Vishnudharmottara Purana · Chapter 1.118

// mārkaṇḍeya uvāca //
ataḥ paramagastyasya vakṣye vaṃśodbhavāndvijān //
āgastyeyaḥ karambho yaḥ kausalyākulajāstathā

svamedhaso mayobhuvastathā gāndhārakāyaniḥ//
paulastyāḥ pulahāścaiva kratuvaṃśabhavāstathā

vārṣṇeyo'pi mataścaiṣāṃ sarveṣāṃ pravarāḥ śubhāḥ //
agastyaśca mahendraśca ṛṣiścaiva mayobhuvaḥ

parasparamavaivāhyā ṛṣayaḥ parikīrtitāḥ //
paurṇamāsāḥ pāraṇāśca tryārṣṇeyāḥ parikīrtitāḥ

agastyaḥ paurṇamāsaśca pāraṇaśca mahātapāḥ //
parasparamavaivāhyā paurṇamāsāśca pāraṇam

etaduktamṛṣīṇāṃ te vaṃśamuktamapūruṣam //
ataḥ paraṃ pravakṣyāmi kiṃ tavānagha kathyatām

vajra uvāca //
pulahasya pulastyasya kratoścaiva mahātmanaḥ //
agastyasya tathā caikaṃ kathaṃ vaṃśaṃ taducyate

mārkaṇḍeya uvāca //
kratuḥ khalvanapatyo'sti rājanvaivasvatentare //
idhmavāhaṃ sa putratve jagrāha nṛpasattama

agastyaputraṃ dharmajña āgastyātkratavastathā //
pulahasya tathā putraḥ tiraścaḥ pṛthivīpate

teṣāṃ te janma vakṣyāmi uttaratra yathā vidhi //
pulahastvaprajāṃ dṛṣṭvā nātiprītamanā hyabhūt

agastyajaṃ dṛḍhasyuṃ taṃ putratve kṛtavāṃstadā //
paulahāśca tathā rājannāgastyāḥ parikīrtitāḥ

ete tavoktāḥ pravarā dvijānāṃ mahānubhāvā nṛpa gotrakārāḥ //
yeṣāṃ ca nāmnāṃ parikīrtanena pāpaṃ samagraṃ puruṣo jahāti

iti śrīviṣṇudharmottare prathamakhaṇḍe mārkaṇḍeyavajrasaṃvāde agastyavaṃśānukīrtanaṃ nāmāṣṭādaśādhikaśatatamo'dhyāyaḥ