Vishnudharmottara Purana · Chapter 1.121

// mārkaṇḍeya uvāca // //
ditiḥ putradvayaṃ rājañjanayāmāsa viśrutam //
hiraṇyākṣaṃ ca durdharṣaṃ hiraṇyakaśipuṃ tathā

hiraṇyākṣo hato rājannṛvarāheṇa saṃyuge //
hiraṇyakaśyapū rājannṛsiṃhena nipātitaḥ

hiraṇyakaśipoḥ putraḥ prahlādo'rikulāntakaḥ //
kālanemiśca durdharṣo viṣṇunā ghātito yudhi

ārādhya keśavaṃ devaṃ prahlādaśca mahābalaḥ //
prāptavāñjīvitaṃ dīrghaṃ brāhmaṃ dinamanuttamam

kālanemiśca durdharṣo mahābalaparākramaḥ //
nihato vāsudevena nivṛtte tārakāmaye

prahrādasya sutaḥ śrīmānrājannāmnā virocanaḥ //
virocanasutaḥ śrīmānbalirityeva viśrutaḥ

vāmanaṃ rūpamāsthāya baddho yo viṣṇunā purā //
balerbāṇaḥ suto rājansmṛto bāhusahasravān

pituste śvaśuraḥ śrīmānpiturarthe tavānagha //
vivāhaṃ kṛtavānkṛṣṇo nagare śoṇitāhvaye

yasminsa vai devavaraḥ prasahya skandaṃ ca rudraṃ ditijaiḥ sametam //
raṇe vijigye nṛpatipradhāna sahānugaṃ vīryabalopapannam

iti śrīviṣṇudharmottare prathamakhaṇḍe mārkaṇḍeyavajrasaṃvāde ditivaṃśānukīrtanaṃ nāmaikaviṃśatyadhikaśatatamo'dhyāyaḥ