Vishnudharmottara Purana · Chapter 1.119

// mārkaṇḍeya uvāca //
asminvaivasvate prāpte śṛṇu dharmasya pārthiva //
dākṣāyaṇyāśca sakalaṃ śṛṇu tvaṃ vaṃśamuttamam

evaṃ tāni mahīdurgaśarīrāṇi narādhipa //
arundhatyā prasūtāni dharmo vaivasvatentare

aṣṭau ca vasavaḥ putrā somapāśca vasostathā //
dharo dhruvaśca somaśca āpaścaivānalānilau

pratyūṣaśca prabhāsaśca vasavo'ṣṭau prakīrtitāḥ //
dharasya putrā'mbunimbaḥ kālaḥ putro dhruvasya ca

kālasyāvayavānāṃ tu śarīrāṇi narādhipa //
muhūrtavarjaṃ kālāddhi prasūtānyaviśeṣataḥ

somasya bhagavānvarcāḥ śramastvāpasya kīrtyate //
anekajanmā janavaḥ kumāraścānalasya tu

purojavāścānilasya pratyūṣasya ca devalaḥ //
viśvakarmā prabhāsasya tridaśānāṃ sa vārdhakiḥ

jāmī duhitaraḥ proktā nāgavīthyādayo nava //
laṃbāputraḥ smṛto ghoro bhānoḥ putraśca bhānavaḥ

graharkṣāṇāṃ tu sarveṣāṃ cānyeṣāmapi tejasām //
marutvatyāṃ marutvantaḥ sarve putrāḥ prakīrtitāḥ

saṃkalpāyāśca saṃkalpāstathā putrāḥ prakīrtitāḥ //
muhūrtāśca muhūrtāyāḥ sādhyātsādhyāsutāḥ smṛtāḥ

mattonmattaśca prāṇaśca naropāṇaśca vīryavān //
cittirnaro hayaścaiva haṃso nārāyaṇastathā

vibhuścāpi prabhuścāpi sādhyā dvādaśa kīrtitāḥ//
viśvāyāśca tathā putrā viśvedevāḥ prakīrtitāḥ

kraturdakṣo vasuḥ satyaḥ kālaḥ kāmo dhunistathā //
ūravānmanujo viśveromāyāśca hi te daśa

etāvaduktaṃ tava dharmavaṃśaṃ saṃkṣepataḥ pārthivasaṃghamukhya //
vyāsena vaktuṃ na hi śaktirasti rājanvinā varṣaśatairanekaiḥ

iti śrīviṣṇudharmottare prathamakhaṇḍe mā० saṃ० dharmavaṃśānukīrtanaṃ nāmaikonaviṃśādhikaśatatamo'dhyāyaḥ