃ bhavāneva nabhastale //
taḍillatānāṃ ca tathā bhavānkartā jagattraye

ambhasāṃ bhedakāle tu sarvādhāraḥ samīraṇa //
parasparaṃ hi bhavatastathā saṃghaṭanātprabho

garjitaṃ jāyate loke meghodara gataṃ mahat //
balena tvatsamaṃ nānyaṃ bhūtaṃ paśyāmi bhūtale

tasmāttvaṃ kuru sāhāyyaṃ vedamūrtervibhāvasoḥ

etāvaduktoṅgirasā mahātmā tatheti taṃ prāha samīraṇo'pi //
jagāma yuddhaṃ saha pāvakena daityeśvarāndevaripūnmahātmā

iti śrīviṣṇudharmottare prathamakhaṇḍe mārkaṇḍeyavajra saṃvāde vāyustotraṃ nāma trayoviṃśatyuttaraśatatamo'dhyāyaḥ