વિષ્ણુધર્મોત્તરપુરાણમ્ · અધ્યાય 1.119

॥ માર્કણ્ડેય ઉવાચ ॥
અસ્મિન્વૈવસ્વતે પ્રાપ્તે શૃણુ ધર્મસ્ય પાર્થિવ ॥
દાક્ષાયણ્યાશ્ચ સકલં શૃણુ ત્વં વંશમુત્તમમ્

એવં તાનિ મહીદુર્ગશરીરાણિ નરાધિપ ॥
અરુન્ધત્યા પ્રસૂતાનિ ધર્મો વૈવસ્વતેન્તરે

અષ્ટૌ ચ વસવઃ પુત્રા સોમપાશ્ચ વસોસ્તથા ॥
ધરો ધ્રુવશ્ચ સોમશ્ચ આપશ્ચૈવાનલાનિલૌ

પ્રત્યૂષશ્ચ પ્રભાસશ્ચ વસવોઽષ્ટૌ પ્રકીર્તિતાઃ ॥
ધરસ્ય પુત્રાઽમ્બુનિમ્બઃ કાલઃ પુત્રો ધ્રુવસ્ય ચ

કાલસ્યાવયવાનાં તુ શરીરાણિ નરાધિપ ॥
મુહૂર્તવર્જં કાલાદ્ધિ પ્રસૂતાન્યવિશેષતઃ

સોમસ્ય ભગવાન્વર્ચાઃ શ્રમસ્ત્વાપસ્ય કીર્ત્યતે ॥
અનેકજન્મા જનવઃ કુમારશ્ચાનલસ્ય તુ

પુરોજવાશ્ચાનિલસ્ય પ્રત્યૂષસ્ય ચ દેવલઃ ॥
વિશ્વકર્મા પ્રભાસસ્ય ત્રિદશાનાં સ વાર્ધકિઃ

જામી દુહિતરઃ પ્રોક્તા નાગવીથ્યાદયો નવ ॥
લંબાપુત્રઃ સ્મૃતો ઘોરો ભાનોઃ પુત્રશ્ચ ભાનવઃ

ગ્રહર્ક્ષાણાં તુ સર્વેષાં ચાન્યેષામપિ તેજસામ્ ॥
મરુત્વત્યાં મરુત્વન્તઃ સર્વે પુત્રાઃ પ્રકીર્તિતાઃ

સંકલ્પાયાશ્ચ સંકલ્પાસ્તથા પુત્રાઃ પ્રકીર્તિતાઃ ॥
મુહૂર્તાશ્ચ મુહૂર્તાયાઃ સાધ્યાત્સાધ્યાસુતાઃ સ્મૃતાઃ

મત્તોન્મત્તશ્ચ પ્રાણશ્ચ નરોપાણશ્ચ વીર્યવાન્ ॥
ચિત્તિર્નરો હયશ્ચૈવ હંસો નારાયણસ્તથા

વિભુશ્ચાપિ પ્રભુશ્ચાપિ સાધ્યા દ્વાદશ કીર્તિતાઃ॥
વિશ્વાયાશ્ચ તથા પુત્રા વિશ્વેદેવાઃ પ્રકીર્તિતાઃ

ક્રતુર્દક્ષો વસુઃ સત્યઃ કાલઃ કામો ધુનિસ્તથા ॥
ઊરવાન્મનુજો વિશ્વેરોમાયાશ્ચ હિ તે દશ

એતાવદુક્તં તવ ધર્મવંશં સંક્ષેપતઃ પાર્થિવસંઘમુખ્ય ॥
વ્યાસેન વક્તું ન હિ શક્તિરસ્તિ રાજન્વિના વર્ષશતૈરનેકૈઃ

ઇતિ શ્રીવિષ્ણુધર્મોત્તરે પ્રથમખણ્ડે મા૦ સં૦ ધર્મવંશાનુકીર્તનં નામૈકોનવિંશાધિકશતતમોઽધ્યાયઃ